Prognoză economică mplină di nădii
România va s’aibă nai ma marea creaştiri economică ditu Uniunea Europeană tru 2021, udisitu cu prognoza di veară a Comisiillei Europeană cari dimăndă că economia românească va s’crească cu 7,4% tru aestu an şi cu 4,9% anlu ţi yini. Naua estimari a forlui comunitar tră 2021 easti cu 2,3 proţenti ma mari andicra di prognoza ditu primveară tră aţea că, aşi cumu spuni executivlu european, performanţa-a economiillei româneşti fu cabaia anvărtuşită tru protlu trimestru.
Daniela Budu, 08.07.2021, 19:29
Tutunăoară, pistipsearea-a consumatorlor şi a emburloru nica armasi mari până tu aestu kiro. Consumlu privat easti aştiptatu s’armănă ma largu vărtosu, ndrupătu di scutearea restricţiiili, maxus tru sectoarili zñiipsiti multu di multu di pandemie, ama şi di criştearea-a tiñiiloru di cathi mesu tru proţlli meşi a anlui, nica spuni Executivlu comunitaru.
Nica ş’cama multu, investiţiili va s’armănă vărtoasi tru kirolu 2021-2022, ndrupăti emu di sectorlu publicu emu di aţelu privatu. Exporturli va s’agiungă tu ună catastisi cama bună tru simfunie cu redresarea-a proţloru parteneri comerciali ali Românie, ama contribuţia-a exporturloru neti la creaştiri va s’armână, uidisitu cu aţea ţi spuni Comisia, negativă tru kirolu 2021-2022. Avansul a economiillei româneşti va s’hibă ma largu și tru anlu ţi yini, acă tru un ritmo cama ayălisitu.
Premierlu Florin Cîţu spuni că aesti previziuni suntu rezultatlu a lucărlui dimi că sectorlu privat apăndăsi pozitiv la meatrili băgati tu practico până tora şi ari pistipsearea că va s’bagă tu lucru tuti reformili dimăndati.
Di altă parti, profesorlu universitaru doctoru Mircea Coşea exighiseaşti ţi nsimneadză, ditu a lui videală, aesti ţifri tră România:
“Criştearea aesta di 7% easti ună ţifră cari neise nu easti creaştiri, easti ună recupearari. Ditu videala economică, macroeconomică, ma s’vreţ, easti un adgheafur mari anamisa di recuperari şi creastiri economică. Dimecu, noi recuperăm, nsimneadză că nă aprukemu di nivelu di la cari nkisimu. Aesta nu va s-dzăcă orlea zorlea că easti ună perioadă multu bună, nu nsimneadză orlea zorlea că va s’bănămu ma ghini. A deapoa cara va s’făţemu isapi ti aţea ţi s’fati dinăpoia aliştei ţifră u s’videmu că lucărli suntu câtu s’poati găilipsitoari. Di itia că aestă recuperari la aestu nivelu recordu tru Europa nu easti sănătoasă. Andicra di alti stati di anvărliga-a noastră, aestă ţifră cabaia mari spuni că, pănu tu soni, România nu ari la thimelliu ună dizvultari economică reală, căţe s’ndrupaşti, tutu cu tutu, pi mpărmuturi.”
La nivelu ali Uniuni Europeană, economia ari naeti s’nreghistreadză ună creaştiri di 4,8% tru aestu an şi di 4,5% anlu ţi yini, după ţi activitatea năstricu aştiptărli tru protlu trimestru ditu 2021, deapoa di itia-a unăllei catastisi ma bună mutrinda sănătatea s’agiumsi la ayălisearea-a restricţiiloru tru doilu trimesturu.
Autoru: Daniela Budu
Armânipsearea: Taşcu Lala
