Protili evenimenti a stamanal’ei ti tricu
România ari un nou Guvern
Roxana Vasile, 01.07.2017, 15:05
România ari un nou Guvern
Naulu Guvern PSD-ALDI di Bucureşti cumandusitu di Mihai Tudose lo, gioi, votlu di nvestitură a Parlamentului, deapoa deadi giuratlu dinintea a prezidentului a vasiliil’ei, Klaus Iohannis. România ari ananghi di un Guvernu tru catastisi di alertă, cu ciastiseari tra performanţă, a deapoa naua parei lipseasti s-anvaleasca amanarli a precedentului Executiv, ahtari turlie câ obiectivele ti s-li lo pritu programlu di guvernari s-hibă tin’isiti – declara Mihai Tudose: “România easti tru un momentu economic bun. Avem creaştire economică, avem creaştiri tru industrie, avem creaştirea a amintatitloru, una creaştire a consumlui. Atea ti nica avem ananghi easti una creastiri sanatoasa a investiţiilor şi una creaştire a amintatilor la buget.” Prezidentul Klaus Iohannis nu u afiri ici coaliţia ti easti la puteare, cari, niifharistusită di fostul a l’ei Executiv, alu deadi mpadi prit una moţiune di cenzură la niti şasi mesi di cându ş-avea intrata tru pâni, di u catugursi ti ixichea di rezultate tru bagarea tru practico a programlui prit cari social-dimocraţl’ii avea amintată, tru iarnă, nomurli legislative.
Şeflu a statlui scoasi tru videala că, unaoara cu alidzearea a naului Guvernu, PSD şi ALDE, andrupat di UDMR prit un protocol di colaborari parlamentară, alaxira programlu di guvernari. Klaus Iohannis: “Tru şasi mesi, alaximu di la n’icsurari di taxe la bagarea diznau a taxiloru, di la crişteri di tin’ii di cafi mes la taxa di solidaritate. Un ahtari purtaticu cadealihea ca nu angreaca tru atea ti mutreasti predictibilitate fiscal-bugetară. Tin’isiţ PSD-işti, ALDI-işti, UDMR-işti, tru numa a român’ilor, vă placarsescu s-bitisiţ cu aestă ansareari fiscal-bugetară.” Prezidentul Iohannis al’i cafta a naului Guvern cumandusitu di Mihai Tudose s-hibă solidar cu român’il’i şi s-guverneadza responsabil, ahtari turlie câ România s-agiunga cu isapea tru marja di deficit di 3%, s-veagl’e şi s-promoveadza statlu di drept ica să-şi tin’iseasca angajamentul andicra di NATO tra s-ahardzeasca 2% dit PIB tra Apărari.
Nomlu tra tin’ia di cafi mes unitara, promulgat
Atea dit soni criză politică di Bucureşti al’i feati pi mulţa s-aiba asparizma că nomlu tra tin’ia di cafi mes dit sistemlu public va s-hiba tricut, una kiro, tru surdină, a deapoa bagarea tru practico va s-hiba amanată. Nica s-ma multu! Fudzearea a precedentului Cabinet social-democrat cumandusitu di Sorin Grindeanu, artizanlu a aistui actu normativ, şi perspectiva cu cabili ti alaxeari cu un di una altă hroma politică al’i feati pi multa dit arada a atilor fara di nadie să zburască di eventualitatea ca s-traga mana di la un ahtari nom cu hairi mari tra un numir semnificativ di români. Asparizma a tutulor fu aspulibirata tru oara candu s-dimanda că prezidentul ali vasilie, Klaus Iohannis, alu promulga. Tru un comunicat ali Administraţie Prezidenţiala s-cundil’eadză că şeflu a statlui andrupasti ananghea tra criştearea, tru una turlie sustenabila, a amintatitlor a tin’iilor di cafi mes a personalui păltit dit fonduri publiti, ti fatearea ci hairi a nivelui di bana a lor. El cundil’eadză, isa, isa, că easti responsabilitatea a PSD şi ALDE s-asiguripseasca dezvoltarea echilibrată şi s-concilieadza scupolu tra creaştire a amintatitlor cu atel di taneari tru idyea scara a stabilitatil’ei macroeconomice şi bugetari ali Românie. Nomlu tra tin’ia di cafi mes dit sistemul public pruveadi creştirea a tin’iilor di cafi mes, tru yinitorl’i titnti an’i, cu 50% s-cama tru medie. Actul normativ easti, ama, cutugursitu di patronate, ama şi di sindicate.
Dosarlu a alidzerlor prezideţiale dit 2009, clasat
Parchetlu Genearal alu clasa, marţa, dosarul a alidzerlor prezidenţiale dit România, dit andreu 2009, câte nu afla asi spusi fapti paranom di abuz tru serviciu, di falsificari a documentelor şi a evidenţilor electorale. Dosarlu fu discl’is după ti jurnalistul şi consultantul politic Dan Andronic spusi că ma mulţa analţa demnitari, ntra cari fostul procuror general ali Românie, Laura Codruţa Kövesi, şi fostul general SRI, Florian Coldea, vahi eara prezenţa, tru seara turlui doi a prezidenţialelor, tru casa a fostului vicepremier, Gabriel Oprea, şi vahi ari agiutata la victoria al Traian Băsescu. Aestu aminta doilu mandat, după victoria la limită dinintea al Mircea Geoana. Ma mulţa oameni politit, cari avea tru 2009 funcţii tru statul român, fura audiaţ di procurorii a Parchetlui General. Tutunaoara, anchetatorii caftara documente di la instituţii ale statului ntra cari Autoritatea Electorală Permanentă şi Serviciul di Telecomunicaţii Speciale. Alidzerli prezidenţiale dit 2009 fac, tru aestu kiro, obiectul şi a unei ancheta parlamentara.
România easti sum asediul can’inal’ei
Nică di stămâna ti tricu, can’ina zn’iipseasti una bună parte a Europei, iara România nu fati excepţie! Una dalga di căldură treati pisti vasilie, di n’iercuri intrândalui tru practico un cod galbin di can’ină şi disconfort termic tra 12 di giudeţe dit vest, sud şi centru, cu maxime termice anamisa di 33 şi 36 di gradi Celsius. Di gioi, multi giudeţe tricura preayalea ayalea, la cod portocaliu, maximele agimsira la 40 di gradi. Tra sâmbătă, meteorologii apufusira nica si un cod aroşu local aferent a valorilor a aerlui di până la 44 di gradi Celsius tru aumbră. Cama di 800 di ambulanţe şi aproapea 300 di autospeciale a Serviciului mobil di urgenţă, rean’imari şi discarcearari (SMURD) fura ndreapti tra interventie, la nivel naţional, tru caz di ananghi. Bucureştiul easti tuchi, şi el, di can’ină. Idyea cum anlu ti tricu, Primăria a Bucureştiului dimanda că instaleadză aproapea 20 di corturi antican’ină, cu personal medical, aer condiţionat, apă, trusă di prim-agiutor şi yitrii ananghisiti tra cetăţean’il’i cari pot s-aiba ananghi tra s-hiba mutrit.
Autor: Roxana Vasile
Armanipsearea: Tascu Lala
