Niifharistuserli a profesorilor
Sindicatili ditu nvițământul românesc ahurhiră, tru prota stămână a semestrului doi a anlui școlar, protestile andicra di apofasili autoritățlor, inclusiv mutrinda criştearea a tiñiiloru di cafi mesu di maş 4,5%. Sindicaliştilli caftă nica şi tra s’ahărdzească 6 proţente ditu Produsul Internu Brut tră finanţarea a Educaţiillei, vor s’lă si da sporurli tră condiţiile di lucru, s’hibă păltiţ tră oarile suplimentari, ama şi s’hibă criscut numirlu di posturi didactiţi.
Daniela Budu, 19.01.2022, 13:52
Acă tu bitisita a anlui ţi tricu aeşti fuvirsea cu greva generală tru Educație ditu 10 yinaru, s-trapsi mănă di la aestă idhee di itia a concediilor a profesorlor. Prezidentulu a Federaţiillei Sindicatilor Libere ditu Nviţământu, Simion Hăncescu, spuni că numirlu a aţiloru niifharistusiţ creaști di itia a ixikilei di reacţie di partea autorităţlor.
Simion Hăncescu: “Easti zborlu ti ună mănuclliu di niifharistuseri. Tu 6 di andreu pitricumu la sediul a Guvernului ali Românie 163.000 di semnături ti ndrupari ună căftari pritu cari vremu s’bagă tu lucru Nomlu 153 di la data di 1 yinaru 2022. Ti amărtie nu aprukemu niţi ună apandisi. Vini arada, deapoa trei dzăli dzăli di protestu dinintea a sediului a Guvernului; iara niţi ună apandisi ditu partea a şeflui a Executivului. Avumu nica ună dzuuă di pichetari stămâna tricută şi cadealihea că lom apofasi ta s’triţemu pi ună turlie di protestu tru cari s’hibă mintiţ ma mulţă oameni. Vor grevă generală”.
Uidisitu cu prezidentulu a Federaţiillei Sindicatilor ditu Educaţie “Spiru Haret”, Marius Nistor, spuni că nu maş lucrătorlli ditu nviţământu aflaţ dinăpoia a catedrăllei sunt niifharistusiţ di catandisi: “U spunu multu limbidu că nu zburămu maş ti profesori, ti personal didactic di predari. Easti zborlu ti tutu personalu cari ş-dizvărteaşti lucurlu tu ună unitate şcolară: personal didactic di predari, didactic auxiliar şi nididactic, tuţ colegilli a noştri, indiferent di funcţia ţi u au la nivelu a unităţlor di nvăţămintu”.
Di partea a autoritățlor, ministurlu a Educaţiillei, Sorin Cîmpeanu, lugurseaşti că tiñiili di cafi mesu a cadrilor didactiţi lipseaşti s’hibă motivante şi că easti normală niifharistusearea a aţiloru cari protesteadză di itia că nu s’băgă tu practico nomlu ditu 2017. Cu tuti aestea, ministurlu faţi cllimari la akicăsear di partea a profesorlor, cu căndăsearea că ma marea parti a aluştoru nu va s’alasă nanăparti elevlli, ţi suntu di baia kiro zñiipsiţ, di nviţământul online di itia a contextului epidimiologic.
Uidisitu cu ufiţiali, dupu majorărli fapti pănă tora, un profesor debutantu ari ună tinie di cafi mesu netă di 2.597 di lei, dimi niheamă pisti 500 di euro, iara un profesoru cu vicllimi tru lucru di 40 di añi ş’cama-4.398 di lei, dimecu aproapea 900 di euro. La aesti tiñii di cafi mesu potu s’hibă adăvgati, aşi cumu spuni ministurlu Cîmpeanu, sporuri. Nu maş profesorlli suntu niifharistusiţ di apofasili autoritățlor. Dzălili di ma ninti, ună parti ditu elevi mutară capu andicra di “tăllearea” a niscăntoru dit bursile şcolari, ama ministerlu ali Educației nu s’turnă ta s’li veadă diznău apofasili loati.
Autor: Daniela Budu
Armânipsearia: Taşcu Lala
