Arifugaţl’i olimpit
Una idee di Nobel fu lansată tru yinar şi thimil’iusita tru aesti dzali: la yinitoarili Agiocuri olimpiti va s-evolueadza una echipă internaţională a arifugaţlor. Echipa a atilor cari fudzira di sum hlamura şi di pi loclu a vasiliilor a lor tra s-ascapa bana va s-antreaca şi va s-defileadza sum hlambura olimpica. Sportivl’i arifugaţ va s-defileadza, Rio, sum hlambura a Comitetlui Olimpic Internaţional şi va s-intra tru arenă ninti di delegaţia a vasiliil’ei nicuchira, cari, tradiţional, ncl’idi parada a participanţalor. Uniforma a sportivilor dit echipa a Atleţlor Olimpit Arifugaţ u da tut Comitetlu, idyea cum si tuta asistenţa tra prezenţa a lor la antriteri.
Marius Tiţa, 07.05.2016, 19:03
Cându va s-alina pi podium, va s-hiba analţata hlambura olimpica şi va s-canta, tutunaoara, imnul olimpic. S-loara apofasili ananghisiti şi tuti suntu ndreapti atea turlie ca sportivl’ii ti suntu tru situaţia di nu pot s-l’a parti tu antriteri tra vasilia a lor, di furn’ia a polimlui, s-ndrupasca prit gaeretea a lor tra cauza olimpică. Toradioara suntu aflat 43 di sportivi di performaţă olimpică ti suntu tru situaţia tra s-hiba arifugaţ. Dimi, fleama olimpică fu purtată di un atlet arifugat sirian, sicat tru fanicadzl’I dit vasilia a lui şi aflat tru una taburi dit Gartia. Anotatoru di competiţie tru Siria şi judoka, Ibrahim Al-Hussein agioaca tutunaoara baschet tru fotoliul rulant.
U prilo fleama olimpică apreasă pi stadionlu Olympia, cum easti adetea, tamama di la prezidentul a Comitetlui olimpic elen, Spyros Kapralos, şi u purta vara 200 di meatri. Tu aestu kiro, fleama agiumsi tru Brazilia, aclo iu, la Rio, tru meslu agustu di estan, va s-dizvarteasca yinitoarili agiocuri olimpice. Tuti aesti realităţ suntu mplini di simboluri vartoasi, a dzalilor a noastri. Gartia s-ampuliseasti cu mari probleme economiti ama agiumsi loclu a ascaparil’ei tra dzat di n’l’I di oamin’i cari fug dit calea a polmlui şi u trec Amarea Meditearana pi vărtali a lahtarsearil’ei şi, di multi ori, a moartil’ei, tru cu nadia ta s-ascapa cu bana. Agiocurli olimpiti fitrusira tru Gartia antică tamam tra s-curma polimlu.
Cându atleţl’ii s-ampulisea tru arena a performanţelor sportive, polimili danasea. Antriterli olimpice fura anyeati, di Pierre de Coubertine, spune lumea, di greco-armânlu Evanghelie Zappa, u demonstram noi. Cum ti s-hiba, oficial eali ahurhira diznau tru 1896 ama nu apraftasira s-ncheadica vara polim dit ateali lahtaroasi cari u sândzinara dun’eaua di atumtea. Ti atea, ideea şi gaeretli a prezidentului di la Comitetlu Internaţional Olimpic, Thomas Bach, tra sa-l’I aduca pi atel’I ti nu au hlambura, arifugaţl’i, tru arena olimpică easti nu masi una idee di premiu Nobel tra irini ca şi una bagari tru lucru a nadiil’ei olimpiti, atea ca sportul şi irinea ss-azvinga polimlu.
Prezidentul olimpic Thomas Bach eara dus tru taburea di arifugaţ di ninga Atena şi lo parti la momentul di purtari a fleamal’ei olimpica di cătra sportivlu sirian, tora arifugat şi sicat di polim. Ninti di el, papa Francisc u vizita, deadun cu liderl’ii a baserical’ei ortodoxa dit Gartia, taburea dit hamunisia Lesbos, dimi una taburi di arifugaţ acutotalui. Problema a arifugaţlor agiumsi acută unaoara cu daldzali di oamin’i lahtarsit cari minduescu s-treacă Amarea Eghee, dit Turchia cata Gartia şi di aoa ma largu, cata vasiliili europeani etimi s-la ndreaga condiţii ma buni di bană nica si nadia ti armaneari tru bana.
Majoritatea suntu dit Siria ama tru multi alti vasilii, dimec di tuti continentili suntu conflicti di len turlii, a curi la cad victimă tut ma mulţa tivili nimintiţ tru ahtari polimi. Idealu olimpic ş-pripuni s-nastreaca aestă catastisi di fapti, cu halat isisi, şi s-da a sportivilor şansa pi cari polimlu canda la u avea loată.
Armanipsearea: Tascu Lala
