Hăbări ditu bana românească şi internaţională
Cod fiscal – Ministerul di Finanțe analizeadză săptămâna aesta ună posibilă alăxeari a Codului fiscal, după ţi Partidul Național Liberal – PNL și Partidul Social Dimocrat – PSD s’akicăsiră că lipseaşti faptăma bună adnarea a fondurilor la bugetul di stat. Social-dimocrații zburascu ti oportunitatea revenirillei la impozitarea progresivă, iara liberalii apără impozitul unic, la cari spun că nu sunt etiñi s’tragă măna. Dauli părță da asigurări că nu va s’aibă năi taxe și taxe ti români.
Newsroom, 23.05.2022, 18:45
Ucraina – Numirul a persoanelor forțate s’fugă di conflict, prişcăville, călcări a ndrepturilor a omului și persecuții năstricu ti prota oara 100 di milioane, di itia a polimlui ditu Ucraina și a altor conflicte mortale, spuni ună diclarație Analtului Comisar al ONU tră Refugiații (UNHCR). Cifra di 100 di milioane di oameni esti lăhtăroasă, găilipsitoari și nu lipsea vrnăoară s’hibă agiumtă, diclară Analtul Comisar al ONU tră Refugiați, Filippo Grandi. Până tu bitisita a anlui 2021, numirlu a persoanelor strămutate la nivel mondial agiumsi la 90 di milioane di itia a năiloru dăldză di prişcăville i a conflictilor prilundzite tu văsili cum Etiopia, Burkina Faso, Myanmar, Nigeria, Afganistan și Republica Dimocrată Congo. Pe 24 şcurtu, prezidintulu rus Vladimir Putin diadi cumandu aputrusearea a Ucrainăllei viţină, arucânda nica milioane di oameni pi geadii ta s’fugă di alumti și s’agiungă tu regiunile ma puțăn expuse i tu alte țări. Europa nu cunuscu un aflux ahât di rapid di arifugaț di la bitisita a Doilui Polimu Mondial, subliniază UNHCR. Aproapea 6,5 milioane di ucraineni fudziră ditu văsilie, majoritatea mulleri şi cilimeañi, iar ONU estimeadză că numirul aluştora poati s’treacă di 8 milioane până tu bitisita a anului.
Arifugaț — Numirul a cetățenilor ucraineni cari intrară dumănică tru România scădzu cu 17,4% andicra di dzuua precedintă, uidisitu cu unu comunicat a Inspectoratlui General ali Poliției di Frontieră, apufusitu luni. Di la diclanșarea a crizăllei și până dumănică, cama di ună miliuni di cetățeni ucraineni intrară tru România. MAI precizeadză că gradlu di ocupare tru ţentrele di cazare ale Inspectoratului General tră Imigrări easte di aproape 47%. Ditu 18 marţu, idyiulu Inspectorat eliberă 27.353 di permise di șidiari tră beneficiarii di protecție temporară. Tutunăoară, di la ahurhita a conflictului ditu Ucraina, 4.349 di cetățeni ucraineni căftară azil tru România, şi s’hărsescu di tuti ndrepturile pruvidzute di legislația națională.
Autoru: Udălu a hăbărloru
Armânipsearea: Taşcu Lala
