Richard Nixon şi Gerald Ford Bucureşti

Dupu aproapea 20 di an’i di ligâturi multu arăţ, întrâ 1945-1947 şi giumitatea a an’ilor 1960, aţeali dauâ suţati militari şi aţeali dauâ sistemi di turlii politico-icunumiţi ama cari nu earau soaţâ, cumândisiti di SUA şi URSS câtâpâţea s-bâneadzâ deadun. Cathi parti câtâpâţea s-aibâ gesturi diplomatiţi icâ chiola s-adarâ îndoi paşi ta s-aproapchi şi s-treacâ di “gardul di sârmâ ghimpatâ”. România al Ceauşescu câftă s-dizgl’ieaţâ ligâturli cu SUA, vizitili a prezidenţilor american’i Richard Nixon dit 2-3 Augustu 1969 şi aţea al Gerald Ford dit ahurhita a meslui Augustu 1975 hiindalor seamni di mari simasii.

Ștefan Baciu, 15.06.2013, 13:41

Dupu aproapea 20 di an’i di ligâturi multu arăţ, întrâ 1945-1947 şi giumitatea a an’ilor 1960, aţeali dauâ suţati militari şi aţeali dauâ sistemi di turlii politico-icunumiţi ama cari nu earau soaţâ, cumândisiti di SUA şi URSS câtâpâţea s-bâneadzâ deadun. Cathi parti câtâpâţea s-aibâ gesturi diplomatiţi icâ chiola s-adarâ îndoi paşi ta s-aproapchi şi s-treacâ di “gardul di sârmâ ghimpatâ”. România al Ceauşescu câftă s-dizgl’ieaţâ ligâturli cu SUA, vizitili a prezidenţilor american’i Richard Nixon dit 2-3 Augustu 1969 şi aţea al Gerald Ford dit ahurhita a meslui Augustu 1975 hiindalor seamni di mari simasii.

Mircea Carp eara caplu a secţiei roâmneşţâ a postului di Radio Boaţea ali Americâ şi el vini deadun Bucureşti cu aţei doi prezidenţâ american’i. Carp lipsi s-fugâ zorlea dit Românii, dupu intrarea a reghimului comunistu, cu agiutorlu a sovieticilor. El nu fu maşi un martor ocular al vizitâl’ei al Nixon tu Românii, el cânâscu percepţia dit rândul a român’ilor mutrinda aţea vizitâ, aşi cum dzâsi tu un interviu ti Ţentrul di Isturii Oralâ dit Radiodifuziunea Românâ tu 1997: “Vizita al Nixon dit ahurhita al Augustu 1969 însemnă prota vizitâ a unui prezidentu american tu Românii. Fu, tutnâoarâ, un chiro di dişcl’ideari ti ligâturli româno-americani. Fu, tu idyul chiro, şi un momentu di dişcl’ideari a nâscântor nâdii tu rândul a român’ilor că aestâ vizitâ a prezidentului Nixon va s-agiutâ catandisea dit vâsâlii. Poati că furâ nâscânţâ cari s-minduirâ la unâ libirari ali Românii di sum ocupaţia comunistâ. Voi s-dzâc ţiva, maxus că ştiu câ tu dauâ croniţi, ţi furâ adrati mutrinda cartea mea fu aspusâ minduita că SUA alâsâ pi român’i s-pistipseascâ că vizita al Nixon poati s-însemneadzâ ţiva, chiola ţi unâ libirari icâ tu iţi catandisi, unâ bunâ îndridzeari a catadisâl’ei dit vâsâlii. Pot s-dzâc cu tut suflitlu, ama şi cu caimo, că niţi vârâoarâ, niţi Nixon, niţi Departamentul di Stat, niţi Ambasada americanâ di Bucureşti nu alâsarâ sâ s-veadâ ici că vizita al Nixon eara semnu di unâ bunâ alâxeari ali catandisi dit vâsâlii — maşi unâ alâxeari a ligâturilor dintrâ guvernili di Bucureşti şi di Washington.”

