Eveniment Top – 07.02.2015
Mări dosari di aruşfeti tu Românii
Corina Cristea, 06.02.2015, 13:05
Mări dosari di aruşfeti tu Românii
Dosarili di mari aruşfeti armasirâ şi stâmâna aestâ tu prota fesi a mass-media dit Românii, numi avdzâti dit politicâ icâ administraţii hiindalor cl’imati la DNA, instituţii cari creaşti cathi dzuâ lista a oamin’ilor a curi lâ si aduc câbăţ.
A deputatlui Elena Udrea, ma ninti ministru a Împrustarâl’ei Regionalâ şi a Turismului, îi si aduţi câbati tu dauâ dosari – ti lari di pâradz, arâdeari tu declaraţii si trafic di influenţâ – şi va s-ştibâ Luni maca va s-hibâ arestatâ di oarâ.
Procurorl’ii antiaruşfeti câftarâ apruchiarea mutrinda arestării preventivâ aliştei dit soni, iara plenlu ti mutarea a imunitatâl’ei parlamentarâ ali Elena Udrea va s-andamuseascâ tu prota dzuâ a stâmânâl’ei ţi yini. Aţel di ma ninti minstru nu aproachi ici câbăţli ţi îi si aduc.
Tut stâmâna aestâ, giudicâtorlu Toni Greblâ inşi di pi ipotisea di membru a Curtâl’ei Constituţionalâ dit Românii, ti furn’ia a anchetâl’ei ţi-l mutreaşti di baia dzâli.
A lui îi si aduţi câbati ti greali fapti di aruşfeti. N’iercuri, prezidentul ali vâsâlii, Klaus Iohannis, îi pitricu a ministrului di Giustiţii câftarea di anchetâ penalâ a a aţilui di ma ninti ministru ali icunumii, democrat-liberalu Adriean Videanu, arestat di oarâ preventiv, t-un altu dosar, ti complicitati la abuz tu lucru. Tora ayoniea,, Videanu inşi di sum vigl’ieari giusiţiarâ.
Sunta maşi îndauâ cazuri ghinicânâscuti, ţi scot tu migdani ma multi afaţeri multu sum litera a nomlui.
Prognozi cama buni mutrinda criştearea icunumicâ ali Românii
Comisia Europeanâ adrâ cama bunâ estimarea tu ţi mutreaşti criştearea icunumicâ ali Românii tu anlu 2015, pânâ la 2,7%, cu 0,3% cama multu andicra di datili di nâinti.
Aestâ crişteari di turlii icunumicâ, ţi ari dupu ea ş-unâ altâ di 2,9% tu anlu 2016, lipseaşti s-hibâ andrupâtâ, prota, di câftarea internâ ş-di yinearea tu puteari, niham câti niham a icunumil’ei globalâ.
Consumlu privat easti aştiptat s-armânâ pi cicioari; tu idyul chiro cu criştearea a amintatiţilor, inflaţia scâdzutâ şi criştearea a sinfuniilor di pi pâzarea a lucurlui sunt factori cari agiutâ putearea di ancupârari, s-aspuni tu raportul ali Comisii Europeanâ. S-aşteaptâ, pi di altâ parti, şi ca investiţiili privati şi aţeali publiâi s-ahurheascâ s-imnâ cama ghini, iara exporturli s-creascâ
Ţentri NATO tu Românii
Suţata Nordu-Atlanticâ apruchie, Gioi, unâ împrustari a puterilor a ei tu Estul a Europâl’ei, adrândalui unâ nauâ forţâ di reacţii ayunistiâ, di 5.000 di militari şi ţentri di cumândiseari tu regiuni, hâbârisi secretarlu general a Suţatâl’ei Nordu-Atlanticâ, Jens Stoltenberg.
Ministurlu român di Afireari Naţionalâ, Mircea Duşa, hâbârisi că NATO va s-hibâ ş-tu Românii prit dauâ comandamenti ţi lipseaşti s-hibâ înhiinţati tu chirolu ţi yini. Caplu ali diplomaţii di Bucureşti, Bogdan Aurescu, apruchie ş-el apofasea ali NATO ta s-adarâ ţentri di cumândiseari tu Românii şi tu alti ţinţi vâsâlii soaţi, ca Vâryâria, Polonia şi vâsâliili baltiţi.
Ma multu, dzâţi Aurescu, România easti ş-luă cu tut borgea ta s-agiutâ la sicuritatea a soţlor NATO, prit Cartierlu General Multinaţional al NATO, dit Sud-Estu”.
Tu minduita a Suţatâl’ei, aestâ easti aţea nai ma marea împrustari a putearâl’ei colectivâ di la bitisearea a polimlui araţi ş-pânâ tu dzâlili a noastri, şi yini tu catandisea a acţiun’ilor tut ma greali ali Arusii tu Ucraina, cari câlcă nomlu internaţional şi luă Crimeea di partea a ei.
România şi giurisdicţia a Curtâl’ei Internaţionalâ di Giustiţii
Vot dit soni tu Senatlu di Bucureşti mutrinda proiectul di nom prit cari România aproachi giurisdicţia a Curtâl’ei Intenaţionalâ di Giustiţii — prota instituţii giudiţiarâ a ONU şi unâ dit nai ma avdzâtili instanţi internaţionali şi fu amintatâ nâinti cu 70 di an’i.
Pânâ anlu ţi tricu, 70 di vâsâlii pricânâscurâ giurisdicţia a Curtâl’ei Internaţionalâ di Giustiţii – dit aesti dit soni, 21 di vâsâlii membri a Uniunâl’ei Europeanâ, şi a curi tora lâ si aproachi şi România.
Apofasea aspuni că România ş-întimil’ieadzâ purtata tu ligâturli internaţionali pi tin’isearea susto a îndreptului, dzâsi tu plenlu a Senatlui, caplu ali diplomaţii di Bucureşti, Bogdan Aurescu, aţel cari, nâinti cu şasi an’i, aminta la Haga, proţeslu dintrâ Bucureşti şi Kiev mutrinda platoului continental a Amarâl’ei Alai.
Apofasi di turlii finanţiarâ tu Românii
Autoritatea Naţionalâ ti Agiutorlu a Consumatorilor adună pânâ tora suti di plândzeri di la clienţâ cari luarâ di la intituţii bancari pâradz, crediti tu franci elveţien’i şi nu mai pot tora s-şi pâlteascâ ratili, borgili finanţiari di cathi mesu.
Unâ alâxeari la cursul isturic a tutulor creditilor tu valutâ — meatrâ ţi u caftâ tuţ aţei cu crediti — poati s-ducâ la mări chireri di pâradz, aproapea 10 miliardi di lei, dzâţi guvernatorlu BNR, Mugur Isărescu, tu minduita a curi, diversitatea aţilor cari luarâ ampârmuturi tu franci elveţien’i, caftâ zorlea andridzearea a problemilor, di la un caz la alantu.
Tu idyul chiro, Consiliu di Administraţii ali BNR n’icşură dobânda di politicâ monetarâ la un nău minim isturic, di 2,25% pi an. Apofasea easti motivatâ câ ţe inflaţia armâni sum estimări, iara creditarea nu da ici seamni s-şi yinâ tu puteari.
Banca Ţentralâ scâdzu cu unâ giumitati di proţentu şi dobânda la cari instituţiili bancari l’ia ampârmuturi di la BNR pi chiro multu şcurtu, ta s-anvâleascâ un gol di pâradz, tora, di oarâ. Naua dobândâ a agiutorlui di creditari easti di 4,25% pi an.
Armânipsearea: Cristina Mina
Ascultaţ aoa –>
