Hăbări ditu bana românească şi internaţională
Campania di vaccinare fu ayălisită și easti ananghi di meatri urgenti, declară marță prezidentulu român Klaus Johannes. Easti unu kiro anda duñeaua tradzi di lăngoari cabaia multu, una dramă națională di proporții teribile, iara vaccinarea easti goala cearei cari funcționează tru tuti văsiliili, spusi prezidentulu. Prezidentulu Klaus Johannes dimăndă că va s’adună ñiercuri cu tuti autoritățile axiziti tră să zburască ti băgari tu lucru niscănti meatri restrictivi cari potu s’ñicureadză arăspăndearea-a infecțiillei. România nreghistră marță un numiru recordu di năi cazuri di coronavirus tru unu kiro di 24 di săhăţ di la pandemie – 18.863, pi thimellilu a aţiloru 81.000 di testi adrati.
Newsroom, 20.10.2021, 11:29
Institutlu Naționalu di Sănătate Publică dimăndă 574 di morţă la pacienții infectaț cu SARS-CoV-2, ditu cari 13 muriră ninti di intervalu di referință. Uidisitu cu autoritățli, nu ari apaturi di tearapie intensivă tră paciențăllii cu coronavirus tru tută văsilia. Ministrul di interne tru ipotisi, Lucian Bodi, spusi că 26 di pacienți fură transfearaț tru Ungaria. Di altă parte, 32 di yeaţră ditu Ripublica Moldova viniră luni tru România. Kiro di 12 di dzăli, ellli va s’yitripsească paciențăllii cu COVID-19 tru un spital modular ditu Leţcani, giudeţlu Iași (partea di nord-est a României). România apufusi năi obiectivi di vaccinare, di itia că aţeali di ma ninti nu ndreapsiră ici ţiva. Tru aistu kiro, numirlu a persoanelor vaccinate simfunu cu schema completă agiumsi la aproximativ 5,7 miliuñi.
Candidațlli tră funcții ministeriali pripusi di premierlu aleptu Dacian Ciolos tru guvernul monocrom a Uniunillei Salvați România fură avdzăţ marț tru comisiile parlamentare specializate di București. Aproapea tuț loară ună opinie negativă, cu ună goală excepție: Catalin Drula, cari fu nominalizată la ipotisea di ministru a Transporturlor, cari nu amintă duri voturi tră ună opinie negativă. Foștilli miniștri ditu guvernul demisionat PNL-USR-UDMR, cumăndusitu di liberaluFlorin Căţu, inclusiv Stelian Ion, nominalizat tră justiție, ică Ioanna Mihăilă, tră sănătate, viniră dinintea a senatorilor și a parlamentarilor. Fostul viţepremier Dan Barna fu nominalizat tră portofoliul a Ministerlui Afacerlor Externi. Anamisa di năili nume s’arădăpsescu activistul tră fise Mihai Gotziu tru ipotisea di ministru a fisillei, fostul prefectu ali capitală Alin Stoica tru harea di ministru di interni ică fostul pilot militar Niko Falkoi tru harea di ministru ali apărari. Opinia-a consiliului easti consultativă. Apofasea USR ta s’ducă la parlamentu cu guvernul minoritaru fu loată după ţi negocierli cu foștilli parteneri di guvernămintu mutrinda znuearea a coalițiillei eșuară. PNL și UDMR nu vor s’ducă ma largu coopeararea cu USR, di itia că fostul partener di guvernămintu votă contra a guvernului a curi membru eara. Nica și Partidlu Social Democrat (PSD), tru opoziție, nu ndrupaşti guvernul cumăndusitu di Ciolos și lu-stipseaşti ti iresponsabilitate, di itia cău lundzeaşti criza politică. Social-democrațllii și AUR caftă alidzeri anticipate. Tră s’hibă votatu guvernulu al Dacian Colos, lipseaşti s’amintă 234 di voturi tru parlament, iar USR ari maş 80 di deputaţ. Votarea tru sesiunea plenară a parlamentului easti programată ñiercuri.
Favrica Fordu di Craiova (sud-vestul României) u ñicureadză temporar producția di itia a ixikillei di semiconductori. Până gioi, fabrica va s’lucreadză maş tu unu schimbu, tru loc di trei, tru făvriţ di producție di vehiculi și motoari. Va s’da prioritati ti aftukinatli tră cari fură vulusiti contracti, dimăndă reprezentanțăllii a companiillei. Lucrătorlli cari şedu acasă va s’aibă un suplimentu di 78% ditu tiñiia di cafi mesu di bază. Favrica Dacia ditu Mioveni, giudelu Argeș (sudul a Româniillei), cari easti a gruplui auto francez Renault, ahurhi s’lucreadză tu 8 di sumedru di itiaa a ixikillei componentiloru electroniţi. Aproapea 90% ditu aţelli 14.000 di angajaț nu lucrară.
Autoru: Udălu a hăbărloru
Armânipsearea: Taşcu Lala
