Năi misuri di plafonari păhadzlli la energie
Guvernul di București adoptă năi misuri di agiutari consumatorlli casniţ şi ñiţli companii, andicra di criştearea-a păhadzloru la energie. Aesţă va s’bagă tu practico maş ti atelli doi meşi ţi yinu di aoa şi nclo. Pritu ordonanţa di urgenţă promovată, tora ayoñea, di executiv, s-apufusi şi un nău cuantum a amendzălor tră furnizorii cari nu va s’facă isapea corectă la facturi și nu tiñîsescu nomlu. Eali pot s’alină până la 200 di ñilli di lei (cca. 40 di mii di euro). Ordonanţa di urgenţă apufuseaşti ună nauă schemă di compensare şi plafonare cari s’bagă a cetăţenilor, ama şi a instituţiilor di la 1 di şcurtu până la 31 di marţu. Aesta nu poati ta s’bagă ama retroactiv şi tră meslu yinaru, ași cumu căftă PSD, partenerlu di guvernare a PNL. Uidisitu cu un aviz ditu partea Ministerului di Justiţie, muştiradzlli casnici va s’llia ună compensaţie ma mare, tru valoare di nai mult 0,291 di lei pe kWh la energia electrică şi nai mult 40% ditu valoarea componentăllei păhălu la gazele naturale. Tutunăoară, creasti și plafonarea a păhălui la ateali dauă importante utilităț.
Mihai Pelin, 26.01.2022, 20:48
Premierul Nicolae Ciucă “Tră populaţie vărnu nu va s’păltească ma multu di 80 di bani pe kWh energie electrică şi 31 bani la gaze naturale indiferentu di consum. Tră consumatorlli casniţ cu un consum di până la 500 di kWh energie electrică ică 300 metri cubi gaze naturale va s’păltească 68 di bani tră kWh la energie electrică şi aproapea 22 bani tră gaze naturale, cu tute taxili incluse.”
Tu arada a lui, ministrul Energiei, Virgil Popescu, exighisi cum lipseaşti s’hibă ună factură la energie, după ţi va s’bagă misurli di compensare şi plafonare. Virgil Popescu “Vărnu ţi consuma 500 di kilowaţi ninti ta s’crească aestu plafon, păltea 1 leu pe kilowatt. Ma să scadă plafonlu, palteaște 80 di bani şi s’ncadreadză tru plaja di consum, si car ava s’bagă şi aţel discount, pălteasti 68 di bani. Tut cu tutu, pălteşte aproapea 300 şi ţiva di lei.”
Actul normativ adoptat di Guvernu pruveadi ñicurări şi tră consumatorii noncasniţ, tră cari păhălu va s’hibă plafonat la un leu pe kilowatt la energia electrică şi la 37 di bani pe kilowatt la gazili naturale. Aesti misuri nu s’bagă a marilor consumatori di energie electrică, di exemplu Centralelor Electrice di Termoficari, cari avură di agiutor di stat pi ună schemă aprobată di Comisia Europeană. Membrilli a Guvernului nu apufusiră ţi va s’facă după 1 apriliu. Misurli va s’hibă zburăti la nivelu a coaliţiillei di guvernare, cari lipseaşti s’agiungă la un consens, tru ligătură cu păhadzllli la energie di să zburaşti nica şiti ună reglementare a păzarillei tră ună perioadă di ndoi meşi. Ordonața yini tru contextul tru cari, tru kirolu ditu soni, mulţă români avură facturi exorbitante la gaz și curentu, după ţi ună mare parte ditu furnizori nu băgară tu lucru misurile di plafonare și compensare, intrati tu practico la 1 di brumaru 2021.
Autor: Mihai Pelin
Armânipsearia: Taşcu Lala
