Bugetul 2023, tru andreadziri
Proiectul di buget tră 2023 easti, tră prima oară, construit pi programe – declară premierul Nicolae Ciucă.
Roxana Vasile, 05.12.2022, 17:21
Cătă tru giumitatea a meslui andreu, româñilli va s’poată s’veadă cum va s’hibă tru or sta tru 2023 ditu videala financiară. Guvernul di București va tra s’bagă tru debatu publicu, deapoa, s’adoptă bugetlu di stat pi anlu yinitoru. Easti thimilliusitu pi ună isapi di creastire economică di 3% şi ari ca ţintă un deficit bugetar di 4,4%. Inclusiv di itia a polimlui di la sinuri, creaştirea di la Apărare va s’hibă nai ma marea după 1989 — 2,5 procente. Fură, ama, pruvidzuti creaştiri şi tră Educaţie, Transporturi, Agricultură ică Sănătate.
Bugetlu pi 2023 easti primlu construit pi programe economiţi și sociale, aţea ţi va s’da izini ti ună ma bună monitorizare a hărgiloru, a gradlui di implementare, ama şi a impactului real tru economie — să spusi la Guvern. Ma ghini spusă, bugetlu va s’da izini ti duţearea ninti a investiţiilor, inclusiv ditu PNRR, kivernisearea a deficitlui bugetar şi a inflaţiillei, identificânda, tutunăoară, izvurili financiare tră creaştirile a tiñiiloru di cafi mesu şi pensii ţi eara hăbărisiti.
Premierlu Nicolae Ciucă: ʺPot s’dau asiguripseri că, până tru giumitatea a meslui andreu, aşi cum zburămu tru călindari va s’avemu bugetlu aprobat tru Parlamentu. Tră atea băgămu tru proiectul “Ndrupari tră România”, misurli va s’ducă ninti şi tru anlu yinitoru. Tutunăoară, va s’aflămu alanti misuri pi cari putem s’li lomu tră cetăţeañilli vulnearabili.ʺ
Tru un interviu televizat, ministrul Finanţelor, Adrian Câciu, declara, tu arada a lui, că bugetul construit di programe easti ună alăxeari emu di paradigmă, cât şi di abordari: ʺ Dimecu, cara anlu aestu adrămu un buget tră anlu yinitoru pi programe, anlu yinitoru, iuva dupu meslu yismăciuni, va s’poţ s’vedz progreslu. Avumu un program, bun, ai ună apandisi, ari un efect pozitiv. Unu negativ lipseaşti s’hibă adaptat, lipseaşti alăxeari. Easti ună chestiune di normalitate, tră aţea că nu suntu păradzlli a ministrului di Finanţe ică a Guvernului ali Românie, sunt păradzlli a cetăţenilor.ʺ
Tru perspectiva-a vulusearillei proiectulu bugetar, Executivul lipseaşti s’adoptă ma multi acte normative, inclusiv ună ordonanţă cari reglementeadză, tră anlu yinitoru, ntră altili, nglliţări I crişteri di tiñii di cafi mesu. Concret, actul normativ pruveadi criştearea a tiñiiloru di cafi mesu ditu sectorul bugetar cu 10% andicra di andreu 2022, ama s’nu năstreacă, grila di salarizari. Alliumtrea, tiñiili di cafi mesu a demnitarilor armănu pi livelu ditu bitisita-a aluştui an.
Valoarea a punctului di pensie creaşti cu 12,5%. Pensionarlli cu venituri ma ñiţ di 3.000 di lei va s’hărsească di agiutoari date tru două tranşe, tru yinaru şi sumedru. Aţelli cu pensii di până tru 2.000 di lei va s’llia, tut tru dauă etapi, şi un agiutoru suplimentar tră păltearea a facturilor la energie. Va s’hibă criscută tiñia di cafi mesu minimă la 3.000 di lei ică nglliţatu punctul di amendă.
Autoru: Roxana Vasile
Armânipsearea: Taşcu Lala
