Eveniment Top – 24.01.2015
Nomlu mutrinda sicuritatea ciberneticâ ali Românii easti niconstituţional
România Internațional, 23.01.2015, 12:33
Nomlu mutrinda sicuritatea ciberneticâ ali Românii easti niconstituţional
Curtea Constituţionalâ ali Românii apufusi că Nomlu mutrinda sicuritatea ciberneticâ easti niconstituţional. Easti treilu actu normativ dit aşi-dzâslu “pachet Big Brother”, cari nu tin’iseaşti Nomlu di Timel’iu. Ayoriea di xichea a avizului CSAT, CCR vidzu că Nomlu nu tin’iseaşti baia dispoziţii, dit cari adarâ parti şi libirlu acţes la giustiţii şi îndreptul la un proţes cu dichi, îndreptul la banâ di fumeal’i, ama şi îndreptul la misticolu mutrinda corespondenţa.
Prezidentul a Curtâl’ei Constituţionalâ, Augustin Zegrean, zburâ ti niscânti presiun’i la adresa a Curtâl’ei şi pitricu un apel ca apofasili CCR s-nu mai hibâ giudicati di instituţii ali vâsâlii icâ di politicien’i.
Prezidentul ali Românii, Klaus Iohannis, nu fu tu catandisi di incompatibilitati tu chirolu cându eara primar a câsâbălui Sibiu
Analta Curti di Casaţii şi Giustiţii nu apruchie recursul ali Agenţii Naţionalâ di Integritati (ANI) şi apufusi că prezidentul di tora ali Românii, Klaus Iohannis, nu fu tu catandisi di incompatibilitati tu chirolu cându eara primar a câsâbălui Sibiu.
Tu anlu 2013, ANI îi bâgă tu catandisi di incompatibilitati pi Iohannis câ ţe — dzâţea Agenţia — aestu dit soni avea tu idyul chiro şi ipotisea di primar şi pi aţea di reprezentantu ali municipalitati tu Adunarea Generalâ a Acţionarilor di la Apâ, Canal şi Pâzări.
Dupu ţi unâ instanţâ localâ îi deadi andriptati al Klaus Iohannis, ANI pitricu recursu. Apofasea a Analtâl’ei Curti di Casaţii şi Giustiţii easti definitivâ.
Ministurlu român di Externi, Bogdan Aurescu, luă parti, Bruxelles, la andamusea a omologilor dit vâsâliili UE
Caplu ali diplomaţii di Bucuresti, Bogdan Aurescu, luă parti, Bruxelles, la andamusea a Consiliului ti Afaceri Externi, iu prota moaubeti fu ameninţarea teroristâ tu Evropa, dupu atentatili di tora ayoniea di Paris.
Aurescu dzâsi că lipsescu zburâti furn’iili a terorismului la nivel european prit andridzearea a problemilor mutrinda integrarea a comunităţlor musulmani. Bogdan Aurescu: Lipseaşti s-hibâ minduiti programi şi iniţiativi ayoriea cari aibâ angâtan di aesti problemi cari ţân di integrarea di turlii icunumicâ, soţialâ, culturalâ a comunităţilor ţi suntu tu piricul di radicalizari.
Pi di altâ parti, ministurlu român zburâ ş-ti lipsa a unâl’ei abordari di turlii strategicâ ali UE tu ligâturli cu Arusia, hiinda ti pâstirea a regimlui di sancţiun’i contra ali Moscovâ.
Aurescu adusi aminti ş-di impactul a acţiun’ilor ali Arusii tu Ucraina mutrinda catandisea di sicuritati dit regiuni, ama şi că easti ananghi ti unâ streasâ coordonari cu NATO şi SUA – pi aestâ tema.
Giudicâtor a Curtâl’ei Constituţionalâ, câftat penal ti greali câbăţ di aruşfeti
Prota oarâ tu Românii, un giudicâtor di la Curtea Constituţionalâ, Toni Greblă, easti câftat penal ti trafic di influenţâ, ti adrarea a unui grup infracţional şi ti operaţiun’i finanţiari ca acti di comerţu, ici compatibili cu ipotisea, cu scupolu ta s-l’ia paranom pâradz icâ alti lucri.
Dit aestu dosar mai adarâ parti alti şapti persoani, dit cari şi deputaţl’ii PSD (la puteari), Iulian Iancu şi Lucian Şova. Pi di altâ parti, Analta Curti di Casaţii şi Giustiţii apruchie dimândarea al DNA di arestari ti 30 di dzâli a aţilui di ma ninti ministru di Interni, liberalu Cristian David, a curi îi si adusi câbati ti aruşfeti.
Aluştui dit soni îi si aduţi câbăti că, tu an’ii 2007 si 2008, ari luatâ 500 di n’ii di euro ta s-zburascâ cu un prezidentu di la Consiliul Giudeţean, ta s-da un titlu di proprietati pi unui teren di 15 hectari.
Tu un altu ghinicânâscut dosar cu retrocedări paranom, 17 oamin’i furâ pitricuţ tu giudicatâ. Dit ei fac parti şi aţel di ma ninti deputat soţial-democrat, Viorel Hrebenciuc, hii-su a lui, Andrei, deputatlu PSD Ioan Adam, aţel di ma ninti ministru ali Giustiţii, liberalu Tudor Chiuariu, ama şi magistraţ.
Aluştor lâ si aduţi câbati că, tu anlu 2013, au adratâ un grup infracţional ţi mutrea retrocedarea paranom a cama di 43 di n’ii di hectari di pâduri. Paguba ali vâsâlii treaţi di 300 di milioani di euro.
Catandisea a ampârmuturlor tu franci eleveţien’i şi nomlu mutrinda insolvenţ personalâ tu Românii
Guvernul, Parlamentul, Banca Naţionalâ, intituţii bancari comerciali şi român’ii ţi luarâ ampârmuturi tu franci elveţien’i caftâ meatri la greaua catandisi cu cari s-alumtâ di criştearea recordu aliştei monedâ.
Cama di 75 di n’ii di român’i cari luatâ ampârmutri tu franci vidzurâ că ratili ţi lipseaşti s-li pâlteascâ suntu cu 20% ma mări andicra di stâmâna ţi tricu, Criştearea a franclui elveţian dusi ninti şi stâmâna aestâ, iara Gioi, tricu, ti prota oarâ, di moneda europeanâ.
Premierlu Victor Ponta dzâsi că, ti afirerea di ahtări catandisi di crizâ, lipseaşti unâ cama bunâ informari di partea a instituţiilor bancari, sinfunii legislativi limpidz di alâxeari a ampârmuturilor tu lei icâ tu euro, şi meatri ca instuţiili bancari s-bagâ nâpoi unâ parti dit aţea ţi s-cheari.
Ta s-l’îi agiutâ pi aţei ţi armasirâ cu borgi, Parlamentul caftâ s-bagâ tu practico, cât ma ayoniea, un proiectu di nom mutrinda insolvenţa a persoanilor fiziţi. Comisia ti buget-finanţi a Udălui a Deputaţilor mutri posibilitatea di triţeari şi la debitorl’ii tu franci elveţien’i a prividerilor a nâscântâl’ei ordonanţâ apruchiatâ anlu ţi tricu, ţi da deduţeri fiscali ti restructurarea a ampârmuturlor ti aţei cu un amintatic di sum 450 di euro.
Armânipsearea: Cristina Mina
Ascultaţ aoa –>
