Hăbări ditu bana românească şi internaţională
LIGATURI ROMÂNIA — SUA: Stămâna ţi yini România va s-umplă 25 de ani de la simnarea a Parteneriatului Strategic cu SUA. Momentul va s’hibă nsimnatu pritu un bairu di evenimente a curi nicukiru va s’hibă Ambasada Româniillei la Washington, ntră cari și un Festival Românesc dizvărtitu tru 9 și 10 alunaru Washington. Un site web ahărdzitu ti ligăturli bilaterale anamisa di aţeali dauă văsilii va s’hibă dişcllisu tru 11 di alunaru. Tru 12 di alunaru, Parteneriatul Strategic va s’hibă yiurtusitu tru Congresul a Statelor Unite. Tru yinitoarili dauă dzăli, va s’aibă tseremonii tra s’tiñisească ma multi personalități. Un fostu ambasador la Washington, Mircea Geoană, tru aestu kiro secretaru gheneralu adjunctu al NATO, u salută importanța a ligăturăllei anamisa di România şi SUA, spunănda că aesta lipseaşti s’hibă andrupătă și tănută proaspită ,neise niacumtinatu, avanda ananghi di investiții. Ici tsiva nu easti ma importantu andicra di ligătura anamisa di noi cetăţenilli. Ici tsiva nu easti ma importantu andicra di ligătura ţi easti anamisa di tinirlli a noştri, anamisa di universităţile noastre, cercetătorllii a noştri, comunităţile a noastre di emburlăki, politicienii a noştri, tiniri şi cama tricuţ. Ună ligătură ahătu importantă nu poate s’hibă ţănută maş tru termeni strateghici. Cafi dzuuă ea acaţă ună dimensiune ma ahăndoasă, ma tsivică și orientată cătră cetățean, andrupătă di sentimentulu de apartenență la un mănuclliu de valori ambărtsitati. Aesta este ligătura a Româniillei cu America”, spune Mircea Geoană.
Newsroom, 09.07.2022, 09:56
BNR. Uidisitu cu isăkili a Băncăllei Naţională, inflaţia ditu România easti aştiptată să scadă lişoru tru meşlli ditu soni a aluştui anu. Cu tuti aestea, poati s-aibă năi crișteri di păhadz tru primveaara a anlui ţi yini, cara guvernul nu-lu extindi plafonlu tră tarifili la energie electrică și gaze după apriiuru 2023. Purtătorlu di zboru a Băncăllei Tsentrală, Dan Suciu, spusi aesta isapi la radioulu românesc. El nica exighisi că inflația ditu România easti inflație di import” di itia a creaștirillei globală a păhadzloru la energhie și combustibil. Inflația tru medie eara di 14,5% tru meslu mai, cu creaștiri estimată tra s’agiungă tru kipită tru meşlli cirişaru-alunaru.
XEREA– 70% ditu suprafata a teritoriului ali Romanie easti zniipsită di xeri. Tru ma mulţă căsăbadz, oamiñlli llia apă di la robinet maş ndauă săhăţ ndzuuă. Urdituarea pi Dunaru easti, zñiipsită di itia a xerillei: dibitili suntu aproapea giumitati ditu media pi lungu kiro, iar prognozili spunu ună nauă scădiari. Ari dificultăț la hidrocentralili Porţăli di Heru I și II. Pamporili lipseaşti s’tiñisească restricțiile di tonaj tra s’nu armănă ambudyiusiti tru dunili di arină a Dunarlui. Autoritatea Nationala a Apelor ditu Romania asiguripsi ca tru aestu kiro nu ari xiki di apă tru sistemili centrale di alimentare cu apa a mărloru căsăbadz. Datili spunu că rezervele di apă ditu protili 40 di rezervoare suntu di pisti 5 di miliardi di meatri cubi. Ti alimentarea a bănătorloru cu apă easti ananghi di 1,22 miliardi di meatri cubi. Nivelu di umpleari a rezervoarilor prinţipale easti di 80%.
ENERGHIE– Securitatea energhetică, reconstrucția ali Ucraină și perspectivili a văsiliiloru ditu reghiune di aderare la Uniunea Europeană eara protili temi a forumlui interparlamentar dizvărtitu tru dzălili di 7 și 8 alunaru la Pălatea a Parlamentului di București. România andrupaşti calea europeană ali Moldovă și Ucraina și easti ndreaptă s’da asistență nica și ditu a llei experiența ti băgarea tru lucru a standardilor europene, declară prezidentulu interimar a Senatului, Alina Gorghiu. România ari naeti s’aibă un rol important tră reconstrucţia ali Ucraină şi va s’ahărdzească fonduri importante tră aestu scupo. Minduescu că reconstrucția ali Ucraină easte responsabilitatea unăllei societati europene ţsivilizată și noi, tuti văsiliili ali UE, lipseaşti s’agiutămu ti aesta”, spusi ministrul a Economiillei, Florin Spătaru. Tutunăoară, el cundille agiutorlu ţi-lu da România ti arifugaţlli ucraineni.
ANOTU– Cu medalia di malămă amintată viniri di David Popovici, tru ilikia di 17 ani, tora diplo campion mondial la 100 meatri și 200 meatri libir masculin seniori, România amintă șasi medalii – patru di malămă și dauă di asimi. Aestă isapi u-aduţi pi treilu locu tru clasamentul național la Campionatili Europene di juniori di anotu di Otopeni ningă București, dupu Polonia și Ungaria. Campionatili europene di giuniori di anotu 2022 s’dizvărtescu tru kirolu 5-10 di alunaru. La competiție llia parti aproapea 500 di sportivi ditu 42 di văsilii. România llia parti cu 26 di anutători, 14 la prova ti bărbaț și 12 la mlleri.
CHIROLU. Este caldu tru sud-estul a Româniillei. Tru alantă parti a văsiliillei, temperaturile sunt tru limite normale. Tserul va s’alăxească, cu niurări intermitente și ploiuri locale tru regiunile di munti și pi măyuli, ama și tru sud-vestul și tru ţsentrul a văsiliillei. Temperaturile maxime fura anamisa di 22 și 32 di gradi Celsius. București, mercurul agiumsi la 32 di gradi Celsius.
Autoru: Udălu a hăbărloru
Armânipsearia: Taşcu Lala
