Parlamentul European ndrupaşti aprukearea ali Românie tru Spaţiul Schengen

Parlamentul European vulusi, cu largă majoritate, ună rezoluţie pritu cari caftă a Consiliului Uniunillei Europeane saprobă adirarea ali Românie şi Vărgărie la Spaţiul Schengen.

Sorin Iordan, 13.07.2023, 17:18

România şi Vărgăria lipseaşti s’hibă integrate tru spaţiul Schengen până tru bitisita a aluştui an, s4 spuni tru ună rezoluţie adoptată, ñiercuri, di Parlamentul European. Documentul, cari lo 526 di voturi “tră”, 57 “contra” şi 42 di abţăneri,sumliniadză că România şi Vărgăria au tiñisită di cabaia kiro căftărli anănghisiti ta s’hibă aprukeati tru spaţiul Schengen şi că exercitarea a ndreptului di veto andicra di aderarea aluştoru hărneaşti sentimentul anti-european şi aduţi zñie ali economie. Eurodeputaţllii s’fac pişmani ti apofasea a Consiliului UE ditu 8 di andreu 2022 ta s’nu aproaki statutlu di membru “fără s’hibă spusă niţi ună justificari di turlie juridică ligată di criteriile di aderare”. Uidisitu cu aestea, cetăţeañilli ali Românie şi Vărgărie suntu discriminaţ, di itia că s’ampulisescu cu amănări, dificultăţ birocratiţi şi hărgiueri suplimentare atumţea căndu călătorescu ică fac emburlăki tru xeani, tru comparaţie cu omologilli a lor ditu spaţiul Schengen. Tutunăoară, textul caftă ali Comisie Europeană s’facă isapi ti chirerli financiare, amintatiţli nirealizate şi zñiili adusi a mediului pi cari România şi Vărgăria li avură ditu cirişaru 2011 di itia ali “apofasi negative şi nintimilleată” adoptate tru ligătură cu aderarea a lor la Schengen şi s’facă isapi ti posibili mecanisme di compensare.

Tru un interviu tră Radio România, europarlamentarul Victor Negrescu feaţi ama un apel tra s’hibă cu ngătanu tru condiţiile tru cari, până la bitisita-a anlui, ari trei reuniuni a Consiliului Justiţie şi Afaceri Interne, iu poati s’hibă loată ună apofasi mutrindalui aderarea, iara Austria, cari ambudyiusi România tru andreu 2022, nu deadi nica niţi un semnu că ş-alăxi minduita. Victor Negrescu: Vrearea a noastră easti să s’facă pănu tu bitisita-a anlui, am ava să spunu că lipseaşti s’avemu ngătanu, tru loc s’adrămu cu s’feaţi anlu ţi tricu, cându zburămu multu di multu ti aderari şi nu s-feaţi, cama ghini anlu aestu volea a noastră easti s’cilăstăsimu pi călliuri diplomatiţi existente s’băgămu niheamă zori, s’cilăstăsimu s’alăximu opinia-a guvernului ditu Austria şi la bitisita-a dzuuăllei s’avemu ună apofasi favorabilă. Toradioară nu agiumsi aclo. Minduescu că anlu aestu easti baş niheamă cama cu zori, di itia că himu tut ma aproapea di alidzerli tră Parlamentul European şi alidzerli ditu Austria, cari pari s’hibă influenţate di aestă temă a migraţiillei, promovată insistentu di canţelarlu austriac.

Austria ambudyiusi, tru andreu 2022, candidatura a României la Schengen, invocânda că văsilia a noastră ghi taha faţi parte ditu calea balcanică a migraţiillei paranomu. Stepsulu nu fu aprukeatu di administraţia di Bucureşti şi demontată oficial di instituţiile europeani, ntră cari Agenția Europeană tră Poliția di Frontieră și Garda di Coastă – Frontex.

Tru aestu kiro, ditu aţeali 27 di state membre ali UE, maş România, Vărgăria, Cipru şi Irlanda nu sunt parti ditu Schengen tru condiţiile tru cari aesta includi şi stati di nafoara ali Uniunii, cata cum Islanda, Norvegia, Elveţia şi Liechtenstein.

Autoru: Sorin Iordan

Armânipsearea: Taşcu Lala