ORDONANȚA MILITARĂ nr. 7 ditu 04.04.2020
CAPITOLUL I — S’bagâ tu practico apofasea ti carantinari tru câsâbălu Țăndărei, giudețlu Ialomița
Eugen Cojocariu, 06.04.2020, 09:07
Art. 1. — S’bagâ tu practico, tu kirolu a catandisillei di ananghi, apofasea di carantinari tru câsâbălu Țăndărei, giudețlu Ialomița.
Art. 2. — Tru localitatea carantinată pruvidzutâ la art. 1 s’da izini ta s’intrâ, icâ s’iasâ: a) purtarea-a pârmâtiiloru, cari ți s’hibâ turlia-a aiștoru, a pârmâtiiloru primi și a resursilor anânghisiti ti dizvârtearea-a huzmețloru icunomiți tru localitatea carantinată, ama și aprovizionarea-a bânâtorlor b) oamiñilli ți nu suntu cu nicukirata tru loclu carantinatu, ama cari dizvârtescu huzmeț icunomiți icâ tru dumenea ali apărari, aradâ publicâ, securitatea naționalâ, sanitar, ti catastisili di ananghi, administrațiillei publicâ localâ, asistențâllei și protecțiillei suțialâ, judiciarâ, servițiilor di utilitati publică, energheticâ, agriculturâllei, alimentațiillei publicâ, alimentarea cu apă, comunicațiilor și transporturlor.
Art. 3. — Ministerlu a Transporturlor, Infrastructurâllei și Comunicațiilor, ama și operatorlli icunomiț dit dumenea-a transportului pi călliurli di heru ti oamiñi va s’vindâ bileti/abonamenti icâ alti titluri di câlâturie ti transportul a călătorlor tru localitatea carantinată mași cara va s’hibâ tiñisiti dispozițiili art. 2.
Art. 4. — Tru localitatea carantinată uidisitu cu art. 1 s’bagâ tu practico tuti interdicțiili și restricțiili apufusiti prit ordonanțili militari vulupsiti tru kirolu a catandisillei di ananghi.
Art. 5. — S’axizeaști Tsentrul Giudețeanu di Coordonare și Cumânduseari a Intervențiillei Ialomița (CJCCI) tra s’apufuseascâ adâvdzeri și derogări tru ligâturâ cu dispozițiile pruvidzuti la art. 2, cu izinea-a Comitetlui Giudețeanu ti Catandisi di Ananghi.
Art. 6. — (1) Organili axiziti tru dumenea ali apărari, arada publicâ și securitati naționalâ va s’llia meatri spețifiți ti prevenirea și limitarea mutrindalui intrarea și ieșearea-a oamiñiloru tru/dit localitatea carantinatâ. (2) Autoritățli ali administrație publicâ localâ și giudețeani lâ fac cânuscuti borgili ți li au oamiñilli mutrindalui urdinarea și cu izini ta s’intrâ icâ s’iasâ ditu localitatea carantinată. (3) Bâgarea tu practico a meatriloru di verificari, controlu și izini tru/icâ dit localitatea carantinată s’fați pritu personalu a structurlor ditu Ministerlu trâ Afaceri Interni tru lucru deadun cu ațeali a Ministerlui trâ Apărari Naționalâ.
Art. 7. — Consiliul Giudețeanu Ialomița, dimarhul și Consiliul Local a Câsâbălui Țăndărei va s’lia meatri ta s’asiguripseascâ servițiili di protecție și asistență suțială, lucârlu uidisitu și hâirlâticu tu servițiili di utilităț publiți, ama și aprovizionarea cu alimenti di bază ti oamiñilli ți dotu nu ari cari sâ’lli mutreascâ icâ nu au altâ turlie di agiutoru și cari nu pot s’nkiseascâ calea di acasâ/ nicukiratâ.
Art. 8. — Intrarea/ieșearea tru/dit câsâbălu Țăndărei, giudețlu Ialomița, s’fați mași pritu locârli și călliurli di acces dișcllisi ti urdinarea publicâ pi călliurli europeani, naționali, giudețeani și comunali.
CAPITOLUL II Alti meatri ta s’nu s’arâspândeascâ COVID-19
Art. 9. — (1) S’curmâ tuti azboiurli ți li facu operatorlli icunomiț aerieañi câtâ Austria, Belghia, Confederația Elvețiană, Statili Unite ali Americâ, Regatlu Unit ali Mari Britanie și a Irlandâllei di Nordu, Regatlu a Țărlor di Nghiosu, Turchia și Iranu și dit aesti craturi câtâ România, ti tuti aeroporturli dit Românie, ti un kiro di 14 di dzâli. (2) Apofasea s’bagâ tu practico ahurhindalui cu 5 di apriiur 2020, oara 23,00, oara a Românillei. (3) S’prilundzeaști apofasea ti curmarea-a azboiurlor ți li facu operatorlli icunomiț aerieañi câtâ Frânție și Ghirmânie și ditu aesti stati câtâ România, ti un kiro di 14 di dzâli, ahurhindalui cu 8 di apriiur 2020. (4) Meatrili pruvidzuti la alin. (1) și (3) nu s’bagâ tu practico ti azboiurli fapti cu aeronavi di statu, azboiurli ți poartâ pârmâtii și corespondență, uminitari icâ ateali ți asiguripsescu serviții medicali di ananghi, cata cum și aterizărli tehniți nicomerciali.
