Hăbări ditu bana românească şi internaţională
METEO. Autoritățile române apufusiră ună alertă di căldură codu galbinu valabilu adză tru 12 di giudițe ditu vestul a văsiliillei, iara alerte chihlimbar și portocaliu cari anvălescu cama di trei cirecuri ditu văsilie tră perioada 22 – 24 alunaru. Di gioi, căldura extremă dalga va s’hibă tru ma marea parti a văsiliillei, indiţili temperatură-umiditate (THI) treaţi di 80. Maximele va s’hibă anamisa di 35 și 37 di gradi Celsius, cu temperaturi di până la 40 di gradi Celsius așteptate viniri și sâmbătă tru vest, nord-vest si sud-vest.
Newsroom, 20.07.2022, 19:01
NATO. Senatlu, tru harea di cameră dicizională a Parlamentului României, s’andămusi adză tru ună adunari maus ti ratificarea a Protocoalelor di adirare la NATO ali Finlandă și Suedie. Ma ninti, Camera Diputaților aviză proiectul di nomu di ratificari a protocoalilor. Documentili fură simnati tru 5 alunaru la Bruxelles. Apofasea ali Finlandă și ali Suedie tra s’intră tru Alianța Nord-Atlantică yine pe fondul a cilăstăserloru di securitate ligate di aputrusearea ali Ucraină di cătră Rusia.
Sărbătoarea. Tru cathi an, tru 20 alunaru, România sărbătoriseaşti Dzua ali Aviației și a Forților Aeriene, cari cadi tru dzua ti yiurtuseari relighioasă a Ayilui Ilia, lugursitu patronlu a piloțlor. București, s’ţănu adză ună ţeremonie militară, cari adună cama di 20 di avioane militare a Forților Aeriene Române, Britaniţi și Italiene, elicoptere a Ministerlui di Interne și Serviciului di Informații, un avion Tarom și 4 avioane di la Clublul Aerian Român. Avioanele militare va s’azboairă pisti altă căsăbadz ditu văsilie. Aviația militară românească fu thimilliusită tru 1910, cându Aurel Vlaicu proiectă primlu avion militar.
COVID. Tru România, Institutul Național di Sănătate Publică dimăndă că tru stămâna preţedintă eara confirmate 171 di infecții cu Omicron tru văsilie. Tuti aestea suntu variante SARS-CoV-2 cari aduc găilipseari. Uidisitu cu instituția, până pi 17 alunaru eara raportate până la 6.611 infecții cu Omicron. Numirul a cazurilor di COVID-19 continuă s’crească, iara experțăllii spun că dalga actuală easte di furñia a unăllei sumvarianta Omicron a coronaviruslui, cari s’arăspândiaști multu ma ntrăoară și easti axi să s’infiltreadză tru protecția oferită di vaccinurli actuale și di infecțiile anterioare.
GUVERNUL. Guvernul ali Românie easti programat s’adoptă adză un proiectu di nomu mutrinda ancupărarea a născăntoru di tu nai ma avansate trenuri electriţi, alimentate cu pile di combustie cu hidrogen. Maş 3 v4silii ditu UE ufilisescu ică testeadză tru aestu kiro ahtări trenuri. Ministerlu a Transporturilor ari naeti s’ancupără 12 di trenuri electriţi cu hidrogen. Tut tru sectorlu a transporturilor, guvernul ari naeti s’nkisească proceduri di expropriere ta s-u lărdzească palasca a Bucureştiului Sud. Cabinetlu va să zburască și ti Strategia națională 2022-2027 mutrinda cercetarea, inovarea și specializarea inteligentă, cari va lu ndreagă cadrul ti ună hărgiueari hăirlătică a fondurilor naționale. Alti dauă documente va s’hibă revizuite adză, un memorandum mutrinda discuțiile cu Organizația pentru Cooperare și Dizvoltare Economică ti finanțarea nerambursabilă a UE și un altu memorandum cari aprobă strateghia 2022-2024 ti kivernisearea a borgiloru guvernamentale.
Autoru: Udălu a hăbărloru
Armânipsearia: Taşcu Lala
