Hăbări ditu bana românească şi internaţională
UE – Comisia Europeană feaţi urminie a statelor membre s-da ali Ucrainei și Republicii Moldova statutlu di candidat la UE, dimăndă viniri prezidintul a Comisiillei Europene, Ursula von dir Leyen. Prezidintul României, Klaus Iohannis, salută apofasea ali Comisie, spunânda că aesta easti ună jgllioată ninti ghinivinită” tră cetățeañilli a aţilor dauă state. Ma largu va s-andrupămu ascumbusiţ Ucraina, Republica Moldova și Georgia tru gaereţli a lor tra s’agiungă membri a fumeallillei Uniunillei Europene”, angrăpsi Iohannis viniri pi şingirili di socializare. Gioi, tru kirolu a vizităllei a lui la Kiev, prezidintul ali Franță, Emmanuel Macron, diclară că Franța, diadunu cu Germania, Italia și România, andrupăscu idiea tra s’da ună ş-ună” statutul di candidat ali Ucraină. Tu arada a lui, prezidintul ali Ucraină, Volodymyr Zelensky, u zuyrăpsi vizita a lidirilor ali Franță, Germanie, Italie și Românie ca hiindalui un moment istoric. Ucraina s’hărseaşti di agiutorlu a patru state europene vărtoasi, spusi Zelensky, adăvgânda că Ucraina easti ma aproapi di UE ca vărnăoară. Di altă parti, purtătorlu di zboru a Ministerlui rus di Externe, Maria Zakharova, apăndăsi la apofasea a Comisiillei, stipsinda UE că manipuleadză Ucraina tru atea ti mutreaşti adirarea la UE.
Newsroom, 18.06.2022, 12:09
VIZITĂ – Prezidintul a României, Klaus Iohannis, diclară viniri că NATO ari axizearea tra s-ţănă keptu la iţi fuvirseri și provocări, actuale ică yinitoare. Șeful statului s-andămusi cu Văsillelu Filip ali Belgie la baza aeriană Mihail Kogălniceanu ditu giudițul Constanța. Prezidintul Iohannis haristusi ali Belgiei tră contribuția importantă a armatăllei a llei la misiunile NATO tru România. Diadunu himu ma vărtoşi și ma hăirlătiţ tru gaeretea a noastră comună ta s’anvărtusemu securitatea a spațiului euro-atlantic și a cetățeañilor a noștri”, spusi prezidintul. Tu arada a lui, văsillelu ali Belgie și spusi nădia că polimlu ditu Ucraina va s’bitisească curundu, spunănda că agiutorlu a Occidintului va s’duc ninti şi dupu bitisearea a polimlui. NATO apăndăsi ntrăoară, adusi askeri și echipamente pe Flancul Estic. Prezența dumnilliloruavoasti aoa, militari ditu șapti văsilii NATO, alargu di văsiliili a voastre, hiinda anănghisiţ niscănti ori s’ţănă keptu a născăntoru circumstanțe dificile, dimonstreadză că solidaritatea NATO easti testată tru momenti critiţi”, spusi Văsillelu Filip. Prezidintul ali Franță, Emmanuel Macron, vizită ñiercuri și baza aeriană Mihail Kogălniceanu ditu giudiţlu Constanța. Cu aestă furñie, prezidintul Klaus Iohannis spusi că ateali dauă văsilii suntu ligate pritu ligături excelente. Cooperarea anamisa di România și Franța tru domeniul a securitatillei criscu semnificativ tru meşlli ditu soni, pi fondul a invaziillei aruse tru Ucraina, spusi prezidintul a României, exprimânda diznău pricunuştearea tră prezența a askeriloru franceze tru România și tră priloarea ali Franței tru cumandulu a gruplui di alumtă NATO tru văsilia a noastra.
FISCALITATE – Administrația Fiscală Națională (ANAF) va s’facă ahurhinda cu 1 alunaru controali suplimentare tră examinarea a catandisiloru financiare a persoanilor tră cari ari şubei di evaziune fiscală. Șeful administrației, Lucian Heiuș, diclară viniri că ANAF află ună dheafurauă di 20 miliardi di euro anamisa di venitul estimat și aţelu diclarat tru cazlu a 560 di ñilli di persoane. Lucian Heiuș spusi că numirul a echipelor cariinspecteadză situațiile financiare va s’crească di la 22 ţi suntu tora la 100, kiro tru cari numirlu a inspectorilor va s’hibă suplimentat ma largu ahuhrinda di anlu ţi yini.
ARiFUGAȚ – Poliția di Sinur Română dimăndă că 100.644 di persoane intrară gioi tru România, ditu cari 9.766 suntu cetățeni ucraineni. Ditu aesţă, 5.557 tricură sinurlu tru România ditu Ucraina și 1.156 ditu Moldova. Ditu 24 di şcurtu până gioi, aproximativ 1.221.710 di cetăţeni ucraineni intrară tru România.
Autoru: Udălu a hăbărloru
Armânipsearea: Taşcu Lala
