Tiñiseari tră medaliațlli olimpiţ
Mihai Pelin, 19.08.2021, 19:36
România amintă patru medalii la aesti ditu soni Agiocuri Olimpiţi di Tokyo, idyea cumu fu aoa şi ţinţi añi, la Rio, și cu trei ma puțăni andicra di ediția ditu 2012, a curi nicukiru eara Londra. Medalia goală di malămă olimpică di Tokyo fu amintată la canotaj, tru proba di diplo vâsli feminin, pritu Simona Radiș și Ancuța Bodnar. Tutu la canotaj, ama la proba di patru rame masculin, Mihăiță Țigănescu, Mugurel Semciuc, Ștefan Berariu și Cosmin Pascari amintară medalia di asimi. Tutunăoară, la dublu rami masculin, Marius Cozmiuc și Ciprian Tudosă bitisiră finala pi loclu doi. Tutu cu asimi s-turnă tru România și Ana Maria Popescu, la apală.
Aţelli nauă sportivi români medaliaţ fură tiñisiţ, București, di prezidentulu Klaus Iohannis. Tru numa-a sportivilor, la ţeremonia di tiñiseari, ţănu unu zboru Simona Radiş: “Anviţămu aţea ti va s’dzăcă solidaritatea, amintămu multă energhie pozitivă şi nă hărsimu multu di multu s’videmu că societatea românească nă pricunuscu performanţa. Himu hăzări s’pitriţemu mesajlu că sportul românescu ari loc tru ună societate modernă.”
Prezidentulu lă spusi a olimpicilor că easti ti anami tutu ţi adrară ti sportul românesc, acă născănti ori avea cabaia cheadiţi şi fără ndriptati: “Performanţa s’adară dzuuă di dzuuă şi caftă investiţii constante tru infrastructura sportivă, ndruparea şi promovarea a talentelor şi implicarea totală ditu partea a tutăloru actorlor guvernamentali.”
Tu bitisita a ţeremoniillei, caplu a statlui nica spusi că sportul lipseaşti năpoi s’agiungă ună prioritate, di itia că nsimneadză tiñisearea a născăntoru valori esenţiale ti ună societate sănătoasă.
România s-clasă pi loclu 46 tru clasamentul a medaliilor amintati Tokyo. Echipa avu 101 sportivi, 46 la femininu, 55 la masculuinu, la 17 disţipline sportive, maş ună ţi nu evoluă hiinda atleta Andrea Miklos, ditu itia a născăntoru probleme medicale. Tut ditu itia a născăntoru probleme di sănătate, gimnasta Larisa Iordache s-trapsi ditu finala di la bârnă. Reprezentanţălli ali Românie concurară la anotu, atletismu, canotaj, fotbal, gimnastică artistică, baschet feminin 3×3, ciclism, alumti, tir sportiv, canoe, tenis di masă, box, scrimă, triatlon, judo, tir cu arcul şi tenis.
Aţea di a 32-a ediţie a Agiocurloru Olimpiţi di veară di Tokyo s’ţămu tu kirolu 23 di alunaru – 8 di august. Programat inițial tru veara al 2020, evenimentul fu amânat ditu itia a pandemiillei di COVID-19. Ahurhinda cu a daua ediție a Olimpiadălleii (1900) și până tru aistu kiro, România nu lo parti di păni ori di la nai cama importantu evenimentu sportivu ditu lume. Di alargu, ediția ditu 1984, di Los Angeles, fu nai cama hăirlătică participare la Agiocurli Olimpiţi. 53 di medalii amintară sportivllii romani tu atelu kiro, ditu cari 20 di malămă, performanță cu cari România agiumsi pi loclu 2, după Statele Unite.
Autoru:Mihai Pelin
Armânipsearea: Taşcu Lala
