Ambasadorlu Andrei Muraru ahurheaşti voltă tru comunităţ româneşti ditu SUA
Ambasadorlu ali Românie tru Statele Unite ali Americă, Andrei Muraru, ahurheaşti unu bairu di viiziti tru comunităţli româneşti ditu statili americani cu numa 50 States, One Community.
Eugen Cojocariu, 30.10.2021, 11:11
Voi s’nă cunuştemu personalu, cari ţi s’hibă punctulu carditnalu ali Americă tru cari hiţ. Voi să spunemu deadunu pirmitusearea ali Românie şi pritu aestă nkisită, amu mirakea ta s’himu parteneri tră băgarea tu lucru a unlui dezidearatu cari reprezintă ună ditu nai ma di simasie lucri di amprotusa a mandatlui a meu di ambasadoru: intrarea ali Românie tru Programlu Visa Waiver. Ti aesta, amu ananghi di agiutorlu a vostru, di minteari susto tru proţeslu di cooptari a autorităţlor americani, declară Muraru tru unu mesaju pitricutu tră comunitatea di români ditu SUA.
Prota vizită ufiţială ca parti aliştei voltă ahurheaşti, tru bitisita-a aliştei stămănă, tru statlu Ohio, iu Muraru s’andămuseaşti cu membrilli a comunitatillei di româñi, viziteadză Catedrala Ortodoxă Română Sămta Maria di Cleveland şi Gărdina Culturală Română. Tutunăoară, ambasadorlu român va s’aibă andamusi cu cumăndusearea Cleveland State University şi cumăndusearea-a companiillei Timken.
Andrei Muraru aleapsi, ună turlie simbolicu, s’ahurhească aestu baiuru di viziti cu statlu Ohio, aestu hiinda unu ditu statili ţintă a protăllei dalgă di emigraţie românească. Tru Ohio, maxusu tru zona a căsăbălui Cleveland, easti ună ditu nai cama veclli comunităţ di români ditu SUA. Catedrala Ortodoxă Română Sămta Maria ditu Cleveland easti nai cama veaclle parohie românească ortodoxă ditu SUA, tru 2004 yiurtusinda 100 di añi di existenţă. Tutunăoară, ditu Cleveland International Hall of Fame History fac parti ma mulţ membri di orighini română.
Gărdina Culturală Română, thimilliusită tru 1967, faţi parti ditu bairlu a Gărdiñiloru Culturali ditu Cleveland, aestu hiinda un parcu public nreghistratu tru Reghistrulu Naţionalu a Locurlor Istoriţi ditu SUA. Tru Gărdina Culturală Română ari ună statuie a compozitorlui George Enescu şi easti anălţată niacumtinatu hlambura ali Românie. Pi indicatorlu cari da exighiseri mutrinda Gărdina Culturală Română, să spuni că Societatea Carpatina, prota societati românească ditu America, fu thimilliusită tru 1 di brumaru 1902, cându ună ñică parei di 41 di româñi s-andămusi şi băgă thimeallili a societatillei. Tru Cleveland ari unu Consulatu Gheneralu Onorific ali Românie. Tutunăoară, tru zona Cleveland easti localizatu scamnulu a Uniunillei şi a Ligăllei Societăţloru Româneşti ditu America, nai ma veaclle organizaţie a româñilor americañi.
Autoru: Eugen Cojocariu
Armânipsearea: Taşcu Lala
