Stămână di malămă tră sportulu românescu
Nataţia, atletismul, tenisul di masă şi sporturli nautiţi lli-adusiră diznău româñilli tru elitele continentale, după ani di dzăli di evoluţii andirsiti.
Florin Orban, 22.08.2022, 14:34
Dzăli ditu soni fură fantastiţi tră sportivllii cari u reprezentară România la ma multi campionate europene. Nataţia, atletismul, tenisul di masă şi sporturile nautiţi năpoi ll-adusiră românii tru elitele continentale, după ani di dzăli di evoluţii andirsiti. Stămâna tricută ahurhi cu victoria di luni a anutătorului David Popovici la Europenele di Roma tru proba di 200 di metri liber. Campion mondial en titre ali distanţă, românlu s-impusi cu timpul di un minut, 47 di secundi şi 97 di sutimi, nău record mondial şi european di juniori, cum şi ali competiţie. Aestă victorie s-adăvgă la titlulu european amintatu cu dauă dzăli ninte la 100 di metri liber, iu David bătu recordul mondial.
La atletismu, România numata avea amintată ună malămă continentală di 20 ani, cama di tamamu ditu 2002, când Ionela Tîrlea s’impunea, la München, tru finala europeană di la 400 di metri garduri. Tut la München, ñiercurea tricută, Bianca Ghelber amintă medalia di malămă la Campionatele Europene, tru proba di arcari a cioclui. Ea s-impusi cu rezultatlu di 72 di metari şi 72 di centimeatri, cu 60 di centimeatri pisti arcarea a polonezăllei Ewa Rozanska, medaliată cu asimi. La Jocurile Olimpice di Tokyo, di anlu tricut, şi la Mondialele dizvărtiti tru alunaru, tru Statele Unite, Bianca s-clasă, cathi oară, pe loclu 6.
La tenis di masă, nai ma multe medalii viniră di la proba feminină di dublu. Bernaditte Szőcs amintă titlul continental diadunu cu agiucătoarea austriacă Sofia Polcanova, sportivă amintată tru Republica Moldova. Eali azvimsiră, gioi, tru finală preacllea română tu cari eara Elizabeta Samara şi Andreea Dragoman, cari armasiră cu medaliili di asimi. Ună altă sportivă ditu România, Adina Diaconu, amintă medalia di brondzu, tru preaclle cu Maria Xiao, ditu Spania. Nica să spunemu că Bernaditte amintă, München, ună medalie di asimi, tru proba di dublu mixt, diadunu cu Ovidiu Ionescu. Ea avea tru palmares nica dauă titluri continentale, amintati Luxemburg, tru 2017, diapoa Nantes, tru 2019, cu echipa ali Românie.
Tut tru cadrul a Campionatilor Europene Multisport di München s-dizvărtiră şi competiţiile continentale di kaiac-canoe. Cătălin Chirilă, campion mondial en titre tu prova di canoe simplu 1000 di metri, provă olimpică, şi spusi sâmbătă axia, amintănda şi malăma europeană. Diapoa, dumănică, la 500 di metri, amintă medalia di brundzu. Rezultate ma buni numata eara amintati la competiţiile continentale di canoe simplu ditu 2006, cându, la Racice, tru Cehia, Florin Mironcic amintă titlul european la 1000 di metri şi asimea la 500.
Autoru: Florin Orban
Armânipsearia: Taşcu Lala
