Ma mărli evenimenti a stămănăllei ţi tricu 17.10 – 23.10.2021
Năi restricții anti-Covid la orizontu
Roxana Vasile, 25.10.2021, 20:29
Europa easti goala regiune ditu lume cari nregistreadză ună creastire a numirlui di lăndzidzări di Covid-19. Iara România nu faţi excepție! Stămâna aesta, nregistră, cathi dzuuă, recordu după recordu di ñilli di infectări și suti di morţă. Tru spitali numata sunt locuri tră atelli cu turlii severi di lăngoari. Tutu ma multi localităţ năstrecu rata di infectare di 6 cazuri la nillia di bănători. Intereslu a românilor tră vaccinare a criscu, iara la aestă bitisită di stămănă, București, easti organizat un maraton di vaccinari.
Nica și ași, numirlu a persoaniloru cari feaţiră schema completă di seru anti-Covid easti lugursitu ñicu. Tru tutu aestu contextu, Organizaţia Mondială a Sănătatillei apufusi s’pitreacă ună delegaţie tru România. Agiutoru tru yitrii, aparatură ică personal medical vini și ditu Europa, ditu Olanda, Polonia, Italia, Danemarca ică Republica Moldova. Austria și Ungaria prillia paciență ţi lipseaşti să-lli nutrească tru spitalele lor. Pi aestu fond, caplu a văsiliillei, Klaus Iohannis, cutugursi ma multi ori arada tră ixikea di reacţie şi pasivitati, pricunuscu că pregătirea tră dalga patru a pandemiillei fu dificitară, iara campania di vaccinare s-feaţi multu ayalea ayalea. Gri, ñiercuri ună andamusi cu responsabilii guvernamentali, tră apufuseari niscănti meatri restrictive cu titlu di prevenție, ama și di coerciție.
Vaccinarea easti goala cearei tră curmarea-a pandemiillei – spusi, după andamasi, prezidentulu, cari declară că sunt ananghi apofasi ntrăoară ti loari cari s’ducă la ñicurarea pi şcurtu kiro a mobilitatillei şi interacţiunillei umani. Misurli va s’bagă tru practico di luni — dimi va s’hibă restricţionată urdinarea tu kirolu di noapti, iara dzuua, la majoritatea a activităţlor accesul va s’hibă permis maş cu certificatlu veardi. Purtarea a prusupidăllei di protecţie va s’hibă obligatorie iuţido, emu năuntru, emu nafoara a locurloru, iara elevlli ditu tuti ţiclurli di nvițămintu va s’intră tru vacanţă kiro di dauă stămâni.
Un nău premieru aleptu
Prezidentulu Klaus Iohannis simnă, gioi, apofasea mutrinda alidzearea a generalului di armată tru rezervă Nicolae Ciucă, di partea a PNL, drept candidat la funcţia di prim-ministru. Hăbarea vini tru bitisita-a consultărlor cu partidile parlamentare, cu scupolu apufusitu că barimu actuala criză politică, para diplusită pisti atea sanitară și creaștirea a păhadzloru la energie, să s’bitisească.
Cu ună dzuuă ninti, prima alidzeari faptă di prezidentu tru persoana a liderlui USR, Dacian Cioloş, nu lo acceptul a Legislativului. Niţi, cadealihea, echipa guvernamentală exclusiv useristă minduită di aestu! Să amintim că arcul guvernamental format ditu PNL, USR și UDMR s-a distrămat tru septembrie ditu cauza conflictului ditutre USR și premierlu liberal, tru aist kiro interimar, Florin Cîțu. USR votă, deadunu cu Opoziția, ună moțiune di cenzură la adresa a Cabinetlui armas minoritar PNL-UDMR, moțiune cari tricu. Useriștii dzăsiră ca va s’toarnă la guvernare maş cara va s’fugă Florin Cîțu, ama, până tora, iţi minduită ti xanaamintari a coalițiillei nu scoasi ici ţiva mbuveti.
După disemnarea, fără hăiri, a liderlui USR tu harea di candidat la funcția di prim-ministru, vini arada, tora-a ministrului ali Apărari ditu guvernul demis al Florin Cîțu, liberalu Nicolae Ciucă, s’adara ună echipă şi s’cundilleadză un program di guvernare. USR va, ma largu, xanaamintarea a coaliției, ama PNL va un Executiv minoritar cu UDMR, eventual cu andruparea-a PSD, di opoziție, nai ma mari formațiune ditu Legislativ, demersu pi cari electoratili a respectivilor partidi nu îl vedu cu oclli buñi. Ta s’hibă nica ma ndilicati lucărli și cama multu tră liberali, fostul a loru prezidentu, Ludovic Orban, ș’deadi dimisia ditu gruplu parlamentar al PNL, spunânda că nominalizarea al Nicolae Ciucă, băgatu cu căftarea maxusu a prezidentului Klaus Iohannis, easti kicuta cari a umplu kelkea.
Păhadzlli la energhie, cătă iu?
Păhadzlli criscuţ la energie ampărţără tru dauă tăburii liderllii a statelor membre ale Uniunii Europene, reuniţ Bruxelles tru un Consiliu informal. Ună parte cundilleadză tră ună intervenţie vărtoasă tră scădearea a păhadzloru, alțăllii lugursescu că meatrili pripusi, di Comisie sunt duri tră atea ca europenii s’treacă iarna, cu argumentul că piaţa va s’agiungă la normal tru primăvară. Tru România, Senatul adoptă, săptămâna aesta, ună ordonanță di urgență uidisitu cu cari păhadzlli la energie electrică şi gaze naturale tră consumatorii casnici va s’hibă plafonaţ și compensaţ până tu bitisita a meslui martu. Tutunăoară, consumatorii vulnerabili va s’poată s’amănă, cu căftari, cu şasi meşi păltearea a facturilor. Şi tră IMM-uri s-ñicură TVA-ul di la 19 la 5% şi s-apufusi că aestea va s’hibă exceptate di la păltearea a certificatelor verdzi şi a acciz4llei. Ordonanţa va s’hibă băgată ti votari şi tru Camera a Deputaţilor, for decizional.
Vizită pi livelu analtu
Bucureștiul apruke, săptămâna aesta, vizita a secretarului american al Apărării, Lloyd Austin. Cu aestă furñie, oficialu di Washington declară că securitatea şi stabilitatea a regiunillei riverane ali Amari Lae easti parti a intereslui naţional a Statelor Unite şi sunt esențiale tră securitatea a flancului estic al NATO. La convorbirile cu prezidentulu Klaus Iohannis şi cu omologlu a lui interimar, Nicolae Ciucă, şeful a Pentagonului, Lloyd Austin, tăxi că SUA va ş’ducă ma largu asistenţa tră anvărtuşearea a axiillei maritime ali Românie.
Autoru: Roxana Vasile
Armânipsearea: Taşcu Lala
