Ritrădzearea-a unlui mari campion
Florin Orban, 20.11.2021, 07:52
Nai ma valoros agiucător di dublu ditu istoria-a tenisului românescu, Horia Tecău, deadi hăbari că s’tradzi ditu activitatea competițională. Ari amintată tu cariera a lui, 38 di turnee ATP, trei Grand Slam-uri și ună medalie di asimi la Agiocurli Olimpiţi.
Tenismanul român Horia Tecău deadi hăbari, gioi, după aţelu ditu soni agiocu disputat la Turneulu a Campionilor di Torino,că s’tradzi ditu activitatea competițională. Pi Facebook, el angrăpsi: Multi emoţii cură tru aestă oară. Escu pricunuscătoru. Tră imnaticu, tră atea ţi amu bănată, tră oamiñilli pi cari lli-andămusiiu. Sportul fu loclu a meu di agioacă, şcoala-a mea, mi anviţă s’anyisedzu, s’amu pisti şi s’mi perfecţionedzu cu kirolu. Energhia-a terenlui di tenis şi a a aţiloru cu miraki ti tenisu ăñi deadiră ună multu mari pricunuşteari şi va lu-amu aestu sentiment tră totna. Tora vini oara s’mi hărsescu di bană altă turlie şi s’alăxescu tută aestă energhie tru ună nauă turlie”.
Horia Tecău și ghimanlu Kevin Krawietz ș’bitisiră evoluția la Turneulu a Campionilor di anlu aestu cu ună victorie dinintea a preacllilei adrată ditu spaniolu Marcel Granollers și argentinianlu Horacio Zeballos, cu 6-3, 6-7, 10-6. Nu fu duri tra s’agiungă ma largu, maca avea kirută protili dauă agiocuri disputate Torino. Românlu armâne tru palmares cu șapti participări la Turneulu a Campionilor. La edițiile preţedenti fu prezentu di dauă ori deadunu cu suedezlu Robert Lindstedt și di patru ori cu olandezlu Jean-Julien Rojer, cu cari amintă trofeulu tru 2015.
Horia Tecău s-amintă Braşov, la 19 di yinaru 1985. Aguoacă tenis di la ilikia di 7 añi. Tru 2002 fu campion di juniori la dublu, Wimbledon, deadunu cu Florin Mergea. Tricu la profesionismu tru 2003. Ditu alunaru 2008 seara anamisa di proţlli 100 di agiucători a lumillei la dublu, iar ditu brumaru 2009, tru proţlli 50. Alină deapoa niacumtinatu tru clasamentul mondial di dublu, până pi loclu 2, poziţie pi cari eara tu meslu brumaru a anlui 2015. Amintă, tu cariera a lui, 38 di turnee ATP la dublu şi agiucă alti 24 di finale. Agiumsi tu amprotusa di dauă ori tru turnee di Mari Șlem la dublu masculin, respectiv la Wimbledon tru 2015 şi la US Open tru 2017, cafi oară deadunu cu olandezlu Jean-Julien Rojer.
Tru palmares ari nica şi un titlu la dublu mixt, la Australian Open, amintatu tru 2012 deadunu cu agiucătoarea americană Bethanie Mattek-Sands. Agiucă şi ţinţi finali di Mare Șlem pi cari li kiru, respectiv tru 2010, 2011 și 2012, la Wimbledon, deadunu cu Lindstedt, și la Australian Open, la dublu mixt, tru 2014, cu indianca Sania Mirza, și tru 2016, deadunu cu agiucătoarea americană CoCo Vandiweghe. La Agiocurli Olimpiţi di Rio, ditu 2016, amintă medalia di asimi, deadunu cu Florin Mergea.
Agiucă tru echipa di Cupă Davis ali Românie ahurhinda cu anlu 2003. Debută, deadunu cu Florin Mergea, tru ună confruntare cu Ecuadorlu. După un agiocu dramatic cu frațllii Giovanni și Nicolas Lapentti, Tecău și Mergea adusiră punctul cari u pitricu România tru Grupa Mondială. Tutu tru Cupa Davis va s’avemu și aţea ditu soni apariție competițională al Tecău, dimi tru mecilu ali Românie cu echipa a statlui Peru, programat tru 27 şi 28 di brumaru, la Cluj-Napoca.
Autoru: Florin Orban
Armânipsearea: Taşcu Lala