Art. 10. — (1) Va s’da izini ti azbuirărli ți li facu tuț operatorllii aerieañi pritu cursi niregulati (charter), ti purtarea-a lucrătorlor, ți lucreadzâ cu dzuua, dit România câtâ alti stati, cu izini/ avizlu di la autoritățli axiziti dit cratlu di distinație. (2) Pruviderli alin. (1) nu s’bagâ tu practico ti lucrătorlli cari ș’dizvârtescu lucârlu tu dumena sanitarâ și asistențâ suțialâ.
Art. 11. — S’curmâ transportul rutier internațional ti oamiñi pritu serviții regulati, serviții regulati spețiali și serviții ocazionali tru traficu internaționalu, ti tuti cursili ți li facu operatorllii di transportu câtâ Italia, Spania, Franța, Ghirmânia, Austria, Belghia, Confederația Elvețiană, Regatlu Unit ali Mari Britanii și a Irlandâllei di Nordu, Regatlu a Vâsiliiloru di Nghiosu și Turchia și ditu aesti stati câtâ România, tut kirolu a catastisillei di ananghi.
Art. 12. — Tu intrarea pritu România, conducătorllii a autovehiculiloru di purtari pârmâtiili cu capacitatea maximă autorizată ma mari di 2,4 tonuri, cari nu au seamni ditu comata-a COVID-19, ngrâpseaști unâ declarație pritu cari va s’da giueapi, a curi urneki/ modelu easti apufusitâ di Ministerlu a Transporturlor, Infrastructurâllei și Comunicațiilor, pritu cari va ș’llia borgi ti loclu iu pot s’hibâ câftaț tru kirolu anamisa di purtărli/ cursili ți li facu. Aeșțâ nu va s’treacâ pritu meatrili di izolari la domiciliu/ carantinari, cu câftarea ta s’aibâ asiguripsiti pritu angajatoru hâlățli individuali di protecție contra-a COVID-19.
Art. 13. — Pruviderli art. 12 s’bagâ tu lucru dupu nomu ti conducătorlli a autovehiculiloru ți poartâ pârmâtii cu capacitatea nai cama mari di 2,4 tonuri cari urdinâ cu sinferlu ta ș’dizvârteascâ zânatea ditu România tru un altu stat membru a Uniunillei Europeanâ ica dit un altu stat a Uniunillei Europeanâ tru România, ca stat di rezidență a conducătorlui auto, cari ți s-hibâ turlia cum urdinâ, dimecu bordul a autovehiculului ți poartâ pârmâtia icâ pritu aftukinati individuali icâ pi a lui contu. Aeșțâ lipseaști s’pârâstiseascâ, anda intrâ tru România, unâ adeverință di lucrâtoru, vulusitâ di angajatoru.
Art. 14. — (1) Conducătorllii a autovehiculiloru di purtari pârmâtia cu capacitatea maximă autorizată ma mari di 2,4 tonuri cari trecu pritu teritoriul a Românillei, nu lipseaști s’ngrâpseascâ, anda intrâ tu Românie, declarația epidemiologică, ma s’tiñiseascâ aesti câftări nai cama ñiț: a) ufilisescu mași călliuri/ coridoari di tranzitu și locurli ti tritearea-a sinurlui di stat ți suntu tu caplu a aiștoru călliuri/ coridoari, vulusiti di Ministerlu a Transporturlor, Infrastructurâllei și Comunicațiilor și Ministerlu trâ Afaceri Interni, ama nu au niți izinea s’alâxeascâ calea apufusitâ; b) tranzitarea-a teritoriului ali Românie s’fați tu un kiro câtu cama șcurtu, dimi s’nu treacâ di 48 di sâhăț la intrarea tru Românie, tu aesti va s’hibâ și perioadili di dânâseari ti discurmari cathi dzuuâ normată; c) dânâsearea-a autovehiculului s’fați mașI tru parcărli ndreapti pi coridoarili di tranzitu, buiusitu-simnati. (2) Ma s’nu tiñiseascâ câftărli pruvidzuti la alin. (1), conducătorlu a autovehiculului va s’aibâ borgea s’intrâ tru carantină 14 di dzâli, nica ș’va s’pâlteascâ hărgili cu carantinarea a lui. Autovehiculu poati s’hibâ priloatu, tru aestâ catastisi, di un reprezentantu a nicukirlui. (3) La intrarea tru România, conducătorlu auto ari borgea s’bagâ, pi părțâli cu geami a autovehiculului (parbriz), un colantu maxus di la Inspectoaratlu di Stat ti Controlu tru Transportul Rutier, respectiv s’aibâ cu el cartea/ formularlu di tranzitu a curi model easti apufusitu di Ministerlu a Transporturlor, Infrastructurâllei și Comunicațiilor.
