Klaus Iohannis, pi muabeti cu Donald Trump
Prezidentul Klaus Iohannis avu, sâmbătă, unâ muabeti pi tilefunu cu prezidentul a Statilor Unite ali Americâ, Donald Trump, muabeti, ți u câftâ partea americanâ. Muabețli avurâ tu amprotusa criza epidemiologhicâ ți u adusi năulu coronavirus ş’turliili di anvârtușeari a ligâturâllei transatlanticâ şi ațea a Parteneriatlui Strateghicu româno-american, dimândâ Administrația Prezidențialâ.
Tașcu Lala, 26.04.2020, 07:30
Caplu a statlui român dimândâ câ easti solidaru cu populu american şi pitreați puryurii trâ oamiñilli ți kirurâ di itia a pandemiillei fitrusitâ cu năulu coronavirus.
Tutunâoarâ, prezidentul Iohannis hâristuseaști trâ agiutorlu ți-lu-deadi SUA ti cratlu a nostru, și aduți aminti tu aestâ noimâ, licșurărli fapti di partea americanâ ti ufilisearea-a avioanilor di transportu sum egida Strategic Airlift Capability ditu cadhurlu NATO, cari adusirâ tu România hâlăț ti viglleari di mari simasie trâ personalu medicalu.
Klaus Iohannis scoasi tu migdani şi agiutorlu american pritu cari România, ari amintată un echipamentu di detecţie di turlia RT-PCR, pritu un program a Agenţiillei Internaţionalâ trâ Energhie Atomică (AIEA), finanţatu di SUA, catacum şi agiutorlu di 800.000 di dolari trâ România ahârdzitu mași ti alumta contra a pandemiillei cu năulu coronavirus.
Doilli şefañi di statu tricurâ tu aradâ meatrili apufusiti tu dauli stati, rezultatili a aluștoru, catacum şi planurli di lucru tu vahtea di kiro ți yini tu comatli medicalu şi icunomicu, nica sâ spuni tu comunicatlu ali Administrație Prezidențialâ.
Prezidentul Klaus Iohannis cundille tu amprotusa câ autorităţli români au tu videalâ, asiguripsearea, tuti hâlățli și medicamentili ți suntu ananghi ti com-bâtearea cu hâiri a pandemiillei. Tu aestâ noimâ, prezidentul Donald Trump spusi câ ari naeti s’pitreacâ a cratlui a nostrum ventilatoari trâ dotarea-a spitalilor, nica spuni Administraţia Prezidenţială.
Klaus Iohannis şi Donald Trump nâpoi adusirâ aminti ti borgea ți u-au dauli stati trâ solidaritatea-a Parteneriatlui Strateghicu bilateral, catacum şi trâ anvârtușearea-a lucărlui deadun tu comata-a securitatillei și ațea icunomicâ.
Armânipsearea: Tașcu Lala
