Ministurlu di Finanți, fu scosu di pi ipotisi
Liberalu Alexandru Nazare fu scosu di pi ipotisi, gioi, di la cumăndusearea-a Ministerlui di Finanţi, la căftarea a soţlui a lui di partidu, premierlu Florin Cîţu.
Ştefan Stoica, 09.07.2021, 14:00
Easti a doua revocari tru cabinetlu di coaliţie PNL-USR-PLUS-UDMR, după aţea di la giumitatea-a meslui apriiuru, cari avu tru scupo, fostul şefu di la Sănătati, Vlad Voiculescu. Avinarea al Voiculescu eara, tru atea oară, căftată di tută lumea şi vini tu kirolu a născăntoru inţidente greali cari agudiră spitali ditu România şi a lucărlui slabu di comunicari, tuti angricănda politic ma greu andicra di bunili a lui naeţ. Tora ama, fudzearea al Nazare vini vără turlie pi napandica şi hărnescu speculaţiili ţi spunu că ari ligătură cu alumta ti şefia a PNL cari s’duţi anamisa di primlu ministru Cîţu şi actualu lideru liberalu, prezidentulu di la Camera a Deputaţilor, Ludovic Orban.
Premierlu Florin Cîţu spusi, ama, că apofasea di revocari yini dupu ună analiză a lucărlui disvărtitu la Ministerlu di Finanţi. Aesta scoasi tu videală amănări la născănti proiecti importanti, ligati di aduţearea fonduri europeani şi combaterea-a evaziunillei fiscali.
Florin Cîţu: “Domnul ministru Nazare avu căbilea ta ş-da demisia, ama aleapsi ta s’hibă scosu di pi ipotisi. Tuţ liderllii a coaliţiillei fură hăbărisiţ di marţă după-prăndzu”.
Versiunea al Alexandru Nazare easti alta. Tru ună postari faptă pi unu şingiru di soţializari, fostulu titularu di la Finanţi spusi că furñia easti altă dimi că nu easti deadunu cu pareia ţi lu-ndrupaşti premierlu Florin Cîţu ti ipotisea di prezidentu a PNL.
Revocarea nu ari la thimelliu furñii obiectivi, ălli ansări tru apărari Ludovic Orban. El feaţi timbihi că alidzearea a unui nou ministru la Finanţi lipseaşti s’hibă apufusită tru forlu di cumănduseari a PNL şi tru coaliţia di guvernari.
Ludovic Orban: “Nu ari niţi ună furñie salamai ta s’ndrupască aestă remanieri. Di arada, iţi muabeti di aestă turlie lipsea s’hibă faptă emu tru Partidul Naţional Liberal, emu tru coaliţie”.
Opoziţia suţial-democrată nu ascăpă momentul şi arcă năi stepsuri contra-a guvernanţăloru. PSD lugurseaşti că alăxerli ditu guvern suntu fapti maş ta s’haristusească orgoliili politiţi a aţiloru ţi suntu la puteari.
Purtătorlu di zboru a partidlui Radu Oprea: “Ti amărtie, actualu premieru u aprindi văsilia, păhadzlli crescu, populaţia a văsiliillei urfăñipseaşti. Tru loc s’guverneadză easti cu mintea maş ti campania internă”.
Ampulisearea ditu PNL spuni nivrearea şi dotu vără sinferu a guvernanţăloru andicra di alithili problemi a cetăţeañilor, stipseaşti PSD. Dimi tamamu partidlu cari, aoa şi 4 añi, scutea tu migdani ună criză politică di lu scoasi di pi ipotisi guvernulu işiş pritu moţiuni di cenzură. Furñia — premierlu di atumţea dădea seamni găilipsitoari că nu tiñiseaşti fostul lider suprem a partidlui, Liviu Dragnea, tora arcatu tu hăpsani ti aruşfeti. Ditu videală constituţională, easti borgea incontestabilă a primlui ministru s’caftă scutearea di pi ipotisi a unlui membru a cabinetlui.
Autoru: Stefan Stoica
Armânipsearea: Taşcu Lala
