Grevă ghenerală tru nvițămintul preuniversitar
Elevllii româñi şedu, diznău, acasă, di itia că profesorlli suntu tru grevă.
Bogdan Matei, 22.05.2023, 18:18
După ţi pandemia di COVID-19 u mută online pridarea la clase și lu stuhină şi minti, añilli tricuț, unu ntregu bărnu di elevi, un nău cutreamburu agudeaşti nvețlu românesc. Elevllii armasiră, diznău, acasă. Sindicaliștilli ditu educație intrară tru grevă generală, niifharistusiţ di polititli cu tiñiili di cafi mesu şi sociale a guvernului PSD-PNL-UDMR. Ndrupără minarea cama di 150.000 di cadri didactiţi, la cari s’adavgă 60.000 – 70.000 di oamiñi ditu personalu didactic şi auxiliar. Elli spun că greva va s’ducă ninti până cându va lă si da di partea Executivului ună cearei ţi s’hibă pistipsită, cari s’da perspectivi multu limbidz tră ndridzearea problemelor a lor.
Tu kirolu a unei inflații cari, anlu tricut, ansări di 15 di proţente, di u criscu cabaia custusearea a bănaticlui, nai ma ndilicată problemă easti aţea cu păradzlli. Lidirlli sindicali caftă tiñii di cafi mesu di 4000 di lei tră un profesor dibutant și di 7000 tră unu ţi s’aproaki di bitisita a carierăllei la catedră.
Niifharistuseri aduc şi năili nomuri a nveţlui, promovate di ministrul di resort, Ligia Dica. Tru ţi mutreaşti bitisita a anului şcolar, programat, di arada, tru cirisaru, lidirii sindicali spunu că Guvernul easti aţelu cari lipseaşti s’da giueapi la aestă ntribari şi că armâne s’minduească disi va s’bitisească situaţiile elevilor. La muabeţli cu guvernanțăllii, prezidintulu ali Fediaraţie Sindicală Spiru Haret, Marius Nistor, diclară: Mini vreamu şi easti vrearea a tutăloru aţiloru cari lucreadză tru sistem s’nu nkisea aesta grevă generală. Nu noi vrumu aesta, vidzumu zori di agiumsimu aoa. Easti un cumul di niifharistuseri iara durata a llei ţăni di apandisea ţi va u da Guvernul şi, cadialihea, di vrearea a soţloru a noştri.”
Tru apandisi, premierlu Nicolae Ciucă spuni că (TRACK): Educaţia easti prioritatea a noastră, diadunu cu sănătatea. Putem s’aflămu cearei. Nu putem s’alăsăm cilimeañilli, tru prag di examen şi ninti di bitisita a anlui di nveţu, suspendaţ.”
Greva ditu sculii aduţi şi ambodyiuri politiţi. Tru scurt kiro, uidisitu cu protocoalili pi thimellilu a curi lucreadză coaliția guvernamentală, liberalu Ciucă lipseaşti s’alasă loclu di căpi la Executivu tră lidirlu PSD, Marcel Ciolacu, iara partidile s’adară ună redistribuire a portofoliilor. Ciolacu caftă, ama, curmarea a păzărăpserloru mutrinda yinitorlu cabinet până cându va s’hibă ndreapti căftărli a sindicatilor.
Presa di București luyurseaşti că niţi ună ditu tăburli politiţi nu easti hărsită s’u aibă căpia a Executivului, tru un moment tru cari și sindicaliștii ditu sectorlu sanitar dimăndă că ari căbilea s’dănăsească lucărlu, iara polițiștilli caftă și elli ndreptul ta s’facă grevă. Cari ţi s’hibă hroma politică a guvernanțălor, nica spun analiștilli, aești va s’diconteadză, orlea zorlea, niifharistuserli greali ditu societate tamam şi anlu ţi yini, cându tru România va s’ţănă alidzeri europarlamentare, locale, legislative și prezidențiale.
Autoru: Bogdan Matei
Armânipsearea: Taşcu Lala
