UE ndrupaşti Republica Moldova şi Georgia
Republica Moldova şi Georgia au agiutor financiar di la UE tră sectorlu di apărare.
Ştefan Stoica, 05.05.2023, 13:44
Consiliul a miniştrilor di externe ali Uniunii Europene vulusi un agiutor di 40 di milioane di euro tră sectorul di apărare ali Ripublică Moldova şi un agiutoru idyealui, di 30 di milioane, tră Georgia. Păradzlli ahărdziţ ti Republica Moldova yinu ditu fondul a Instrumentului European tră Irine, di iu easti finanţat şi agiutorlu militar tră Ucraina, iara păradzlli va s’hibă ufilisiţ tră misuri şi achiziţii neletale, cari anvărtuşeadză, ama, capacitatea di apărare a văsiliillei. Anamisa di aesti s’arădăpsescu lenu turlii di echipamente tră viglleari aeriană, tră transportu ică tră apărare contra atacurilor ţibernetiţi. Serviţiile finanţate spunu ti antrenamente tehniţi tră Armata Republicăllei Moldova. Eale crescu interoperabilitatea ali askeri a aluştui cratu şi u aproaki di standardile ufilisiti tru Uniunea Europeană tru domeniul militar.
Şeful diplomaţiillei europeane, Josep Borrell, spuni că Europa agiută ma largu văsilii cata cum Republica Moldova ică Georgia să-şi modernizeadză defensiva şi s’llia parti la misiunile militare ali Uniuni. Easti treilu agiutoru di idyea turlie ditu aeşţă 2 ani ditu soni, pritu cari Uniunea llia partenere aesti dauă văsilii tra s’asiguripsească stabilitatea şi securitatea tru regiune, tru condiţiili a fuvirsearillei arusească.
Di altă parte, Bucureştiul fu nicukira, tu giumitatea a stămănăllei, a unăllei andamasi trilaterală România-Statele Unite-Republica Moldova tru chestiuni di apărare. Loară parti şi reprezentanţi ai Ministerului britanic al Apărării. Secretarlu di stat tră politica di apărare, planificari şi relaţii internaţionale, Simona Cojocaru, spusi că, tru actualu contextu di securitate, generat di fuvirsearea arusă tru Ucraina, Republica Moldova easti expusă dinintea a fuvirserloru a hibridi şi campaniilor aruse di propagandă şi dizinformare. Tră România easti ună prioritate strategică agitarea a văsiliillei viţină ti anvărtuşearea a rezilienţei şi a capacităţilor di apărare, iara agiutorlu dimonstrat di România, Statele Unite şi Marea Britanie spuni limbidu că Republica Moldova nu easti singură tru aestu proces, cundille Simona Cojocaru.
Cooperarea bilaterală tru planlu a securitatillei şi ali Apărari eara tru arada a vizităllei pi cari u feaţi stămăna aesta, Chişinău, ministrul român ali Apărari, Angel Tîlvăr. El avut andamasi cu omologul a lui moldovean, Anatolie Nosatîi, şi fu astiptat di prezidinta Maia Sandu. Ministrul Tîlvăr năpoi spusi că România agiută Republica Moldova tru procesul di reformare ali Armată şi di creastire a rezilienţăllei apărarillei dinintea a unui spectru larg di fuvirseri. Maia Sandu spusi că România armâne un partener strategic tră anvărtusearea a capacităţilor di apărare şi di securitate naţională. Lidirlu di Chişinău haristusi ti agiutorlu a Bucureştiului tru imnaticlu european a văsiliillei a lui, inclusiv tră donaţia oferită cu scupolu ti făţearea ma buniu sistemlu logistic ali Armată.
Autoru: Stefan Stoica
Armânipsearea: Taşcu Lala
