Eveniment Top – 3.10.2015

Vizita a prezidentului ali Românii, Klaus Iohannis, tu SUA

Corina Cristea, 02.10.2015, 11:31

Vizita a prezidentului ali Românii, Klaus Iohannis, tu SUA

Tu chirolu cât fu oaspit, stâmâna aestâ, tu SUA, caplu ali vâsâlii, Klaus Iohannis, zburâ di trei ori dinâintea a liderilor mondiali andamusiţ la Adunarea Generalâ a ONU, a curi lâ dzâsi ti alumta contra terorismului icâ contra a urfanâl’ei.

Dupu apruchiarea a Agendâl’ei 2030 a Naţiun’ilor Adunati ti Împrustari Durabilâ, Bucureştiul va s-alâxeascâ Strategia naţionalâ di împrustari durabilâ” şi va s-adunâ t-un loc aţeali 17 obiectivi şi 169 scupadz achicâsiti la summit-lu di New York, dzâsi Klaus Iohannis: Tu strategia româneascâ alâxitâ va s-bagâ acţentul pi andruparea a persoanilor cu dizabilităţ, a tinirilor şi a mu’lerilor tu politiţli di împrustari. Scâparea si urfan’i ari anaghi di oportunităţ di angajari, di lucru, iar evitarea a excluziunâl’ei di turlii soţialâ caftâ politiţ di coeziuni soţialâ.

Agenda 2030 ari ca scupo ascâparea di urfan’i tu cathi turlii a ei şi asiguripsearea a unâl’ei împrustari durabilâ. Prezidentul ali Românii s-aspusi hârsit, pi di altâ parti, că Naţiun’ili Adunati lipsescu s-hibâ ma pţân toleranti mutrinda conflictili dit regiunea Transnistria a Republicâl’ei Moldova, dit Georgia şi dit Nagorno Karabah. Klaus Iohannis: Lipsa di acţiun’i tu ahtări catandisi amintâ eroarea că luarea paranom di loc, di teritoriu, tu dezavantajlu a vâsâliilor suverani şi independenti sunt tolerati, apruchiati. Easti şi catandisea dit Ucraina, ti cari Naţiun’ili Adunati şi Consiliu di Sicuritati maxus – nu bâgarâ tu practico meatri ţi suntu uidisiti cu Carta ONU.

Un lucru di mari simasii a vizitâl’ei tu SUA fu andamusea cu viţeprezidentul american, Joi Biden. Achicâsarea strategicâ dintrâ Bucureşti şi Washington, ligâturli icunumiţi, ama şi alumta contra aruşfetâl’ei tu Românii furâ protili subiecti a moaubetâl’ei.

Guvernul Victor Ponta tricu testul a moţiunâl’ei di cenzurâ

Premierlu soţial-democrat Victor Ponta deadi, Marţâ, ti patra oarâ testul a moţiunâl’ei di cenzurâ. Aşa cum eara aştiptat, numirlu di voturi ţi lipseaşti ca executivlu s-cadâ, 275, nu fu adunat, aşi că legislativlu român ş-duţi ninti lucurlu. Tu minduita a liberalilor, aţei ţi ahurhirâ moţiunea, Victor Ponta nu ma poati s-ţânâ ipotisea di premier, câ ţe lumea nu-l mai veadi ghini, dupu ţi fu pitricut tu giudicatâ di DNA ti aruşfeti.

Arâdeari tu acti sum anyrâpseari privatâ, agiutor la evaziuni fiscalâ şi lari di pâradz – sunt protili câbăţ ţi îi si aduc di procurori t-un dosar mutrinda nâscânti contracti di asistenţâ giuridicâ la companiili energetiţi Turceni şi Rovinari.

Uidisit cu liberalii, Victor Ponta easti un prot-ministru ţi nu poati s-iasâ tu lumi cu caplu-ndzeanâ tu numa ali Românii. Premierlu nu apruchie ici, canâoarâ, tu aestu dit soni chiro, câbăţli a procurorilor, ama niţi câftărli a prezidentului Klaus Iohannis şi ali opoziţii liberalâ ta ş-alasâ ipotisea. Tora, tu legislativ, Victor Ponta dzâsi că nu minduiaşti că s-aflâ dinintea a unâl’ei moţiuni di cenzurâ, câ ţe nu-i si aduţi câbati di ţiva dit activitatea a Guvernului.

Bucureştiul caftâ unâ nauâ achicâseari di ampârmut cu FMI

România va s-caftâ ofiţial un nauâ achicâseari di ampârmut cu FMI estan, hâbârisi, stâmâna aestâ, ministurlu di finanţi, Eugen Teodorovici. Uidisit cu zboarâli a lui, pâzâripserli va s-mutreascâ maxus bâgarea tu practico a alâxerilor structurali, ş-nu defiţitlu bugetar.

Tu minduita lui, easti ananghi di aestu acordu ta s-hibâ afiritâ România di şocurili di pi pâzari, iara vâsâlia s-poatâ s-ampurmutâ cu cama n’icâ dobândâ pi pâzerli mondiali.

Aţel di ninti acordu, di turlii preventivâ, anyrâpsit di Românii cu FMI tu anlu 2013, di dauâ miliardi di euro, s-bitisi tu inşita a stâmânl’ei ţi tricu, di la giumitatea a anlui 2014, aestu dit soni hiindalui dânâsit ti furn’iea a niachicâserilor dintrâ ofiţialii di Bucureşti şi aţei di la FMI tu ţi mutreaşti planurli fiscali a Guvernului.

Crişteri di amintatiţi tu sistemlu di sânâtati

Amintatiţli a angajaţlor dit Sânâtati criscurâ cu 25% di la 1 di Sumedru, iara di aestu lucru s-hârsirâ aproapea 200 di n’ii di oamin’i. Guvernul exiyisi veara aestâ, cându apruchie aestâ meatrâ, ca mutreaşti sâ-i agiutâ pi yeaţâri, ta s-nu mai fugâ tru xeani. Tora, amintaticlu mediu net dit sistemlu sanitar easti di 1.500 di lei (circa 340 di euro), uidisit cu Institutlu Naţional di Statisticâ.

Scandalu Volkswagen tu Românii

Dealerii Volkswagen, Audi, Skoda şi Seat nu va s-mai vindâ tu Românii amaxili diesel ţi li au pi stoc. Aestâ meatrâ fu apufusitâ di autorităţli di Bucureşti pânâ la limpidzarea a catandisâl’ei a amaxilor ţi pot s-aibâ montati aparaturi di arâdeari a rezultatilor la testili di noxi.

Gruplu auto german Volkswagen intră tu un scandal multu mari, dupu ţi pricânuscu că bâgă, pi 11 milioani di motoari vinduti tu tutâ lumea, un softu, un program cari arâdi rezultatili a testilor contra-poluari a amaxilor diesel.

Stâmâna ţi tricu, Registrul Auto Român câftă a reprezentanţâl’ei Volkswagen tu Românii unâ listâ cu tuti turlii di amaxi pi cari fu ufilisitâ ahtari aparaturâ. Ministurlu a Mediului, a Apilor şi a Pădurilor, Graţiela Gavrilescu, dzâsi că vâsâlia noastâ va s-ducâ contra a producătorlui icâ a reprezentantului di îndreptu al Volkswagen tu Românii ti adunarea a-ntreagâl’ei sumâ chirutâ dit taxa di mediu.