Art. 15. — Pruviderli di la art. 5 dit Ordonanța militară nr. 3/2020 mutrindalui meatrili ți s’llia ta s-nu s’arâspândeascâ COVID-19, publicată tru Monitorlu Oficial a Românillei, Partea I, nr. 242 dit 24 marțu 2020, nu s’bagâ tu lucru a mecanițloru di locomotivă și a personalui feroviar.
Art. 16. — (1) Ministerili cu a loru șingiru sanitaru și autoritățli ali administrație publicâ localâ va s’asiguripseascâ, cu câftari, spații hotelieri ahârdziti ti discurmarea anamisa di turi i gărdzâli/ cârâulili ti personalu dit sistemlu public sanitar, tra s’nu s’arâspândeascâ viruslu COVID-19. (2) Apofasea s’bagâ tu practico ahurhindalui cu dzuua anda s’tipusi aestâ ordonanțâ militarâ tru Monitorlu Oficial a Românillei, Partea I.
Art. 17. — (1) Personalu a cârâuliloru/ gărdzâloru forestieri teritoriale și giudețeani icâ ți au borgea ti controlu/ti viglleari pi comata silvică va s’llia parti tru dispozitivili di aradâ publică și control a urdinarillei pi călliurli publiți, deadunu cu lucrâtorlli a Ministerlui trâ Afaceri Interni și a Ministerlui ali Apărari Naționalâ, ti dizvârterea-a lucârlui/controalili spețifiți tu comati di controlu silvic. (2) Controalili spețifiți s’facu tu locârli di control existenti, andicra di personalu disponibil pi livelu a cârâuliloru/ gărdzâloru forestieri icâ ți au borgi ti control/ti vigllearea pi comata silvică.
CAPITOLUL III Dispoziții finali
Art. 18. — (1) Suntu axiziti s’asiguripseascâ bâgarea tu practico pruviderli dit prezenta ordonanțâ militarâ: a) Poliția Română, Giandarmeria Română și poliția locală, ti meatrili pruvidzuti la art. 2 și 8; b) Ministerlu a Transporturlor, Infrastructurii și Comunicațiilor, ti măsurile pruvidzuti la art. 3 și 9; c) Poliția di Frontieră Română, ti măsurile pruvidzuti la art. 11 și 13; d) Poliția Română, Poliția di Frontieră Română și Giandarmeria Română, poliția locală, direcțiile di sănătate publică și conducătorlli a autoritățlor ali administrație publicâ localâ, ti meatrili pruvidzuti la art. 12; e) Poliția Română, Poliția di Sinuru Română, Giandarmeria Română și Inspectoaratlu di Stat ti Controlu tru Transportul Rutier, ti apofasea pruvidzutâ la art. 14. (2) Nitiñisearea-a meatriloru pruvidzuti la art. 2, 3, 8, 9 și 11-14 duți la pideapsâ/răspundirea disciplinară, civilă, contravențională icâ penalâ, tru simfunie cu pruviderli a art. 27 dit Ordonanța di ananghi a Guvernului nr. 1/1999, cu alâxerli și adâvdzerli di ma nâpoi. (3) Personalu a instituțiilor pruvidzuti la alin. (1) easti axizitu s’veadâ contravențiili și s’da sancțiuni, tru simfunie cu pruviderli a art. 29 dit Ordonanța di ananghi a Guvernului nr. 1/1999, cu alâxerli și adâvdzerli di ma nâpoi .
Art. 19. — Pruviderli art. 4 dit Ordonanța militară nr. 4/2020 mutrindalui meatrili ți s’llia s’nu s’arâspândeascâ COVID-19, publicată tru Monitorlu Oficial a Românillei, Partea I, nr. 257 dit 29 marțu 2020, nu s’bagâ tu lucru.
Art. 20. — (1) Prezenta ordonanță militară s’tipuseaști tru Monitorlu Oficial a Românillei, Partea I. (2) Furnizorlli di serviții media audiovizuali au borgi s’hâbâriseascâ publicul, pritu mesaji difuzati regulat, ti nai ma pțânu dauâ dzâli di anda s’tipusi, ti ațeali ți suntu ngrâpsiti tu aestâ ordonanțâ militarâ.
Ngrâpsearea: Eugen Cojocariu
Armânipsearea: Tașcu Lala
