Ma mărli evenimenti a stâmânâllei ți tricu 04.09 – 10.09.2024
Amnistie ti ațelli ți au borgi te-a pâlteari la statu/ Doarâ ti Ucraina/ Andrupari ti Israel/ Tesi ti româñi/ Tuț s-vatâmâ s-agiungâ prezidentu
Tașcu Lala, 09.09.2024, 07:00
Amnistie ti ațelli ți au borgi te-a pâlteari
Chivernisea di Bucureşti vulusi, ñiercuri, proiectul di ordonanţâ di ananghi, mutrindalui amnistia fiscalâ ti firmi şi persoani fiziți. Tu documentu sunt pruvidzuti bonificaţii ti oamiñi ți nu amânâ sâ-și pâlteascâ borgili, cata cumu ș-ti ațelli ți apufusescu sâ-şi pâlteascâ restanţili. Tu bitisita a meslui agustu, restanţili la bugetlu di statu a persoaniloru fiziți ş-juridiți trițea di 71 di miliardi di lei (cama di 14 miliardi di evradz). Statlu lâ câfta ațiloru ți au borgi, s-li pâlteascâ pânâ tu dzuua di 25 di brumaru, iara tocurli ş-penalităţli va lâ hibâ anulati/va lâ hibâ fapti risite. Pi di altâ parti, Chivernisea lâ da ş-unâ bonificaţie di 3% ti contribuabilii ndrepțâ. Proiectul, adratu di ministerlu a Finanţilor, ari ș-unu singiru di meatri di sirțâlli tu sectorlu bugetaru, ți ângârdescu hărgili ti lucri şi serviții.
Doarâ ti Ucraina
Prezidentul ali Românie, Klaus Iohannis, promulgă, gioi, nomlu mutrindalui darea câtâ terţi a unui sistemu di racheti sol-aer Patriot, ancupâratu ditu Statili Uniti. Actul normativu, vulusitu, ma niti, tu Parlamentu, va s-hibâ datu ca unâ doarâ, ti cari s-achicâsi cu partenerlu americanu, câtâ Ucraina, vițina ali Românie, aputursitâ di ascherea aruseascâ. Tutnâoarâ, uidisitu cu nomlu, „âlli si da ândreptu a Chivernisillei ali României s-adarâ tutu ți easti ananghi, ta s-adarâ diznău capabilitâţli di apârari aerianâ cu baza la sol”, pritu darea a chivernisillei americanâ a contractilor tu ți mutreaști ancupârarea a unui altu sistemu di racheti sol-aer Patriot.
Andrupari ti Israel
România condamnâ sertu atacurli teroristi contra a statlui Israel ş-lâ greaști a pârţâloru mintiti tu ahtari ciamaunâ s-agiutâ la fâțearea diznău a securitatillei ș-la simnarea ali unâ achicâseari di dânâseari a alumtâllei – fu mesajlu pitricutu tut goi, Ierusalim, di premierlu Marcel Ciolacu, la andamusea cu omologlu a lui israelian, Benjamin Netanyahu. Uidisitu cu Radio România, Ciolacu şi-aspusi gailelu ti catastisea di securitati ş-ti pericollu di fâțeari ma laiu a câvgălui. Deadunu cu minişțrâlli ali Apârari, a Emburlâchillei di Nafoarâ ș-ali Icunumillei, protlu ministru fu tu unâ vizitâ di lucru Israel, iu s-adună cu prezidentulu Isaac Herzog. Easti daua vizitâ a premierlui român tu Israel, tu ma pțânu di unu anu, dupâ ațea ditu 17 di brumaru 2023, la dzați dzâli dupâ ți statlu uvriescu fu atacatu di terorişțâlli ditu minarea islamistâ Hamas.
Tesi ti români
Evroparlamentarul PSD Roxana Mînzatu easti pripunirea ufițialâ ali Românie ti tesea di comisaru evropeanu. Hâbarea fu faptâ luni di premierlu Ciolacu ș-va sâ zburascâ cu şefa ali Comisie Evropeanâ, Ursula von der Leyen, ti portofoliul ți va-lu aibâ România. Componenţa a yinitorlui Executiv evropean va s-hibâ datâ tu șteari tu dzuua di 11 di yizmâciuni. Tut Bruxelles, evrodeputatlu român Siegfried Mureșan (PPE/PNL) fu disimnatu di pareili politiți a Parlamentului Evropean ți adarâ pâzârâpsearea ti yinitorlu buget multianual ali Uniuni Evropeanâ post-2027. Adratu pi 7 añi, aestu ari vârâ 1.300 di miliardi di evradz ș-easti instrumentul ditu cari statili membri llia nai ma marea parti a fondurlor evropeani nerambursabili ti investițiili ș-ti subvențiili agricoli. Parlamentul va ș-aspunâ prioritățli mutrindalui bugetlu multianual ali Uniuni. Aestea va-lli hibâ spusi dapoaia ali Comisie Evropeanâ ta s-hibâ bâgati tu proiectul di buget. Ditu exercițiul finanțiar multianual di tora, 2021 – 2027, România s-hârseaști di vârâ 46 di miliardi di evradz, la cari s-adavgâ și sumili ditu PNRR.
Tuț s-vatâmâ ta s-agiungâ prezidentu
Marțâ, românlu Mircea Geoană ș-alâsă tesea di secretaru gheneralu adjunctu al NATO. Easti bitisita a unui mandatu di ținți añi, jalonatu di polimlu ditu Ucraina ş-di trâdzearea nâpoi ali ascheri aliatâ ditu Afganistan. Geoană dzâsi, tu unu interviu ti Radio România, câ va-şi filiseascâ ma largu influenţa ta s-agiutâ româñi tu forurli internaţionali, emu ș-tu NATO, ama că ducheaști ananghea s-toarnâ tu politica ndophi, româneascâ. Presa pruvidea aestâ hâbari di cama di doi añi ș-minduia că s-fați di furnia a candidaturillei, ca independentu, al Geoanâ la alidzerli prezidenţiali ditu bitisita a anlui. Ambasadoru tu Statili Uniti, ministru di Externi ş-lider PSD ma ninti, Geoană ari candidatâ la şefia a statlui tu 2009, cându chiru dinintea alu Traian Băsescu. Prit alţâ ți vor s-hibâ prezidentul ali României suntu tuţ liderlli a partidilor parlamentari: Marcel Ciolacu (PSD), Nicolae Ciucă (PNL), Elena Lasconi (USR), George Simion (AUR) i Kelemen Hunor (UDMR).
Autor: Bogdan Matei
Apriduțearea: Tașcu Lala
