Omlu a Anlui 2021 la Radio România Internaţional
Vruţ soţ, Radio România Internaţional u dusi ma largu tradiţionala anchetă di opinie tu arada-a ascultătorloru a llui şi ufilisitorlli di Internet şi cu şingirili suţiali tra s’apufusească cari ditu personalităţli a prezentului alăsară toru nai cama multu tru 2021, tru noima pozitivă, tu lumi.
Newsroom, 02.01.2022, 15:00
Cum s’minduea, nu “Omlu a Anlui 2021 la RRI”, ama “Oamiñilli a anlui 2021 la Radio România Internaţional” fură alepţă, diznău, lucrătorlli ditu domeniul a sănătatillei ditu tută lumea, aflaţ tru linia antăñea a alumtăllei contra a pandemiillei di COVID-19, ama şi tuț dizvoltatorllii di vaccinuri contra COVID-19, cu menţiuni speţiale tra yeaţărlli germani şi thimilliusitorlli a laboratoarelor BioNTech Uğur Şahin şi Özlem Türeci, cari dizvultară un vaccin contra a lăngoarillei, nica şi biochimista maghiară Katalin Karikó cari avu contribut la dizvoltarea a tehnologiillei ARN mesager ţi şeadi la thimellilu a născăntoru ditu vaccinurli anti-COVID-19. Ditu arada a aţiloru cari lli-aleapsiră tu harea di “Oamiñilli a anlui 2021 la Radio România Internaţional” eara ascultătorlli Michael Willruth şi Siegbert Gerhard ditu Germania, Norihiko Idi, ditu Japonia, Guido Panebianco, ditu Italia, David Iurescia, ditu Argentina, Paul Jamet, ditu Franţa.
Nica eara nominalizaţ jurnaliștilli și prezentatorlli cari deadiră hăbări alithea ditu ahurhita-a pandemiillei, yeaturlu Annalisa Malara, cari diagnostică protlu caz di COVID-19 tru Italia, şi yeaturlu Marco Stabile, cari află că heparina ñicureadză cazurli di tromboză, di lli-ascapă cu bană pacienţălli.
Ditu arada-a liderloru ţi eara pripuşi fură aţelu di ma ninti canţelaru german Angela Merkel, prezidentulu ali SUA, Joe Biden, prezidentulu rus Vladimir Putin, prezidentulu ali Comisie Europene, Ursula von der Leyen, ambasadorlu ali Românie tru Italia cari ş’bitiseaşti mandatlu, George Bologan. Ună nominalizari lo, per anasmblu, COP26, summitlu mutrinda alăxerli climatiţi.
Nica eara pripuşi “Omlu a Anlui 2021”, ntră alţălli, antreprenorlu american Jeff Bezos, revelaţia a tenislui mondial feminin Emma Răducanu, Asociaţia umanitară «Auvergne pour un enfant», YouTuberul somalez AboFlah, echipa di fotbal ali Algerie, amintătoarea a Cupăllei Arabă 2021 pi naţiuni, ică yeaţărlli cari lu-ascăpară fotbalistul danez Christian Eriksen după criza cardiacă ţi u avu pi teren, tru meslu cirişaru.
Autoru: Eugen Cojocariu
Armânipsearea: Taşcu Lala
