Hăbări ditu bana românească şi internaţională
Vizita. România apănghiseaşti sute di ñilli di cilimeani, mulleri și auşi cari fug di polimu, iara gaeretea faptă di populu român va s’hibă adusă aminti ca un simbol di solidaritate și mintiminille, tu kirolu anda națiunea ș’dişcllisi porțile a irinillei și libertatillei ti fraţlli a loru. Aesta fu ună diclarație transmisă sâmbătă di guvern cu itia a unei andamasi anamisa di Mădălina Turza, consilier di stat și coordonator strategic a asistențăllei umanitare tră arifugaţ, și Prima Doamnă a Statelor Unite, Jill Biden. Aesta ditu soni şi spusi andrupămintulu pan di mardzina ti agiutarea și solidaritatea statelor aflate tru caplu a kivernisearillei criza ucraineane. Ea vizită ună școală cari apănghiseaşti mulleri și cilimeani arifugaţ ditu Ucraina și s’cunoscu cu Prima Doamnă a României, Carmen Iohannis. Viniri, anda agiumsi tru România, dr. Bidin vizită baza aeriană Mihail Kogălniceanu ditu sud-estul României, iu s’andamusi cu armata americană. Vizita a llei tru România s’fati ti ma ptănu di doi meşi di anda eara vinită viţeprezidinta Kamala Harris. După România, ea nkisi tru Slovacia tră s’lu spună agiutorlu ali administrație americane tră arifugaţlli ucraineni.
Newsroom, 08.05.2022, 18:41
Arifugaţ. Pisti 9.000 di cetățeni ucraineni tricură sâmbătă sinurlu tru România, tru creaștere cu pisti 12% andicra di dzua precedintă. 5.000 intrară pritu sinurlu cu Ucraina, iara alanţă pritu sinurlu moldo-românu. Di la huhrita ali aputruseari aruse ditu 24 di şcurtu și până tru 7 mai, pisti 884.000 di cetățeni ucraineni tricură sinurlu tru România viţină. Poliția di sinuru română diclară că ari suplimentată numirlu di personal și controalele la sinuru suntu fapti cu hăiri.
Ucraina. Marea Britanie diclară că va s’ada unu agiutoru militar suplimentar ali Ucraină tru valoare di 1,3 miliardi di lire sterline. Hăbarea fu faptă nintea ali ună andamasi pritu link vidio a lidirilor G7 cu prezidintulu ucrainean Volodymyr Zelensky. Aestu easti nai cama mari pitricut di Marea Britanie tru un conflict di după Irak și Afganistan. NATO lugurseaşti că polimuul a Rusiillei contra ali Ucrainei nu va s’bitisească curundu, ama că aesta ditu soni va s’hibă tru amprotusa și NATO va s’da asistență, diclară secretarul genearal al Alianței, Jens Stoltenberg. Misiunea prinţipală a NATO easti di preveniri arăspândirea a polimuului nafoara ali Ucraină și tra s’ñîcureadză riscurile pritu apărare colectivă și discurajare și anvărtuşearea a pozițiilor a llei pe flancul estic. Stoltenberg spusi că Germania lu ari arolu principal tru aeastă misiune. La sol, Ucraina bombardă pozițiile arusești pe Nisia a Priciloru, cari easti la aproximativ 45 km di România. Tutunăoară, s-duc ninti eforturile diplomatiţi tra ş’ascapă alumtătorllii acăţaţ tru oțelăria Azovstal, aţelu ditu soni sturu a forțelor ucrainene ditu căsăbălu-port Mariupol, după ţi ultimii ţivilli fură purtaţ sâmbătă.
Yiurtuseari. Europa di Vest sărbăturrtiseaşti adză 77 di ani di la bitisita a Doilui Polimu Mondial. Tru Franța, iu aesta easti sărbătoare națională, s’ţănu ţeremonii la mirminţălli militari și la memoriale di polimu, iara prezidintulu Emmanuel Macron dipune lilici la ayalma a generalului Charles di Gaulle și la murmintul a askirlălui nicunuscut di sum Arcul di Triumf. Sărbătorile adzuăllei di 8 nica s’tănu anlu aestu tru un context internațional apresu di itia a polimlui ditu Ucraina, aliații di aoa şi 77 di ani ocupânda tora poziții diferite. Sâmbătă, cându diadi giuratlu ti doilu mandat, prezidintulu Macron cundille ananghea a unitatillei europene tra s’tănă keptu a provocărilor aluştui secol.
Autoru: Udălu a hăbărloru
Armânipsearea: Taşcu Lala
