Andamasi parlamentară România – Rep. Moldova
Chişinău s-ţănu, sâmbătă, tru premieră, ună andamasi deadunu a Parlamentilor a Româniillei şi Ripublicăllei Moldova, cu mesaje di andrupari ti imnaticlu a llei tru UE.
Daniela Budu, 20.06.2022, 14:42
Maş dupu ună dzuuă di anda Comisia Europeană feaţi urminie a statelor membre ale Uniuni s’da ali Ucraină şi Ripublică Moldova statutlu di candidat ti aderarea la bloclu comunitar, Chişinău s’ţănu, tru premieră, ună andamasi deadunu a Parlamentilor a Româniillei şi Republicăllei Moldova. Băgămu, besă ma largu, pi, România, cari easti ună boaţi importantă tru instituţiile europene — să spusi Chişinău. Tru dişcllidiarea ali andamasi, prezidentulu moldovean, Maia Sandu, cari simnă nica ditu meslu marţu căftarea di aderare la UE, lugursi că dimandarea Comisiilei Europene easti un momentu important tră yinitorul a statului a llei şi nădia di cari au ananghi tuţ cetăţeañilli. Maia Sandu: România daima fu ningă noi. Ligăturli a noastre sunt adză pi nai ma analtulu livelu tru añilli ditu soni, neise tru aeşţă 30 di ani. Ghini ma, avemu nica multu lucru ti adrari şi experienţa şi expertiza a Româniillei nă fură şi va nă hibă ma largu di mari agiutoru.
Tu arada a lui, prezidentulu a Legislativului di Chişinău, Igor Grosu, năpoi spusi că Ripublica Moldova avu niacumtinatu agiutoru şi asistenţă nicondiţionată di partea a Româniillei. Igor Grosu: Pi hiotea a kirolui, România fu unu cadealihea andrupămintu ali Republică Moldova. Mănuclliulu a planurloru di lucru deadunu s’teasi multu pisti haractirlu tradiţional a născăntoru ligături di bună viţinată. Igor Grosu spusi, tutunăoară, că angajamentele ţi ş-li lo Republica Moldova mutrinda reforma ali justiţie, combaterea aruşfetillei şi asigurarea independenţăllei energhetiţi suntu limbidz şi va s’hibă băgati tru practico. Chișinăulu lo asiguripseri tră tut andrupămintul a Bucureștiului tră imnaticlu a llei european pritu boaţea a prezidentului a Senatlui, Florin Cîţu: Yinitorlu a Republicăllei Moldova easti tru marea fumealle europeană. Easti un dezidirat di thimelliu cum tră Republica Moldova, idyea şi tră România, pritu simasia a tricutlui, valorilor şi idealurilor cari nă spun că himu ună.
Şi prezidentulu a Camerăllei a Deputaţlor di București, Marcel Ciolacu, deadi asigurări că România ma largu va s’hibă deadunu cu statlu viţinu. El cundille ti acţiuni comune anamisa di aţeali dauă state, maxus ti hăirea a cetăţeañilor. Marcel Ciolacu: Yinitorul pe cari llu-andridzemu adză lipseaşti s’hibă deadunu. Iara aţelli cari caftă s’nă ţănă nanăparti cadelihea nu lă voru bunlu a cetăţenilor a noştri. Aestă construcţie deadunu ahurheaşti tamam di aoa, di Chişinău.
Andrupămintul a Româniillei tră imnaticlu european ali Republică Moldova şi anvărtuşearea a colaborarillei bilatearală tru tuti domeniile di activitate năpoi fu spus pritu ună declarație deadunu simnată tru bitisita ali andamasi. Tru document, aţeali dauă stati condamnă, tutunăoară, cu fermitate, fuvirsearea a Fedearaţillei Ruse contra ali Ucraină şi năpoi lu spunu andrupămintulu pănu di mardzină tră independenţa, suveranitatea şi integritatea teritorială ale Ucraină tru sinurli a llei pricănuscuti internaţional.
Autoru: Daniela Budu
Armânipsearea: Taşcu Lala
