Hăbări ditu bana românească şi internaţională
CORONAVIRUS — Aproapea 4.000 di năi infecții cu Covid-19 fură raportate adză tru România, ma multu andicra di dublul a tifrăllei di luni. Tutunăoară, fură raportate 52 di decese asociate, ditu cari 5 di la ună dată anterioară. Ministrul a Sănătatillei, Alexandru Rafila, spune că numirlu a infecțiilor ditu aestă a 5-a dalgă a pandemiillei easti di așteptat s’hibă diplo andicra di aţelu ditu 4-a dalgă, cându fură 400.000 di cazuri confirmate. Di la debutlu a pandemiillei, pisti 1,8 milioane di oameni ditu România fură infectați și aproapea 60 di ñilli muriră. Văsilia ari a daua nai ma scădzută rată di imunizare ditu UE, după Bulgaria. Ma puțăn di 7,9 milioane di români fură vaccinaț integral, aţea ţi reprezintă puțăn pisti 40% ditu populația eligibilă. Aproapea 2 milioane ditu elli feaţiră, tutunăoară, booster jab.
Newsroom, 04.01.2022, 18:52
ENERGIE – Premierlu român Nicolae Ciucă avu adză ună andamasi di lucru cu membrilli a cabinetului a lui și reprezentanțălli a companiilor Transelectrica, Transgaz și Romgaz, tră s’facă isapi catandisea a pregătirilor tră sezonlu di iarnă, ditu videala-a sectorului energetic. Uidisitu cu biroulu di presă a Guvernului, concluzia andamasillei di lucru fu atea că furnizarea di energie electrică easti asiguripsită tră serviciile esențiale, consumatorlli casniţ și tră alti categorii di consumatori. Tutunăoară, ari duri stocuri di gaze naturale tra s’anvălească căftarea.
COLECTIV – Curtea di Apel București amână luni cu doi meşi, până tu 3 di marţu, pronunțarea definitivă tru dosarlu a aţiloru stipsiţ di tragedia ditu 30 di sumedru 2015, la București, cându 65 di persoane muriră tru marli focu ţ s’feaţi tru kirolu a unui concert tru Clubul Colectiv. Tru andreu 2019, Tribunalu București, prima instanță, pronunță pideapsi di până la 13 di ani di hăpsani și păltearea a născăntoru zñii totali di pisti 50 di milioane di lei (10 milioane di euro) a familiilor victimilor.
TURISM – Turiştilli români hărgiuiră cu ucazea a Anlui Nău aproapea 45 di milioane di euro pi distinaţii di călătorie xeani şi 30 di milioane di euro pi destinaţii interne, uidisitu cu un raportu a Asociaţiilei Naţionale a Agenţiilor di Turism. Tru România, sejurlu di mesi fu di 2 până la 3 nopță, iara destinațiile prefearate a turiștilor earau stațiuñile di munti și locărli di pritu hori. Destinațiile preferate di călătorii ditu xeani fură Egipt, Dubai, Zanzibar, Republica Dominicană, Maldive, Sri Lanka, Kenya și America Latină. Aproapea 10 ñilli di români fudziră tru city-break-uri tru Europa, maxusu tru căsăbadz cata cumu Atena, Paris, Praga, Roma ică Barcelona.
Autoru: Udălu a hăbărlor
Armânipsearia: Taşcu Lala
