Apofasi anti-COVID
Nai cama contagioasă lumaki a coronaviruslui SARS CoV2 ţi fu aflată pănă tora, varianta Delta, ţi easti la orighinea-a dalgăllei lăhtăroasă di COVID-19 ditu India, easti tutu cama multu prezentă și faţi că autoritățli di iuţido s’llia apofasi di contracarari a unăllei a patra dalgă.
Corina Cristea, 14.07.2021, 21:22
Tru Israel, ti exemplu, fu lansată vaccinarea anti-Covid cu a treia doză tră persoanili cu problemi di imunitati, iara tru Franța nai ma importantă apofasi tru alumta contra a variantăllei Delta dimăndată di prezidentulu Emmanuel Macron spuni ti vaccinarea obligatorie tră personalu sanitaru şi ni-sanitaru ditu spitali, cliniţ, aziluri şi casi di auşi, ama şi tră personalu profesionistu şi voluntaru cari mutrescu oamiñilli tu ilikie, nica şi acasă. După Franţa, Gărţia dimăndă idyea apofasi tră personalu sanitaru, ahurhinda di la 1 di yismăciuni. Tru România, varianta Delta işi tu migdani aoa şi ndauă stămăñi, iara protlu omu ţi muri tu ligătură cu aestă lumaki s’nreghistră tru a daua giumitati a meslui ţi tricu. Tru aestu kiro, criscu lișoru și numirlu a cazurlor di aestă turlie și atelu a morţăloru asociaţ, iara autoritățli ma largu facu cllimari tră vaccinari.
Ti personalu medicalu cari nu aproaki vaccinarea anti-COVID ari căbilea tra s’păltească ditu gepea a loru păhălu a testiloru, spusi, marță, premierlu Florin Cîțu, anda deadi apandisi aestă turlie la ntribarea desi executivlu acaţă tu isapi apofasea obligativitatillei ti imunizari cadrili medicali ică a lucrătorloru cari mutrescu auşlli.
Florin Cîțu: “România ari nai ma ñica rată di infectari ditu Europa. Tru atea ţi mutreaşti vaccinarea tru arada-a personalui medicalu, avemu pripunirea s’hibă testaț atelli cari nu vor s’vaccineadză și s’păltească tră testu. Aestă easti propunirea ţi u feaţimu tră Ministerlu a Sănătatillei.”
Aesta, di itia că asparizmili mutrinda căbilea ta s’avemu și tru România ună a patra dalgă există, acă nu tru aestu kiro rata di pozitivari easti iuva anvărliga di 0,3% iara sistemlu medical numata easti anănghisitu s’lucreadză sumu zorea a unui numiru multu mari di persoani infectati.
Di altă parti, di marţă, pasagerlli cari agiungu pi Aeroportul Henri Coandă ditu stati ţi suntu pi lista galbină şi au certificat digital european COVID ică un testu PCR pot s’ufilisească fluxulu veardi, fără control DSP. Idyea cali poati s’hibă ufilisită şi di aţelli cari yinu ditu văsiliili di pi lista aroşe şi au certificatlu. Compania Naţională Aeroporturi Bucureşti spusi că certificatili digitali emisi di Marea Britanie ică ditu stati di nafoara a UE nu suntu valabili şi lă faţi urminie a pasagerloru cari agiungu ditu stati aflati pi lista aroşe ică galbină ta să-şi ngrăpsească di cu kiro formularlu căftatu di autorităţli sanitari ditu România, cari poati s’hibă discărcat di pi site-urli a companiilor aerieani ică di pe site-ul a Ministerlui di Externi.
Autoru: Corina Cristea
Armânipsearia: Taşcu Lala
