România, perspectivi energhetiți
Memorandum România-Sârbia ti adrarea a unlui interconector di gazi
Tașcu Lala, 11.08.2024, 08:16
România ș-Sârbia simnarâ un memorandum ti adrarea a unlui interconector di gazi anamisa di aesti dauâ vâsilii vițini. Documentul fu simnat, luni, la Porțâli di Her I, di ministrul român ali Energhie, Sebastian Burduja, ș-ministrul ali Energhie ș-Mademi dit Sârbie, Dubravka Dedovici Handadovici.
Uidisit cu spusa a lor, dauli vâsilii va s-adarâ gaireț ta s-poatâ s-ahurheascâ di anlu ți yini. Investiţia va s-hibâ bitisitâ pânâ di 2028, iara aestu proiectu eati unâ jgllioatâ mari ti ânvârtușarea a securitatillei energheticâ a daulor vâsilii şi ti integrarea reghionalâ a pâzărlor, prit diversificarea a căllilor di fâțeari a zairelui/psunsirillei.
Ufițiallu di București dzâsi că, prit aestâ investiţie, tuţ româñilli va s-veadâ hâiri: unâ pâzari cama competitivâ, ți va s-ducâ la un pâhă ma ñic ti consumatori, securitati energheticâ, tindearea a sistemilor energhetiți şi fâțearea ma largâ a zairelui. Proiectul va s-conecteadzâ sistemlu di transportu a gazilor naturali dit Sârbie cu magistrala BRUA dit Românie.
Ministrul Sebastian Burduja dzâsi: „Aestu memorandum thimilliuseaști ankisita a interconectorlui di gazi, âlli dzâțem Arad-Mokrin. Ari anvârliga di 85 di kilometri ș-custuseaști vârâ 80 di miliuni di evradz. Ari simasie aestu inteconector? Pi di-unâ parti, ti securitatea energheticâ dit reghiuni, ş-ti Românie ș-Sârbie, dicara ari ma multi călliuri, ari ș-un livel di siguranţâ ma mari tu fâțearea a zairelui/psunsirillei, ș-pi di altâ parti, ta s-aibâ un pâhă ma ñic, un pâhă bun ti consumatorlu dit soniˮ.
Sebastian Burduja adâvgă că România easti lider reghional tu sectorlu energhetic şi furnizor di stabilitati geopoliticâ. „Aesti elementi deadun, cata cum şi investiţia tu infrastructurâ, duc la pistusini şi crişteari economicâ, locări di lucru şi criștearea ali tutâ reghiuni.ˮ, adâvgă ministrul român ali Energhie. El dzâsi nica că România easti lider tu sectorlu energhetic la livel reghional ș-lâ da a vâsiliilor vițini resursili şi spețialişțâlli ți âlli ari.
Tu aestu contextu, Burduja dzâsi că, tu protlu trimestru di estan, România asiguripsi aproapea 30% dit producţia di gaz ti tutâ Uniunea Evopreanâ. „Compania naţionalâ Romgaz ari, ma largu, planuri mări: Neptun Deep, investiţia di patru miliardi di evradz dit Amarea Lai, va s-adarâ diplo producţia di gaz românescu dit 2027ˮ, cundille Sebastian Burduja.
Tu idyiul kiro, România caftâ argumenti tehniți ta s-amânâ vadelu ti cari zburâ cu executivlu evropean ti bitisearea a capațităţlor di adrari di energhie pe cărbuni. Ministrul Sebastian Burduja exiyisi că easti ananghi di ma multu kiro ta s-treacâ la izvuri di energhie pi gaz, dicara 15% dit producţia di energhie a vâsilillei s-adarâ nica cu cârbuni.
Autor: Leyla Cheamil
Apriduțearea: Mirela Sima-Biolan
