Ma mărli evenimenti a stămânăllei ţi tricu 13.11 – 19.11.2022
Reacții după incidentul ditu Polonia
Corina Cristea, 19.11.2022, 17:22
Reacții după incidentul ditu Polonia
România easti acutotalui solidară cu Polonia tru aesti momente multu greali şi, tru idyiul kiro, spunemu puryurii ti ateali dauă victime umineşti, cari alănciră, ti amărtie, dupu aestu incidentu, pitricu Bucureştiul ti Varşovia, la scurt kiro după exploziile di marţă, di la sinurlu cu Ucraina. Polonia alină nivelul de alertă la niscănti unităţ militari, iara, ună dzuă ma amănatu, ambasadorlli NATO s-andămusiră, la căftaria ali Polonie, tru virtutea Articolului 4 ditu Tratatlu ali Alianță.
Nu avem niţi unu semnu că Rusia ndreadzi ună atacă delibearat contra NATO – declară secretarlu general ali Alianță, Jens Stoltenberg, după andamasea de urgență. Uidisitu cu oficialu, explozia s’feaţi după ţi Rusia lansă ună atacă babageană cu rachete contra ali Ucraină. Ditu ahuhrita a poimlui paranomu ali Rusiei tru Ucraina, NATO ș-ari criscută vigilența pi flancul estic și monitorizăm situația – adăvgă Jens Stoltenberg.
Alianța ma largu ş-lu anvărtuşeadză flancul estic. Tru România agiumsi, tru aestă stămână, daua cărvani cu tehni militară franceză, constândalui tru ună companie de tancuri Leclerc, cari agiumsi tru giudeţlu Braşov. Aestă turlie di tanc easti lugursită multu cu hăiri tu alimta terestră, cu ună axie tra s’agudească cu precizie ţinte di la 4.000 de metri distanţă. Cărvanea militară faţi parteiditu ateali dzaţi tăxiti di Franța a Bucureștiului, cu scupolu s-lu anvărtuseadză flancul estic al NATO. Prota cărvani, cu transportoari blindate, agiumsi tru România pi 23 di sumedru. Franţa dimăndă că va s’pitreacă la baza militară di Cincu, tut cu tut, aproapea 150 de vehicule di alumtă cu armamentele, bărutea şi echipamentele aferente.
România, tut ma aproapea de Schengen
Comisia Europeană căftă a Consiliului s’llia apofasili anănghisiti, fără niţi ună amănari, tra s’da izini ti adeararia mplină ali României, Bulgariei şi Croaţiei la Spaţiul Schengen. Tu ligătură cu România, Executivlu comunitar cundille că văsilia ari un management vărtosu şi di analtă calitate a sinurloru şi easti mintită tru coopeararea internaţională tru materie di poliţie di sinuru. Ma multu, easti activă pi dauă fronturi prioritari: combaterea a migraţiillei paranomu şi a traficlui de hiinţi umane. Tru aţea ţi mutreaşti tiñisearea a ndrepturilor fundamentale, România ari structuri hăirlătiţi tra s’garanteadză accesul la protecţie internaţională, cu tiñisearea a principiului niturnarillei, cundilleadză Executivlu comunitar. S’aşteaptă ca problema ti aderarea a aţiloru trei state la spaţiul de libiră urdinari s’hibă băgată ti votu tru Consiliul UE, la ahurhita a meslui andreu, ti ună apofasi pozitivă hiinda ananghi unanimitatea. Tru aestă stămână, ună nauă parei mixtă di experţă ali Comisiei şi a niscăntoru state membre, ntră cari şi Olanda – cari s-ncuntră constantu ti aderarea invocânda chestiuni ditu sfera judiciară – vini tru România tra s’evalueadza catandisea a ndridzearillei ti aderarea la Schengen.
Date mutrinda economia ali Românie
Economia ali României criscu tru toamna alustui an, ama tu un rotmo mai ayălisitu, spunu datili publicate tru aestă stămână de INS. Aestea scoasiră tru videală ună creastire cu 4% tru trimestrul al III-lea andicra di idyea perioada ditu 2021. Easti nai ma analtă creaştire economică ditu Uniune raportată la trimestrul anterior, la egalitate cu aţea nregistrată de Cipru, alanti state consemnânda creaştiri ţi suntu sumu un procent ică baş tru scăderi.
Premierlu Nicolae Ciucă da asiguripseri că România nu easti tru piriclliu s’intră tru recesiune economică şi spuni că datili di tora spunu multu limbidu că ari premisa ca la bitisita a anlui România s’aibă ună creastire economică anvărliga di 5%, iara ti anlu yinitor ună creastire economică anvărliga di 1,5%.
Şi guvernatorul BNR, Mugur Isărescu, declară cu pistusini că economia României va s’nregistreadză anlu ţi yini maş ună ayăliseari a creastirillei şi nu ună recesiune tehnică, sumliniinda, ama, că aesti evoluţii ţănu di axia a Guvernului tra s’aducă păradz europeni. Banca Națională, cari prezentă Raportul trimestrial mutrinda inflaţia, u criscu la 16,3% prognoza alestui indicator ti bitisita a aluştui an şi la 11,2% ti bitisita a anlui yinitoru, a deapoa tru yismăciuni 2024 inflația s’ñîcureadză la aproapea 4%.
A daua rectificari bugetară di estan
Guvernul di Bucureşti aprobă gioi a daua rectificari bugetară di estan, ahărdzinda fonduri suplimentari tra s’anvălească hărgili obligatorii, aţeali di bună funcţionari, păltearea a tiñiiloru di cafi mesu şi hărgili di asistenţă socială. Tru aestu proiect s’vedu şi fondurile anănghisiti emu ti dizvărtearea a proiectelor europene, emu ti buna funcţionari a tutulor instituţiilor a statului, până la bitisita a alustui an. Nai ma mulţă păradz llia Ministerele Finanţelor, Muncii, Agriculturii şi Economiei. Uidisitu cu proectulu adoptat de executiv, keru păradz instituţii-clleaie, cum suntu Ministerele ali Energie, Ministerlu di Interne, Ministerul a Sănătatillei şi aţelu a Transporturilor.
Cristina Neagu — nai ma bună marcatoari ditu istoria Campionatelor Europene de handbal
Dauă agiucătoari române, Cristina Neagu şi Crina Pintea, fură nominalizate tru ancheta cari apufuseaşti echipa ideală a Campionatlui European de handbal feminin ditu aestu an, competiţie a curi nicukiră fu Macedonia de Nord, Muntenegru şi Slovenia şi cari va s’bitisească dumănică. Cristina Neagu easti pripusă ti postul de inter stânga, iara Crina Pintea candideadză ti postul de pivot. Neagu dimăndă, gioi, că ediţia di anlu aestu a Campionatului European fu atea ditu soni tru cariera a llei şi că nu s-bitisi aşi cum avea miraki, după ţi echipa bitisi turneul final pi loclu 12. Dupu bitisita a turneului final, avănda 303 goluri, Cristina Neagu agiumsi nai ma bună marcatoari ditu istoria Campionatelelor Europene, emu la feminin, emu la masculin.
Autoru: Corina Cristea
Armânipsearia: Taşcu Lala
