Hăbări ditu bana românească şi internaţională
LONDRA. Custodili a Cărunăllei ali Românie, Margareta, și Prințul Radu loară parti la ună andamasi di familie la Castelul Windsor, la călisearea a văsillelui Carol al III-lea, după ngruparea a Văsiloañillei Elisabeta a II-a. Cama di 100 di șefi di stat și di guvern și membri ai fumelliloru văsilikeşţă di lumea tută loară parti la ţeremoniile di la Londra, kiro tru cari sute di ñilli s-arădăpsiră pi geadii tra s-u pitreacă calea ditu soni văsiloanea. La eveniment, cari adună nai marli numiru di lidiri mondiali vărăoară, eara viniţ și prezidintulu ali SUA Joe Bidin și, tutunăoară, șeflu a statlui român, Klaus Iohannis.
Newsroom, 20.09.2022, 20:04
VIZITĂ. Prezidintulu ali Românie Klaus Iohannis cumănduseaşti adză și mâni dilegația ali Românie cari llia parti la aţea di a 77-a sesiune ali Adunăari Generală a ONU. Agenda andamasillei ari tru planu ma multi probleme di actualitate, cum easti iriñea și securitatea, dizvoltarea durabilă, incluziunea socială, securitatea cibernetică, ndrepturli a omului, biodiversitatea, managementul apăllei și provocărli globale. Prezidintulu ali României easti aștiptat s’evidințiadză ananghea a născăntoru cearei comune la nivel global la probleme cum securitatea energetică, alăxerli climatiţi și accesul la educație. Iohannis va s’llia parti adză la un summit global mutrinda securitatea alimentară, iu va s’cundilleadză gaereţli ali Românie tra s’asiguripsească purtarea a yipturiloru ucrainene și angajamentul a llei tra s’nu s’agiungă la ună criză alimentară. Tru un mesaj vidio di luni la summitul Transforming Education di New York, Iohannis zbură ti angajamentul ali Românie tra ș-modirnizeadză sistemul educațional și ti protejari cetățeañilli di provocările a mediului economic.
XEREA. 600 di ñilli di ictări di agări ditu România fură zñiipsiti di xeri, dimăndă adză Ministerlu ali Agricultură. Culturile di toamnă a văsiliillei di ordzu, sicară și uvedzu tragu tora di itia a xerillei prilundzită. Născănti ditu nai cama aguditi culturi di primveară suntu misurlu, floarea soarilui, soia și plantili furajere.
NOMLU. Ordonanța di ananghi a guvernului di reglementare a păhadzloru la energie fu pitricută la comisiili di specialitate ditu Senat. Documentul poati s’hibă alăxitu di Parlament, după ţi ahătu partidile di guvernământ, ama și ateali di opoziție pitricură amendamente. Un ahtari amendamentu includi anamisa di categoriile cari beneficiază di păhadz plafonate, cultili religioase, industria farmaceutică și transportul public. Nicukirlli cari ufilisescu dispozitive speţiale di tratament medical pot s’aibă hăiri și di păhadz plafonati. Tru ună altă evoluție, coaliția di guvernământ s’pari că agiumsi la un acordu mutrinda extindirea a subvențiilor di 10 cență tră combustibil cu nica trei meşi.
Autoru: Udălu a hăbărloru
Armânipsearea: Taşcu Lala
