Eveniment Top – 24.05.2014
Vițeprezidentul american – la Bucureşti
România Internațional, 25.05.2014, 13:41
Vițeprezidentul american – la Bucureşti
Cu trei meși nâinti di demonstraţia di puteari ali Arusii tu Crimeea, dauâ viziti la Bucureşti, a secretarlui general al NATO, Anders Fogh Rasmussen, ama și a vițeprezidentului SUA, Joi Biden, puteau s-treacâ mași ca vârâ coincidenţâ. Tora, ama, tu lun’ina a catandisâl’ei dit Ucraina, viținâ cu România, yinita aluștor dol’i la Bucureşti, tu un chiro ahât șcurtu, aspuni multu limpid andruparea militarâ pi cari România u ari di partea a soțlor a ei dit Ocțidentu, tu unâ catandisi reghionalâ ți nu ari stabilitati. Ași, stamâna aestâ, vițeprezidentul american și-aspusi disnău zborlu pi cari ofițialu NATO lu avea dzâsâ și tu inșita a stâmânâl’ei ți tricu: România nu easti mași ea goalâ dinâintea a piriculului ți yini di câtâ Arusii, vâsâlii ți ari mări aștiptări teritoriali fârâ di timel’iu ș-cari poati s-aspargâ arâhatea regionalâ. Tu idyul chiro, Biden alâvdă apofasea hâbârisitâ tora ayoniea di Românii, icâ ațea mutrinda criștearea a bugetlui dat ti Afirearea ali Vâsâlii, cari, tu 2017, lipseaști s-agiungâ la 2%. Pi di altâ parti, ofițialu american nu s-aspusi mași tu ți mutreaști tema a securitatâl’ei. Alumta contra a arușfetâl’ei, criștearea a statlui di îndreptu icâ tihea, șansili tu domenea ali energii furâ subiecti ți li zburâ ațel ți easti doilu numir la Casa Albâ. Și prezidentul ali Românii, Traian Băsescu, apruchie purtata ali SUA dupu anexarea ali Crimeei la Arusii. Criștearea a numirlui di forţi aerieni, maritimi şi terestri americani tu zona a Amaril’ei Lai, maxus tu Românii, eara un lucru di aștiptat, câ țe Arusia vahi nica mutreaști s-adarâ îndauâ mutări pi harta regionalâ, dzâsi prezidentul. La andamusea cu Biden, premierlu Victor Ponta zburâ ma multu ti scutearea a vizilor ti cetăţen’ii român’i cari vor s-ducâ tu SUA.
Guvernul di Bucureşti, atacat cu unâ moţiuni di cenzurâ
Unâ moţiuni di cenzurâ ahurhitâ di opoziţia liberalâ fu ghivâsitâ tu Plenlu andamusit a Senatlui şi a Udălui a Deputaţlor. Tu moţiuni, pitricutâ stâmâna ți tricu, liberal’ii aduc câbati a executivlui, icâ alianţa PSD-UNPR-PC şi UDMR, că amânâ di multu chiro meatrili di relaxari fiscalâ, icâ niimpozitarea a profitlui reinvestit şi n’icșurarea cu ținți proțenti a pâradzlor daț ti asiguripserli soțiali (CAS). Ministrul delegat ti buget, Liviu Voinea, deadi asiguripseri că scâderea a CAS va s/intrâ tu practico di la 1 di Alunar. Votlu mutrinda aestâ moţiuni easti aștiptat Lunea ți yini.
Năi dosari instrumentati di DNA
Direcţia Naţionalâ Antiarușfeti (DNA) caftă s-l’ia nâpoi tut terenlu ți-l chiru, tu aeșțâ dit soni 25 di an’i, tu alumta cu marli virus agiunsu tu administraţia româneascâ. Emburlu Dan Adamescu, pi cari clasamentili di spețialitati lu-aspun ca hiindalui doilu nai ma avutlu român, easti câftat penal, tu un dosar tu cari îi si aduți câbati că deadi pâradz paranom, icâ ti arușfeti. Adamescu taha ari datâ pâradz, prit niscânțâ oamin’i de-a lui, a nâscântor magistraţ di la Tribunalu Bucureşti, ta s-îi aproachi tu instanțâ buni apofasi mutrinda afacerli a lui. Tu practico, contraservicilu a magistraţlor, dzâc procurorl’ii, fu declararea paranom a falimentului a ma multor firmi ți li avea emburlu. Tut stâmâna aestâ, trei yeațâri, doi şefi di farmacii, spițârii, patru reprezentanţâ di firmi şi alțâ-ndoi intermediari furâ arestaț ti intrarea tu unâ afaceri cu reţeti psefti ti yitrii ti cancer.
Taxi scoasi
27 di taxi parafiscali furâ scoasi icâ comasati di Guvernul di Bucureşti, iara alti 65 di taxi va s-hibâ alâxiti prit ordin di ministru. Uidisit cu executivlu, scutearea aluștor 92 di taxi nu va s-aspargâ bugetlu, tu sinfuniili tu cari, tu anlu ți tricu, pâradzl’ii di la aesti dit soni agiunsirâ mași la vârâ dauâ milioani di euro. Lucurlu bun, dzâsi premierlu Victor Ponta, easti scâdearea ali birocraţii: ”Știu că putem s-mai aspârdzem dit aestu sistem fiscal multu îngriunat.”
Armânipsearea: Cristina Mina
