Ună nauă prilundzeari a catandisillei di alertă

Guvernul di Bucureşti vulusi stămâna aesta prilundzirea a catandisillei di alertă apufusită aoa şi unu anu di dzăli. Tănearea-a llei ma largu tu idyea scară, acă catandisea epidimiologică easti bună, lă da izini a autorităţlor s’llia meatri ntrăoară cara lucărli va s’acaţă altă cali. Prilundzirea a catndisillei di alertă vini cu ună hăbari aştiptată di microbişti: la mecilu ditu optimili a Campionatlui European di Fotbal, paturlu şi atelu ditu soni pi cari Arena Naţională di Bucureşti va s’hibă nicuchiră, va s’aibă izini publiclu până la 50% ditu capaţitatea-a tribunilor. La capitolu năutăţ nica s’da izini ti organizarea şi disvărtearea tru aeru libiru a evenimentilor, andamusiloru tru arada-a campaniillei electorali aferenti a alidzerloru locali parţiali ditu dzuua di 27 di cirişaru, cu partiţiparea-a unui numiru di până la 1.000 di persoani, ama şi extindirea-a numirlui di oamiñi cari s’llia parti la evenimenti privati, numţă, pătigiuñi, la unu numiru di nai cama multu 200 năuntru, cu asiguripseare-a unăllei suprafqţă di 2 mp ti cathi unu. Armănu ma largu meatrili di relaxari băgati tru ahurhita-a meslui cirişaru, tu hăvaia recului cu pandemia.

Ştefan Stoica, 11.06.2021, 13:58

Guvernul di Bucureşti vulusi stămâna aesta prilundzirea a catandisillei di alertă apufusită aoa şi unu anu di dzăli. Tănearea-a llei ma largu tu idyea scară, acă catandisea epidimiologică easti bună, lă da izini a autorităţlor s’llia meatri ntrăoară cara lucărli va s’acaţă altă cali. Prilundzirea a catndisillei di alertă vini cu ună hăbari aştiptată di microbişti: la mecilu ditu optimili a Campionatlui European di Fotbal, paturlu şi atelu ditu soni pi cari Arena Naţională di Bucureşti va s’hibă nicuchiră, va s’aibă izini publiclu până la 50% ditu capaţitatea-a tribunilor. La capitolu năutăţ nica s’da izini ti organizarea şi disvărtearea tru aeru libiru a evenimentilor, andamusiloru tru arada-a campaniillei electorali aferenti a alidzerloru locali parţiali ditu dzuua di 27 di cirişaru, cu partiţiparea-a unui numiru di până la 1.000 di persoani, ama şi extindirea-a numirlui di oamiñi cari s’llia parti la evenimenti privati, numţă, pătigiuñi, la unu numiru di nai cama multu 200 năuntru, cu asiguripseare-a unăllei suprafqţă di 2 mp ti cathi unu. Armănu ma largu meatrili di relaxari băgati tru ahurhita-a meslui cirişaru, tu hăvaia recului cu pandemia.

Aduţemu aminti căţe criscu di la 500 la 1.000 numirlu a participanţălor la activităţli culturali, artistiţi, di divertismentu disvărtiti tru spaţii dişcllisi, cara va s’aibă cartea că s-vaccinară i tricură pritu lăngori ică s-testară. Naua limită poati s’hibă năstricută cara tuţ participanţălli suntu vaccinaţ şi easti borgea-a organizatorlui să s’asiguripsească di aestu lucru. Criscu şi numirlu a aţiloru cari pot s’llia parti la activităţ culturali, ştiinţifiţi, artistiţi ică di divertismentu năuntru di la 50% la 70% ditu capaţitatea-a spaţiului şi ndreaptă căbilea ti disvărteari la capaţitati maximă, cara va s’llia parti maş persoani imunizati. S-dişcllisiră locărli di agioacă ditu locurli ncllisi, cu partiţiparea-a publiclui până la 50% ditu capaţitati, cu căftarea ca tuţ atelli ţi suntu deadunu cu cilimeañilli s’facă dovada-a vacţinarillei ică tricură pritu lăngoari. Criscu şi numirlu a persoaniloru cari pot s’intră tru sălliurli di sportu ică fitness, di la 50% la 70% ditu capaţitatea-a spaţiului, iara numirlu a participanţăloru poati s’hibă ma mari cara tuţ suntu vaccinaţ. Năpoi s’dişcllisiră pisţinili interioari, cu partiţiparea-a publiclui până la 70% din capaţitatea maximă.

Criscu şi gradlu di ocupari a measiloru ditu restaurantili di năuntru. Pi litoralu s’da izini ti unu gradu ma mari di ocupari a spaţiiloru di cazari. Năpoi s’dişcllisiră barurli, cluburli, discoteţli şi sălliurli di agiocuri tru intervalu oraru 5.00 — 24.00, cu partiţiparea-a publiclui până la 50% ditu capaţitatea maximă a spaţiului, maş ti oamiñilli vacţinaţ. Di la 1 di cirişearu, numata va s’poartă prusupida şi năuntru, ama maş tru birourli iu ari nai cama multu 5 lucrători şi tuţ suntu vaccinaţ. Purtarea-a prusupidăllei armasi obligatorie tru spaţiili comuni. Fu publicată, di altă parti, naua listă a văsiliiloru cari au riscu epidimiologhicu, a deapoa Marea Britanie easti tora singurlu statu europeanu cari suntu tru zona aroşe.

Autoru: Ştefan Stoica

Armânipsearea: Taşcu Lala