Prinţul Nicolae Doilu
Monarhia ari, tru România, una istorie di un secol ş-giumitati şi, si 4 vasil’eadz. Carol l, timil’iusitorlu ali dinastie, eara dit fumeal’ea Hohenzollern-Sigmaringen, cu multi capiti alinati pi tron, ama el işisi nu s-aştipta s-hibă varaoară vasil’e. Dumni aproapea una giumitate di veac, aducândalui România tru arada a vasiliilor europene moderne, etimi tra secolu XX. Vini pi scamnu deapoa Ferdinand, hil’ilu a fratilui a lui, căte nas nu avu clirunomi. Dit ahurhita, dinastia vasilikeasă românească avu probleme cu succesiunea. Succesorlu al Carol eara fratili a lui, Leopold, ama aestu trapsi mana di la tronlu ali Românie tru favoarea a hil’ilui a lui ma mari, Wilhelm. Tru 1886, Wilhelm tradzi mana di la Coroana ali Românie prit una carti urneki di introspecţie, namuzi, responsabilitate şi tin’ie.
Marius Tiţa, 15.08.2015, 19:03
Aşi că la succesiuni vini fratili a lui, Ferdinand, cari alina scamnul dupu protlu vasil’e ali Românie, Carol l. Ferdinand fu aleptu clirunom a tronlui tru 1888, ama agiumsi vasil’e tru 1914, tru kiro greu dit ahurhita a Primlui Polim Mondial. Tru aest kiro s-ndreapsi pan di mardzina şi cu maximă seriozitate tra marli borgi ti li avea dininti. Dumni până tru 1927 şi easti supranumasit Intregitorlu, cate alăsă una Românie tru cari bana tra prima oara nai ma mulţa ditru români. Andicra di lala-su Carol l, Ferdinand avu ma mulţa cilimean’i ditru cari, atel ma mari, Carol, eara aleptu să-l’i l’ia torlu pi tron. Di furn’ia a nascantor aventuri galante cari alu fac pi Carol să-şi abandoneadza borgili di yinitor vasil’e ali Românie, Ferdinand lu dizmuneaşti pi hil’lu atel mari, lu da nanaparti di la succesiunea la tron tru 1925.
Ferdinand moari dupu masi 2 ani, ase că pi tron alina nu Carol, ca hil’ilu a lui, nipotlu al Ferdinand, Mihai, cari avea masi 5 ani tru oara cându al’i bagara caruna. Agiumsim, ama, pi isapea, că istoria ti succesiunea regala tru România nu easti ici simplă. Tru 1930, Carol, cu agiutorlu a nascantor vartosi oamin’i politit, lu detroneadză hil’ilu cari avea umpluta 8 an’i, şi si agiundzi vasil’elu Carol ll-lu, cu una dunil’e neconvenţională di tamama 10 an’i. Abdică tru 1940, alăsândalui tronlu a hil’lui a lui, Mihai, cari avea tora 19 di ani, şi România fuvirsita di cata tuti părţale şi cu un irec dit teritoriu chirut prin ultimatumuri. Mihai dumni tra a daua oară, tut la una ilikie tiniă, tru un kiro infernal atel a Doilui Polim Mondial, sum dictatura pro-fascistă a mareşalui Ion Antonescu, cari s-avea proclamata Cumandar a statlui, cu armata angajată tru polimlu cu una Uniune Sovietică pan di mardzina şi inepuizabilă.
Tru 1947, cându al’i si baga zori s-abdica di catra naua puteari comunistă adusă di tancurli sovietiti, tinirlu vasil’e Mihai I ali Românie nu eara ncurunat, nu avea succesor la tron. Vini deapoa nica una altă perioadă di aproapea giumitati di secol tru cari tru România dumni comunismul. După revoluţia anticomunistă dit Andreu 1989, tru cari tinirl’ii ş-deadira bana tra libirtati, a vasil’elui Mihai nu al’i si deadi izini tra s-veada diznau patrida cate ma ninti al’i si avea bagata zori s-fuga dit ea. S-toarna, legal, prima oara, tru 1992 şi yini deadun cu nipotlu a lui, Nicolae, hil’ilu a featil’ei ma n’ica di dauli ti li avea. Prinţul di atumtea eara un cilimean englez di 7 ani cari aminta inimile a românilor cari avura ma nijnti un prinţu cu aesta numa, Nicolae, frati a vasil’elui Carol ll-lu.
Tru 2010, vasil’elu Mihai, şef a Casal’ei Regala dit România, lu aleapsi tinirlu Nicolae ndreptul clirunom a Carunal’ei, după prinţesa moştenitoare Margareta, hil’ea a l’ei ma mari. Tuti eara canda bagati pi arada şi cursiv, tinrlu prinţu lucra cu hairitra s-aminta kirolu pi cari nu lu avea ndreapta tra nobila şi istorica misiune, atea tra s-agiunga, după tetă-sa, Margareta, şeflu Casal’ei regala di România. Tru prima dzuua a alustui mes, ama, vasil’elu Mihai lo una apofasi dimandata amanat, cari na pitricu la pildile a istoriilei tra monarhia româna, tru cari, aşi cum spuneam, niti vuna succesiune nu fu afirita di probleme. Vasil’elu al’i trapsi a prinţului Nicolae titlurli princiari şi lu scoasi şi dit linia di succesiune la tronlu ali Românie.
Ca un kirit pi ter sirin cadzu aesta habari! Explicaţiile cari vinira deapoa eara di len turlii, di la stepsuri personale, la stenarii ditru nai cama ndilicati şi subversive. Prima declaraţie a prinţului na da, ama, şi explicaţia tra aesti evoluţii, una normală, firească, uminească. La 30 di ani, toar ayon’ea umplui, Nicolae akicasi că borgea tra cari s-ndreadzi easti multu greaua, cabaia greauâ, iara inima a lui nu easti lşoară tra s-lu aiba aestu rol. S-cundil’em maturitatea tru mindueari, puterea tra s-l’ia aesta apofasi istorica şi borgea ahoryea ti u spusi dininti di apufusi aestu lucru.
Autor: Marius Tiţa
Armanipsearea: Tascu Lala
