Eveniment Top 16.05.2015

Prezidentul ali Românii, Klaus Iohannis, vizitâ tu Italii şi Vatican

Roxana Vasile, 19.05.2015, 11:50

Prezidentul ali Românii, Klaus Iohannis, vizitâ tu Italii şi Vatican

Hiindalui t-unâ vizitâ ofiţialâ di trei dzâli tu Italii şi Vatican, caplu ali vâsâlii, Klaus Iohannis, fu apruchiat, Viniri, di Papa Francisc, pi cari-l câlisi s-yinâ tu Românii. Gioi, Klaus Iohannis dusi ş-la Expoziţia Universalâ di Milano, ţi ari ca protâ temâ Hârnearea a planetâl’ei, energhii ti banâ, iara dicsearâ s-andamusi cu reprezentanţâl’ii a comunitatâl’ei româneascâ dit câsâbă — iu s-aspusi anvirinat di turlia cum imnâ proiectul mutrinda votlu prit corespondenţâ.

Easti daua vizitâ ofiţialâ a prezidentului Iohannis tu Italii. Tu inşita a meslui Apriiur, Iohannis zburâ, la Roma, cu omologlu a lui, Sergio Mattarella, cu premierlu Matteo Renzi, cu prezidentul a Senatlui di Roma, Pietro Grasso, şi s-andamusi cu reprezentanţâl’ii a comunitatâl’ei româneascâ dit Italii.

Estimări mutrinda criştearea icunumicâ ali Românii

România şi Cipru avurâ nai ma marea crişteari icunumicâ dit UE tu proţl’ii trei meşi dit 2015, andicra di alanţâ di ninti trei meşi, uidisit cu estimarea anyrâpsitâ N’iercuri, di Oficilu European ti Statisticâ.

Dupu România şi Cipru, protili tu UE tu ţi mutrealti criştearea icunumicâ trimestrialâ, di 1,6%, yin Spania, Vâryâria, Slovacia, Franţa şi Ungaria. Cathi an, criştearea a zonâl’ei euro criscu tu chirolu Yinaru-Marţu 2015 la 1%, iara PIB-lu UE avu un avansu di 1,4%.

Nai ma mărli crişteri pi an furâ tu Românii (4,2%) şi Ungaria (3,1%), iara scâderi furâ maşi tu Finlanda. Tut stâmâna aestâ, Banca Europeanâ ti Alâxeari şi Împrustari (BERD – Banca Europeană pentru Reconstrucţii şi Dezvoltare) adră cama bunâ prognoza di creşteari icunumicâ ali Românii ti estan, pânâ la 3%, di la 2,8% cât eara prognoza tu meslu Yinaru. Ti 2016, BERD aştaptâ ca icunumia româneascâ s-agiungâ la un avansu di 3,2%, unlu dit nai ma bunili ritmuri di crişteari dit Europa.

Meatra a scâdearâl’ei TVA ti mâcări fu apruchiatâ di senatori

Meatra mutrinda scâdearea TVA la mâcări di la 1 di Cireşar fu apruchiatâ, stâmâna aestâ, di senatorl’ii di Bucureşti.

Aestu lucru mutreaşti n’icşuraea a taxâl’ei pi pâhă adâvgat, di la 24 la 9 proţenti, la tuti mâcărli, biuturi fârâ alcool, serviţii di restaurant şi catering, aşa cum fu nâinti cu ma muşâ an’i ti pâni şi alti turlii di panificaţii.Vidzutâ di executiv ca hiindaei unâ meatrâ cari s-da curagiu ti consum şi, maxus cari s-creascâ tendinţa pozitivâ ali icunumii, aestu lucru nu fu apruchiat multu ghini, câ ţe oamin’ii nu aşteaptâ n’icşurări multu mări a pâhadzlor.

Calculili aspusi di Ministerlu ti Agriculturâ aştaptâ unâ scâdeari a pâhadzlor cu aproapea 12%. Nai ma mulţâ român’i minduiescu că n’icşurarea TVA la mâcări şi biuturi fârâ alcool, easti unâ meatrâ ş-ti ei, ama ş-ti icunumii, uidisit cu un barometru di opinii INSCOP.

Soţial-democratlu Liviu Dragnea fu condamnat la un an di hapsi cu suspendari

Giudicâtorl’ii di la Analta Curti di Casaţii şi Giustiţii lu condamnarâ, Viniri, pi Ministurlu ti Împrustari, viţepremierlu soţial-democrat Liviu Dragnea, la un an di hapsi cu suspendari tu dosarlu Referendumlu”.

Ayoniea dupu aestu lucru, Dragnea inşi di pi ipotisea dit Guvernu şi hâbârisi că va s-iasâ ş-dit ipotisea di prezidentu executiv al PSD. Dragnea fu pitricut tu giudecatâ di procurorl’ii DNA tu meslu Brumar dit 2013, ti infracţiunea di ufiliseari a putearâl’ei icâ a autoritatâl’ei di unâ persoanâ ţi ari unâ ipotisi di cumândiseari t-un partid, ta s-aproachi ti el, icâ ti altu vârâ, ma multi turlii di bunuri.

Uidisit cu DNA, Liviu Dragnea, ca Secretar General al PSD, cu furn’iea a andridzearâl’ei a referendumlui dit 29 di Alunar 2012, ufilisi influenţa şi autoritatea a lui tu partid ta s-aproachi bunuri nipatrimoniali di turlii electoralâ ti suţata politicâ dit cari adra parti inculpatlu, icâ adunarea a cvorumului di partiţipari cu agiutorlu a voturilor luati paranom.

Filmi româneşţâ la Cannes

Producţia “Caplu-ndzeanâ” a franţuzoaicâl’ei Emmanuelle Bercot, cu Catherine Deneuve tu protlu rol, dişcl’isi N’iercuri, cânâscutlu festival di film di Cannes, cari s-bitiseaşti pi 24 di Mai.

Cama di 50 di filmi sunt aspusi la aestu mari evenimentu, iara 19 dit eali sunt tu competiţii ti marli premiu, Palmi dOr. Estan, la secţiunea Un certain regard suntu aspusi ş-dauâ filmi româneşţâ: Corneliu Porumboiu dusi cu pelicula Comoara şi Radu Muntean cu Un etaj ma-nghios. Tu competiţia di metraji şcurte, Andrei Creţulescu l’ia parti cu Ramona.

Ascultaţ aoa –>

Armânipsearea: Cristina Mina