Eveniment Top – 30.01.2016
Raportu MCV bun ti Românii
România Internațional, 02.02.2016, 12:45
Ti treilu an un dupu alantu, România avu unâ evaluari, bunâ, pozitivâ di partea ali Comisii Europeanâ mutrinda Mecanismlu di Cooperari şi Vigl‘ieari, lucru ți aspuni buna imnari, lucrlu ambar tu proțeslu di alâxeari a sistemului giudițiar şi tu alumta contra a arușfetâl‘ei.
Anlu ți tricu, DNA pitricu tu giudecatâ cama di 1.250 di oamin‘i, prit ei și premierlu Victor Ponta, minişțrâ di ma ninti, parlamentari, primari, prezidențâ di consilii giudețeani, giudicâtori,, procurori şi ma mulțâ analțâ funcţionari — s-dzâți tu raportlu adrat di executivlu comunitar.
Rezultatili buni inșirâ maxus ș-cu agiutorlu a profesionişțâlor dit sistemlu giudițiar și a bâgarâl‘ei tu practico a Codurilor Penal şi di Proțedurâ penalâ, ama ș-ti ațea că executivlu deadi, la chirolu uidisit, oamin‘ii și resursili finanțiari ți lipseau, dzâți ministurlu di Giustiții. Raluca Prunâ minduiaști că evaluarea da cali a Bucureştiului ta s-aibâ aştiptări ligati di scutearea a MCV-ului tu apruchiatlu yinitor: Ari lucri multu limpidz ți aspun ca tu chirolu ți s-aproachi, aestu mecanismu s-nu mai hibâ lipsit, lucru ți va-l veadâ Comisia Europeanâ, autorităţli români, soțietatea și la general tuti Comisiili.
Comisia giudicâ, ama, Parlamentul di Bucureşti, ti ațea că da avizi negativi a nâscântor câftări viniti di partea ali giustiții, mutrinda mutarea a imunitatâl‘ei a alepțâlor cu problemi di turlii legalâ, ama fârâ s-aspunâ câ țe.
Politicien‘i roman‘i, tu giudicatâ
Biroulu Permanentu a Senatlui ali Romanii pitricu, N‘iercuri, ali Comisii giuridicâ, actul DNA mutrinda ahurhearea a câftarâl‘ei penalâ andicra di ațel di ma ninti vițepremier şi ministru di Interni, Gabriel Oprea. Aestu dit soni câftă a soțlor a lui senatori s-aproachi ahurhearea aluștui proțes, spunândalui că nu va s-hârseascâ di imunitatea parlamentarâ, hiindalui sigur di ațea ca nu ari niți vârâ câbati.
Al Oprea îi si aduți câbati di dauâ infracţiun‘i di abuz tu lucru tu chirolu cându avu di ministur. El ari ufilisitâ resursili umani şi finanțiari a Ministerlui di Interni ta s-asiguripseascâ, paranom, imnărli, căl‘iurli adrati di ministur cu echipaji dit poliția rutierâ. Tut stâmâna aestâ, deputatlu PSD Ion Stan fu pitricut di Analta Curti di Casaţii şi Giustiții la doi an‘i di hapsi ti infracţiunea di trafic di influenţâ – îi si aduți câbati că ari luatâ pradz tu chirolu ali campanii electoralâ dit anlu 2012 di la emburi ta s-agiutâ tu proțeslu di amintari a nâscântor contracti cu vâsâlia.
Amsterdam, fu dișcl‘is Țentrul European Contraterorismu
Ma multi vâsâlii dit Uniunea Europeanâ câftarâ a executivlui comunitar s-andreagâ lucârli ta s-tindâ cu pânâ la doi an‘i posibilitatea di bâgari disnău tu practico a controlui la sinuri tu spaţilul di libirâ urdinari Schengen.
Hâbarea vini di la ministurlu olandez ti imigrații, cu furn‘iea a unâl‘ei andamusi ministerialâ dizvârtitâ Amsterdam, sum prezidențil‘ia olandezâ a Uniunâl‘ei, adunari la cari România fu reprezentatâ di ministurlu ti Afațeri Interni, Petre Tobă. Tut Amsterdam fu dicl‘is şi Țentrul European Contraterorismu, cari va s-hibâ tu cadrul Europol.
Aestâ nauâ instituţii mutreaști s-hibâ un agiutor tu alumta cu terorismul la nivel european, prit criștearea a informaţiilor dati di vâsâliili membri întrâ eali. Prota activitati va s-mutreascâ maxus pi tinirl‘ii europen‘i cari fug tu Siria şi Irak s-lucreadzâ anamisa di grupurli teroristi, ași-dzâsi foreign fighters, un numir di vârâ 5000, dupu minduiarea a directorlui Europol, Rob Wainwright.
Nomlu contra a ancun‘iearâl‘ei tin‘iseaști Constituția
Actul cari nu mai aproachi ancun‘iearea cu spațiili publiți dit Românii easti uidisit ti Nomlu di Timel‘iu ali vâsâlii — apufusi, N‘iercuri, Curtea Constituţională. Ași, aestâ dit soni nu apruchie sesizarea pi aestâ temâ, pitricutâ di ma mulțâ senatori di la tuti partidili politiți.
Apruchiatâ tu meslu Andreu di plenlu a Udălui a Diputaţlor, nomlu caftâ s-scoatâ ancun‘iearea dit spaţiili publiți încl‘isi di la loclu di lucru, di la locurli di agiucari ti ficiuriț, dit unităţli sanitari și di anvițari, ama și dit spațiili adrati ti protecția și asistența a ficiurițlor.
Vizitâ a năului premier a Republicâl‘ei Moldova la Bucureşti
Năulu premier a Republicâl‘ei Moldova, Pavel Filip, adră, Bucureşti, prota lui vizitâ di cându intră pi ipotisi, iu fu apruchiat di prezidentul Klaus Iohannis şi iu zburâ cu omologlu a lui, Dacian Cioloş. Pavel Filip dzâsi că vâsâlia lui treați prit unâ catandisi politicâ baia greauâ, cu tensiun‘i,. ama spusi și că guvernul a lui mutreaști s-ascoatâ tu miydani ațea că easti unlu proeuropean.
Ofițialu mai dzâsi că andruparea ali Românii ti Chişinău easti di mari simasii și harisutsi a autorităţlor români ti agiutor. Bucureştilu deadi hâbari că va s-agiutâ cu pâradz Chişinăulu, dupu ți va s-hibâ apruchiati meatrili cari s-aspunâ vrearea ti alâxeari, ti reformâ. Agiutorlu di 150 di milioani di euro, ți lipseaști s-hibâ turnat nâpoi, va s-da tu trei părțâ, prota hiinda di 60 di milioani.
