Eveniment Top – 7.11.2015

Lucru lai t-un club di tiniri di Bucureşti

Corina Cristea, 06.11.2015, 12:14

Ma mulţâ tiniri chirurâ şi aproapea dauâ suti di oamin’i furâ arşi tu un foc ţi ahurhi cu unâ stâmânâ ninti, t-un club bucureştean. Andreptu t-un loc ici uidisit, conţertul ali parei rock Goodbye to Gravity” s-bitisi traghic unâoarâ ţi s-apreasi fârâ vreari materialu cu cari eara antifonat un stâlpu di andrupari — foclu s-tinsi ayoniea ş-câtâ îndzeanâ.

Suti di oamin’i — di ţinţi ori mai mulţâ andicra di cât lipsea s-hibâ nîuntru, uidisit cu actili a clublui — furâ acâţaţ sum stogurli incandescenti di material ţi câdzurâ di-ndzeanâ. Fumlu baia gros şi combinaţia di gazi dit ardearea a buretlui di antifonari, ţi nu eara cum câfta nomlu, anamisa di numirlu scâdzut di căi di inşeari, adrarâ clublu di la sumsolu a unâl’ei fabricâ veacl’i, un loc di moarti dit cari maşi îndoi amintarâ s-ascapâ fârâ s-patâ ţiva.

Multi echipi di intervenţii agiumsirâ aclo, iara aesti dit soni furâ agiutati di oamin’i di pi sucachi, di asistentili di la unâ maternitati ţi eara aclo, aproapea ş-di oamin’i ţi earau la conţertu, ama cari amintarâ s-iasâ cama ayoniea di nâuntru. Agudiţii, nai ma mulţâl’ii resuscitati pi sucachi, dinâintea a clublui, furâ pitricuţ la ma multi spitali, iar pârinţâl’ii aveau ahurhitâ ş-caftâ aspâreaţ fciorl’ii ţi earau la conţertu. Dit ei, şi minori, chiola nomlu nu-i aproachi tu ahtări locuri. Nica di la protili zboarâ dit presâ, sumsecretarlu di stat tu Ministerlu di Interni, Raed Arafat, cari cumândisi catandisea anamisa di ministurlu di la Sânâtati, Nicolae Bănicioiu, dzâsi că nu pompierl’ii nu deadirâ avizlu ti clublu iu s-dizvârti întreaga lâiaţâ.

Traghedia aspâre întreaga soţietati româneascâ, ama şi comunitatea internaţionalâ, cari pitricu zboarâ di andrupari şi ş-aspusi agiutorlu ti scâparea a oamin’ilor lândziţ.

Meatri dupu traghedii, pi timeilu a anchetilor ţi suntu tora tu dizvârteari

Traghedia scoasi tu migdani goluri legislativi şi mutâ baia antribări mutrinda turlia cum sunti dati autorizaţiili di funcţionari, di imnari. Prezidentul Klaus Iohannis lâ câftă a autorităţlor ţi u au borgea, ca ancheta s-dizvârteascâ susto, cu eficienţâ, Caplu ali vâsâlii câftă, tu idyul chiro, a autorităţlor, meatri ţi lipsescu bâgati tu practico ca ahtări evenimenti s-nu mai hibâ. Klaus Iohannis: Nu mai putem s-apruchiem incompetenţa a nâscântor autorităţ, niputearea a nâscântor instituţii, nu mai putem s-alâsăm aruşfetea s-tindâ pânâ s-vatâmâ tu calea a ei. Lipseaşti cathiun s-nâ luăm borgea şi rolu di cetăţen’i activi, cari ştiu s-lucreadzâ deadun câ ţe au angâtan di soţietatea şi vâsâlia iu bâneadzâ.

Anamisa di eforturli ti scâparea a oamin’ilor lândziţ, autorităţli s-mutarâ ta s-andreagâ problemili scoasi tu migdani di aestâ dramâ. Inspectorii ahurhirâ mări controali tu restauranti, cluburi, ţinematografi, baruri icâ mall-uri iu s-andreg dipriunâ evenimenti, ta s-veadâ maca suntu tin’isiti sinfuniili di nom ta s-imnâ, ta ş-dizvârteascâ activitatea.

Acţiun’ili di control suntu di turlii preventivâ, hiindalor câftati cărţâli di funcţionari şi avizili ti spectacoli cu materiali inflamabili. Nomlu mutrinda funcţionarea a nâscântor locuri, cari easti tora tu-mplin proţes ti alâxeari, fu adrat cama dur, amendzâli criscurâ baia şi a proprietarilor di cluburi cari nu tin’isescu nomurli, poati s-lâ si aducâ câbati di infracţiuni penali, iara localurli încl’isi. Emburl’ii di la club furâ arestaţi sum câbatea di greauâ lipsâ di angâtan şi responsabilitati. Pi di altâ parti, DNA caftâ tora posibili acti di aruşfeti la primăria cari apruchie funcţionarea a loclui.

Demisia a Guvernului, sum mărli protesti

Multu anvirinatâ di chirearea a multor tiniri fârâ câbati ti furn’ia a aruşfetâl’ei, soţietatea româneascâ s-mutâ t-un efortu multu mari, ţi nu s-mai vidzu tora ayoniea, ş-andreapsi unâ imnari di tâţeari t-unâ dit aţeali trei dzâli di doliu. Dapoaia, Marţâ seara, lumea inşi pi sucăchi la unâ mari adunari, ama multu pi arâhati, iu cama di 20 di n’ii di oamin’i câftarâ, Bucureşti, scutearea di ipotisi a premierlui Victor Ponta, demisia a ministurlui di Interni, viţepremierlu Gabriel Oprea, şi demisia a primarlui dit la sectorlu 4m Cristian Popescu Piedone — ei tuţ hiindalor vidzuţ ca parti dit unâ clasâ politicâ ţi ari câbatea ti traghedia dit club. Protestul nu armasi gol. Protlu-ministru ş-alâsă ipotisea şi mandatlu a-ntreglui cabinet, lucru ţi fu dapoaia adrat ş-di primarlu a sectorului iu ahurhi foclu.

N’iili di protestatari contra a sistemlui, tu Bucureşti, ama ş-tu mărl’i câsâbadz dit Românii icâ dit diaspora, înşirâ disnău pi sucăchi, ş-dzâsirâ că va s-adarâ aestu lucru pânâ cându întreaga clasâ politicâ va s-hibâ alâxitâ.

Lista a câftărilor aesti unâ mari, ama dominâ zboarâli contra a sistemlui – Tuti partidili, idyea cuprii. Caplu ali vâsâlii îl băgă pi ministurlu di la Educaţii, Sorin Câmpeanu, s-asiguripseascâ ipotisea di premier pânâ cându va s-apufuseascâ, dupu moaubeţ cu partidili parlamentari, ama şi cu reprezentanţâ dit soţietatea ţivilâ, cari va s-alâxeascâ yinitorlu executiv român.

PSD — protlu tu suţata di guvernari — andrupaşti adrarea a unui stog di scupadz icunumiţ, soţiali şi politiţ ti chirolu yinitor, scupadz cari s-apândiseascâ a mărilor antribări cari yin di la lumi. Dit opoziţii, protlu partid, PNL, minduiaşti că nai ma bunlu lucru suntu alidzerli antiţipati.