Eveniment Top – 19.09.2015

Premierlu român – pitricut tu giudicatâ

Roxana Vasile, 18.09.2015, 13:07

Premierlu român – pitricut tu giudicatâ

Easti protlu premier ali Românii post-comunistâ ţi easti câftat penal tu chirolu cându easti pi ipotisi: soţial-democratlu Victor Ponta fu pitricut, Gioi, tu giudicatâ. Anamisa di un soţ di partid, senatorlu Dan Şova, a premierlui îi si aduţi câbati di 17 infracţiun’i di acti psefti sum anyrâpseari privatâ, agiutor la evaziuni di turlii fiscalâ şi lari di pâradz t-un dosar la companiili energetiţi Turceni şi Rovinari, dit sudlu ali vâsâlii.

Tuti lucârli ti cari îi si aduţi câbati s-dzâţi că furâ adrati tu chirolu cându aestu dit soni eara avucat. Tu idyul chiro, procurorl’ii contra-aruşfeti minduirâ că lipseaşti duţearea ninti a câftarâl’ei penalâ al Victor Ponta ş-ti conflictu di interesi tu ipotisea di prot-ministru. Andicra di aţel di ma ninti ministru di la Transporturi tu cabinetlu Ponta, Dan Şova, el easti câftat penal ti agiutor la abuz tu lucru. A lui îi si aduţi câbati că ar luatâ suti di n’ii di euro ti achicâseri prit cari vâsâlia chiru fost cama di 16 milioani di euro.

Catandisea easti tut ma lai ti premier, Guvernu şi PSD, iara imaginea ali Românii easti aguditâ — dzâsi Gioi, prezidentul Klaus Iohannis, dupu pitriţearea tu giudicatâ al Victor Ponta, a curi îi câftă disnău s-iasâ di pi ipotisi. Soţial-democraţl’ii vor, ama, ca el s-armânâ la cumândiseari – dzâţi prezidentul interimar al partidlui, Liviu Dragnea: Nu avem niţi vârâ turlii di garanţii că prezidentul Iohannis va s-aleagâ un candidat di prot-ministru tut di la PSD. Victor Ponta easti un premier cari cumândisi îndauâ guverni cari agiutarâ ca România s-agiungâ la reziultati icunumiţi buni şi nu maşi ahât. Nu va s-l‘ia foc România adzâ. Nu va s-l’ia foc România niţi mâni. Easti di marii simasii ti el s-şi limpidzascâ minduirea şi, anamisa di apofasea lui, va s-zburâm şi noi doil’ii, şi tu partid, şi tu suţatâ.” Premierlu Victor Ponta nu apruchie ici câbăţli adusi di procurori.

România şi catandisea a refugiaţlor

România va s-giudicâ, disnău, la Consiliu ti Giustiţii şi Afaceri Interni di stâmâna ţi yini, cotili di imigranţâ bâgati zorlea pi cari vâsâlii dit Uniunea Europeanâ lipseaşti s-îi ia. Hâbarea easti a prezidentului Klaus Iohannis, dupu unâ mutreari a fenomenlui migraţionistu, tu Consiliu Suprem di Afireari ali Vâsâlii. Caplu ali vâsâlii zburâ disnău ti andruparea a Bucureştilui ti 1.785 di refugiaţ, chiola Comisia Europeanâ va ca România s-l’ia di vârâ 3 ori mai mulţâ.

Maca, ama, Uniunea Europeanâ va s-stuhinâ Bucureştiul s-aproachi mai multi persoani dicât va, CSAT zburâ ş-ti turlia ta s-ufiliseascâ pâradz europen’i ti criştearea a putearâl’ei di apanghiu a migranţilor.

Preşedinteli Klaus Iohannis: Maca va s-avem ahatari lucru, atumţea easti limpid că lipseaşti s-adram ţâva ayoriea. Nu fu nica luatâ unâ apofasi, ama s-avdzâ zborlu mutrinda ufilisearea di pâradz europen’i ti criştearea a putearâl’ei di apruchiari a refugiaţlor, icâ, sigura, tu extremis, ufilisearea di ahtări pâradz ti mutarea di năi ţentri di apanghiu ti refugiaţ.

Tut stâmâna aestâ, România şi Ungaria s-alumtarâ verbal dupu ţi Budapesta hâbârisi că mutreaşti s-mutâ un gardu di sârmâ contra a refugiaţlor la sinurli ungaro-români, pi turlia a aţilui adrat la sinurlu cu Sârbia.

Poziţia a Guvernului di Bucureşti mutrinda purtata a autorităţlor dit Ungaria andicra di migranţâ, easti uidisitâ cu poziţiili aspusi di vâsâliili şi instituţiili a Uniunâl’ei Europeanâ, ama ş-di alti organismi internaţionali — s-aspuni t-un comunicat anyrâpsit Gioi.

Executivlu român ş-aspuni disnău minduita uidisit cu cari mutarea a unui gardu la sinurli ali Ungarii cu vişin’ii a ei, cari s-dânâseascâ refugiaţl’ii, nu easti pi time’ilu a nomurilor europeani. Guvernul ali Românii veadi ca hiindaei di mari simasii, di timeliu, tin’isearea a aluştor nomuri, ama şi a îndrepturilor a omlui.

Primarlu a Bucureştiului — tu arestu di turlii preventivâ

Ştefănel Dan Marin, reprezentantul a Uniunâl’ei Naţionalâ ti Progreslu ali Românii (UNPR), n’ic partid ţi easti tu suţata di la guvernari, esati, di Marţâ, primar general interimar al Bucureştiului. Tu aestâ ipotisi, el dzâsi: Tora ari un mari gol di cunuşteari tu ţi mutreaşti catandisea finanţiarâ ali primării, ş-ti aţea unâ dit protili meatri pi cari va li bag tu practico easti s-adar unâ auditari externâ. Ştefănel Dan Marin easti tora pi ipotisea a aţilui di ma ninti primar, Sorin Oprescu, tora scos di pi lucru prit un ordin a prefectului di Bucureşti ti furn’iea a problemilor pi cari li ari cu giustiţia.

Procurorl’ii contra-aruşfeti îi aduc câbati al Oprescu, tora tu arestu preventiv, că ar luatâ 25.000 di euro şi spun că ari intratâ t-un grup andreptu tu administraţia localâ cari câfta unâ parti dit pâradzl’ii di la firmili cari vreau contracti publiţi.

Icunumia româneascâ – tu crişteari?

Reprezentantul a Fondului Monetar Internaţional tu Românii şi Vâryârii, Guillermo Tolosa, dzâsi, stâmâna aestâ, că România poati s-creascâ tu ţi mutreaşti icunumia tu yinitor’ii trei an’i, şi s-treacâ di vâsâlii europeani cum suntu Gârţia, Cehia icâ Portugalia, maca va s-aibâ stabilitati di turlii fiscalâ şi va s-amintâ s-aducâ investitori, maxus tu infrastructurâ.

Tut stâmâna aestâ, s-hâbârisi că inflaţia di cathi an agiumsi, tu meslu August, la un nou minim isturic tu aeşţâ dit soni 25 di an’i, di minus 1,9%, fărâ s-hibâ vârâ piricul di intrari tu deflaţii.

Comisia Naţionalâ di Prognozâ criscu tora ayoniea datili ti anlu 2015 mutrinda criştearea icunumicâ di la 2,8% la 3,3%, iara ritmlu poati s-ducâ ninti, s-creascâ, tu an’ii ţi yin, pânâ la 4 proţenti tu anlu 2018.