Apofasi la summitlu NATO
Liderlli NATO, andămusiţ Vilnius, apufusiră să u simplifică aderarea ali Ucraină la Alianţă şi screască agiutorlu militar şi logistic dat a Kievlui, ama momentul aderarillei şi condiţiile cari va slipsească shibă ndreapti nica nu fură apufusiti.
Sorin Iordan, 12.07.2023, 19:33
NATO va niinteadză ali Ucraină călisearea ta sintră Alianţă atumţea cându membrilli a llei va shibă simfuñi şi cându va shibă tiñisiti criteriile di adirari, diclară secretarlu gheneral ali Organizaţie Tratatlui Atlanticlui di Nord, Jens Stoltenberg, tu bitisita a protăllei dzuuă a summitlui di Vilnius. Declaraţia yini tru contextul tru cari Moscova feaţi timbihi că aderarea ali Ucraină la NATO easti di mari piriclliu tră securitatea europeană, iar membrilli ali Alianţă spusiră ti Rusia că easti nai ma importantă şi directă fuvirseari la securitatea aliaţlor şi la irineaa şi stabilitatea a zonăllei euroatlantiţi.
Jens Stoltenberg: Năpoi u spusimu minduita că Ucraina va sagiungă membră a NATO şi nakicăsimu seliminăm căftarea mutrinda planul di acţiune tră aderarea ali Ucraină la Alianţă. Aestu lucru va u alăxească calea di aderare ali Ucraină, di la un proces tru dauă etape la unul ţi va shibă maş tru ună etapă. Tutunăoară, cundillemu că va slansămu ună căliseari aţea turlie ca Ucraina sintră tru NATO atumţea cându aliaţlli va shibă simfuñi şi cându va shibă tiñisiti condiţiile. Aesta easti ună pachetă vărtoasă tră Ucraina şi ună cale limbidă ti aderarea a llei la NATO.
Secretarlu gheneral cundille că pacheta di acţiuni ţi ari scupolu saducă Ucraina ma aproapea di NATO ari nica dauă elemente. Di ună parti, easti zborlu ti un nău program multianual di asistență tra sda izini ti tranziția di la standardile, instruirea și doctrinele ditu epoca sovietică la standardile NATO, tră sagiută la reconstruirea sectorlui di securitate și apărare şi tra sanvălească anănghiserli critiţi catacum combustibil, echipamente di deminari și consumabile medicale. Di altă parte, easti zborlu ti adrarea a unlui nău Consiliu NATO-Ucraina, cari saibă rol di forum tră consultări di criză și loarea-a apofasilor şi tru cadrul a curi reprezentanţii NATO şi a Kievului va sadună ca isalui hiinda.
Prezidentulu Klaus Iohannis spusi că România aşteaptă cu mare sinferu oara tru cari Ucraina va sagiungă văsilie aliată şi adusi aminti că summitul ditu capitala ali Lituanie ari mizie importante tră văsilia a noastră. Uidisită a aluştui, adoptarea-a planurilor di apărare regională easti un lucru di prota thesi cari va sda izini ti ună apandisi hăirlătică al NATO la dauă fuvirseri majore: Rusia şi terorismul.
Klaus Iohannis: România va va saibă ună anvărtuşeari a flancului estic. România va samintă un plan regional tră zona ali Amarea Lae şi România va saibă un plan multu concret tră brigada cari easti di cabaia kiro arădăpsită sum turlie di parei di alumtă, misuri multu importante. Şi minduescu că România va samintă nica ma mult, ună atenţie criscută tră zona ali Amarea Lae, inclusiv tră Moldova, cari easti multu vulnerabilă, ta snu zburămu ti catandisea ali Ucraina, tră cari himu adunaţ stogu su-agiutămu şi aştiptăm cu mare sinferu oara tru cari Ucraina sagiungă aliat.
Tutunăoară, prezidentulu ali Românie hiritisi acordul anamisa di Suedia şi Turchia şi spusi că aestu nsimneadză progresi multu aştiptate tru aţea ţi mutreaşti aderarea ali Suedie la NATO.
Autoru: Sorin Iordan
Armânipsearia: Taşcu Lala