Richard Nixon fu apruchiat cu vreari tu capitala ali Românii. Fu dealihea un lucru di mari simasii, pi cari Nicolae Ceauşescu l-u pistusi ca hiinda un semnu di vreari andicra di popul. Mircea Carp ari şi unâ exiyiseari mutrinda purtata ţi u avu Nixon cu Ceauşescu: Maxus tu lin’ina aluştor nâdii fârâ di timel’iu, Nixon a fu multu aştiptat tu vâsâlii. In’I si deadi îndripati – dapoaia – la Ministerlu di Exteni dt Bucureşti: oamin’ii furâ dealihea hârsiţ di yinearea al Nixon şi inşirâ pi sucăchi vârâ un million. Tu moaubeţli dintrâ el şi Ceauşescu, moaubeţ ţi s-întimil’iarâ pi unâ simpatii al Nixon andicra di Ceauşescu. Nixon câtâpâţi tu unâ turlii politicâ s-ufiliseascâ România ca unâ trambulinâ cari s-lu agiutâ tu ligâturlii cu Moscova. Mini pistipsescu că prezidentul al SUA di atunţea, cu tutâ tin’ia, fu multu naiv maca putu s-pistipseascâ că Ceauşescu putea s-aibâ un rol ahât mari tu Moscova! Iţicum, ştiu sigur că aestu lucru fu un din furn’iili a vizitâl’ei a lui. Câ ţe lu apruchia ahât multu Nixon pi Ceauşescu? Dupu ţi nu amintă s-agiungâ prezidentul al SUA tu alumta electoralâ contra al John F. Kennedy, el avea agiumtâ “canâ” tu ţi mutreaşti politica. Cându câtâpâţi s-intrâ disnău pi puteari adră trei viziti tu Europa di Est : Varşovia, Moscova şi Bucureşti. Varşovia nu fu ghini apruchiat, Moscova ici nu-l mutri, ama Bucureşti Ceauşescu, simţindlui ţiva, îi teasi covorlu aroşu. Aestu lucru Nixon nu l-u agârşi canâoarâ. Iara apruchiarea lui Bucureşti fu ti el poati unlu dit momentili di nai ma mari simasii, nu politiţi, ama di publicitati, tu ligâturli a lui cu vâsâlili ditru xeani.

Dupu 6 an’i, succesorlu al Nixon, Gerald Ford, yinea tu Românii. Şi aestu lucru eara di mari simasii, ama nu ahât mari cât fu vizita dit 1969. Mircea Carp: Gerald Ford vini di Varşovia, ama ninti s-avea dusâ Helsinki, iu avea luatâ parti la marea conferinţâ ti Securitati şi Cooperari tu Europa. S-dânâsi Varşovia, iu fu paruchiat multu ghini, şi dapoaia Bucureşti, iu apruchiarea fu idyea, ama cama niham inferioarâ aţil’ei pi cari bucureşten’ii l’iu adrarâ al Nixon cu 6 an’i di dzâli ma nâinti. Avum atunţea informaţii că Ceauşescu şi oamin’ii di ninga el, cându şi-adusirâ aminti câtâ lumi avea inşitâ pi sucăchi, ţânurâ cama ascumtâ vizita. S-pari că nu furâ ma multi di 350-400 di n’ii di persoani, lucru cari eara importantu tu reghimlu comunistu, ama nu caşti ţi extraordinar. Cu aţea furn’ii român’ii nu furâ ahât hârsiţ, câ ţe aţei dit soni 6 an’i cât aveau tricutâ di la vizita al Nixon şi pânâ vizita al Ford aratarâ ca SUA nu vrea sâ şi-l’ia ma mari borgi dicât lâ lipsea a interesilor a lor di turlii politicâ mutrinda catandisea dit vâsâlii.

Întrâ dauli viziti al Nixon şi al Ford dit 1969 şi 1974, tu Românii s-vidzurâ îndauâ seamni di apruchiari întrâ dauli vâsâlii aflati tu sistemi politico-militari ahoryea. Aesti dit soni nu dusirâ la rezultati susto, câ ţe esenţa di turlii politicâ a reghimurilor eara şi ea ahoryea.