Tanke Schön
Dilema a tancurlor tră Ucraina s-ndreapsi. Ghirmănia aproaki pitritearea a “Leopardzălor” pi frontul ditu Ucraina, alti stati, cari avea ahtări mehanii va li pitreacă şi eali. Altă turlie nu s’putea, Ghirmănia adară şi livreadză aestu tancu şi alţă ţi li au nu pot s’li pitreacă că maş cu izinea a producătorlui. Până şi Canada va s’pitreacă ahtări tancuri, di pisti Ocean. Olanda nu ari tancurli ghirmani “Leopard”, tra s’li pitreacă tru Ucraina, ama dimăndă că va s’ancupără maxus ti aestu scupo. Americañilli nu au niţi elli tancuri ghirmani, au tancurli a loru işiş, cu numa Abrams, şi va li pitreacă și elli a ucrainenilor. Francezlli idyea va s’daraă, cu tancurli a lor, Leclerc.
Marius Tiţa, 29.01.2023, 18:53
Dilema a tancurlor tră Ucraina s-ndreapsi. Ghirmănia aproaki pitritearea a “Leopardzălor” pi frontul ditu Ucraina, alti stati, cari avea ahtări mehanii va li pitreacă şi eali. Altă turlie nu s’putea, Ghirmănia adară şi livreadză aestu tancu şi alţă ţi li au nu pot s’li pitreacă că maş cu izinea a producătorlui. Până şi Canada va s’pitreacă ahtări tancuri, di pisti Ocean. Olanda nu ari tancurli ghirmani “Leopard”, tra s’li pitreacă tru Ucraina, ama dimăndă că va s’ancupără maxus ti aestu scupo. Americañilli nu au niţi elli tancuri ghirmani, au tancurli a loru işiş, cu numa Abrams, şi va li pitreacă și elli a ucrainenilor. Francezlli idyea va s’daraă, cu tancurli a lor, Leclerc.
Lituanienilli, daima cu apala al Damoclesov pisupra caplui, pitricură, pritu ministrul a lor di externe, un agiocu di zboară cari anăkisi lumea, di agiumsi cadealihea ună grită di alumtă: Tanke schon! Spusimu di alumtă? Aşi fu aleaptă cu zborlu şi ministra germană di externe, Annalena Baerbock, tru ună declaraţie ti aprobarea germană tră re-exportul a tancurlor “Leopard 2”. Observaţia a llei, tru un cadru european, cum că lipseaşti s’nă alumtămu cu Rusia, nu anamisa di noi, unu alantu, ună ş-ună fu tulmucită à la russe ca ună declaraţie di polimu. Ică ca ună constatare a vărnăllei catandisi di polimu a lumillei occidentale cu Rusia.
Aţea ţi s’ascundi aoa easti polimlu di agresiune declanşat di Rusia al Putin contra a unui stat independentu, Ucraina. Nu easti ananghi di striducători specializaţ, acţiunea militară ali Rusie contra ali Ucraina easti simfună cu naima clasiţli spuneri a polimlui di agresiune. Ahâtu kiro câtu topili cad pi casili ditu locărli ali Ucraina, victima ari ndreptul s’caftă şi să’lli si da agiutoru.
Atea ţi caftă Rusia a comunitatillei internaţionali easti ca văsiliili civilizate şi democratiţi să s’priimnă fără gaile pi geadei tu kirolu anda Ucraina easti călcată ncicioari şi kisată cu goadi fără ñilă di ună haită preşcavă. Tru aesti văsili cari tiñisescu ndrepturile a omlui, nidarea asistenţăllei easti unu alathusu cutugursitu sertu di societate, cara nu, neise nica şi ună infracţiune.
Atea ţi caftă Rusia easti s’hibă alăsată să’şi facă di cap după idei personale, multu nfărmăcoasi, nica şi ca văr fănico, tră atelli di anvărliga ică atelli di năuntrulu ali Rusie. Ti atea, un tsunami di interpretări şi apostrofări s’azvurnuescu daima di cătă Moscova, cu nai ma serti şi greali opinii şi declaraţii publiţi. Raportarea la tricut poati să s’facă maş cara istoria easti multu ghini cunuscută. Tora, informația urdină aproapea ună ş-ună, cu un tilefunu mobil poț s’pitreţ nyie, tu lumea tută, un evenimentu, ună luyurie, un protestu, ună demonstrație, ună cumitie, ună apautruseari, bombardarea a niscăntoru blocuri di casi di oamiñi iriñeatiţ. Ună imagini faţi cât ună ñille di zboară, daima să spuni. Ună imagine tru minari, și cu iho, spuni tutu. Neise, năpoi arkişurămu cătă justificarea pi cari u dukeşti iţi omu di bună-dukimie. Ama catandisea easti limbidă, himu dinintea a unlui polimu di fuvirseari dupu tuti definițiile cunuscute iara di aproapea un seculu, polimlu easti interdzăsu ca ună hălati ti ndridzeari pruvlemili internaționale. Dealihea, tut di un secol să știe că nu ari nica un mecanism cari s’caftă tiñisearea a legislațillei internaționale mutrinda curmarea a polilui.
Prezența Rusillei ca membru permanent tru Consiliul de Securitate al ONU scoasi acutotalui organizația mondială ditu menga publică a aluştoru 11 di meşi, di când Rusia u agudi Ucraina. Cara tru ahurhită s’ari cilăstăsită ţiva pritu structurile ONU niambudyiusiti nica di votlu ali Rusiei, tru scurtu kiro organizația di New York agiumsi nihăirlătică şi agărşită. Tuti aestea nu nkeadică alanti văsilii, comunitatea internațională, s’da apandisi ti căftărli di anarmari vinite di cătă Kiev. Easti lucărlu golu ţi potu s’lu facă, s’agiută Ucraina s’dănăsească invazia arusă. Ti atea, căbatea arcată multi ori arada că pritu aestu agiutoru văsiliili democratiţi agiungu s’hibă parti la polimu nu poate s’hibă că maş ti arizili, maca yini di la agresorlu cari reproșeadză a cetățeañilor că nu easti alăsatu arihati s’facă polimu.
Autoru: Marius Tiţa
Armânipsearea: Taşcu Lala
