Hăbări ditu bana românească şi internaţională
DZUUA. Evenimentili culturali ndreapti tru idyiulu kiro tru România, Ripublica Moldova viţină și comunitățle istoriţi ditu Diaspora nsimneadză adză Dzuua a Limbăllei Române. Apufusită tru 2013 di Parlamentul di București, Dzuua Limbăllei Române easti idyea cu Dzuua națională tru Ripublica Moldova, viţină, românofonă. La 31 di agustu 1989, tru kirolu a regimlui sovietic, Parlamentul di Chișinău, pichetat di 750 di nilli di oamiñi, reprezentânda ună şisimi ditu populația di atumtea a văsiliillei, apufusi limba română ca limbă di stat și tricu di la alfabetul chirilic, băgatu cu zorea di aruşi, la atelu latinu.
Newsroom, 31.08.2022, 18:17
SONDAJ. Giumitati ditu populația ali Românie easti tru ma marea parti aspăreată di inflație, iara anamisa di gaileadzlli di cafi dzuuă yinu crizili energetice și alimentare cum și majorarea a ratilor bancari, spuni un sondaj adratu di compania di cercetare sociologică Avangardi. Dauă cirecuri ditu români minduescu că ună mari criză economică va s’yină tu şvurtu kiro și aesta easti prota ispeti di găilipseari aesta arada. Uidisitu cu idyiulu sondaj, baş și tru aesti condiții, un cirecu ditu români pricunoscu că nu băgară un pără nanăparti.
TENIS. Agiucătoarea română di tenis Irina Begu s-califică tru turlu doi di la US Open, aţelu ditu soni turneu di Grand Slam ditu aestu an, după ună victorie cu 3-6, 6-2, 6-3 contra ali belgiancă Elise Mertens. Begu, 32 di ani, avu ună ascumbuseari spectaculoasă după ţi kiru protlu set și amintă agioclu tru 2 săhăţ și 24 di minute. Tru turlu doi, românca va s’agioacă cu Yue Yuan ditu China. Begu easti a treia româncă cari agiumsi tru etapa a daua a competițillei di la Flushing Meadows, după Gabriela Ruse și Sorana Cîrstea. Fostul numiru unu mondial Simona Halep și Jaqueline Cristian, tut ditu România, fură eliminate tru primlu tur ali competiție.
UCRAINA. Ună parei di inspectori ali Agenție Internațională pentru Energie Atomică (AIEA) nkisi cătă centrala nucleară ditu Zaporizhzhia, sudlu ali Ucraina. Tora nă minămu”, spuni directorul ali agenție ONU, argentinianlu Rafael Grossi. Uzina, nai ma marea ditu Europa, fu aputrusită di askerea arusă tru ahurhita a meslui marţu, ti şcurtu kiro după nkisita ali invazie. Kievlu u stipsi Moscova că dizvărti aclo suti di askeri diadunu cu echipamentu militar. Prezidintulu ucrainean Volodimir Zelenski, cari apruke experțălli ONU, căftă ali comunitati internațională s’bagă zori ali Rusie tra s’u dimilitarizeadză ună ş-ună zona. Piriclliulu a unlui fănico nuclearu di itia a acțiunilor arusești nu scadi niţi barimu ti ună săhati spusi ma largu Zelensky.
MEDALIE. Anutătorlli ditu România amintară malăma tru cursa di ștafetă 4×100 di meatri a Campionatelor Mondiale di anot ti juniori di Lima, Peru. Un alt anutătoru ditu România, Vlad Stancu amintă medalia di asimi la proba di 400 di meetri liber a idyillei competiții. Echipa ali Romanie adrată ditu David Popovici, Alexandru Constantinescu, Stefan Cozma si Patrick Sebastian Dinu, bitisi cursa tru 3 minute si 18 secundi, kiro tru cari multiplu campion Popvici feaţi un record ti competitie bitisinda partea a lui di cursa tru 47 di secundi si 7 sutimi. Ditu dilegația cari reprezintă România la Lima, Aissia Claudia Prisecaru și Rebecca Aimee Diaconescu s-calificară tru finala cursăllei di 100 di metri pi păltări dupu ţi bitisiră semifinalele pe pozițiile a patra, respectiv a ţinţea. România llia parti cu 9 anutători la campionatele di Lima.
Autoru: Udălu a hăbărloru
Armânipsearea: Taşcu Lala
