Investiţii tra dezvoltari
Daniela Budu, 18.09.2019, 12:38
Guvernul di Bucureşti aproba cama di una sută di proiecti finanţate prit Fondul di Dizvoltari şi Investiţii, tru valoari di aproximativ 2 miliardi di lei (circa 425 milioane di euro). Premierlu Viorica Dăncilă dimanda că proiectile ndrupascu investiţiile a comunităţilor locale şi sva s-dizvarteasca tru tuti regiunile, iara implementarea a lor va s-ahurheasca tamam di meslu ti yini.
Ia ti spusi Viorica Dăncilă: ‘Easti zborlu di lucrări di infrastructură, cal’iuri locale, modernizări şi reabilitari di geaei, şcol’urii şi grădiniţe, ama şi spitale, construcţia tra singirlu di distribuţie şi alimentari cu gaze naturale ica singirlu di canalizari. Tuti proiectile aprobate au documentaţia completă’. Premierlu nica spusi că şi proiectile di infrastructură ti suntu tru dizvarteari au progrese, ica easti zborlu ti Autostrada Sibiu-Piteşti, Centura Bucureşti Sud, ti cari guvernanţl’ii minduescu ca va lu faca ma habinu traficlu dit Capitală, i calea expresa Craiova-Piteşti (sud).
Tu ti mutreasti autostrada Sibiu — Piteşti, cari va s-treaca muntal’i și va s-lega sudlu di centrul ali Românie, toradioara fu simnatu contractul tra protlu lot, di aproapea 13 di kilometri, cari va s-hiba adratu ti un chiro di 4 ani, hiinda tronsonlu golu dit autostradă cari ari un constructor desemnat. Autostrada Sibiu — Piteşti va s-aiba una lundzimi di 123 kilometri şi va s-hiba ampartata tru tinti loturi. Easti un di proiectile majore di infrastructură rutieră ti va s-asiguripsasca ligatura cu Coridorul 4 paneuropean, cari treati prit vasilie di la ascapitata cata apirita. Autostrada Ploieşti-Braşov, diclarată obiectiv strategic di interes naţional, ari una valoari totală di 1,36 miliardi di euro şi pruveadi un chito di proiectari şi execuţie di patru ani. Uidisitu cu spusa a premierlui, aesta easti una prota pacheta di proiecti finanţate dit Fondul di Dizvoltari şi Investiţii.
Guvernul va s-duca ma largu analiza tra s-hiba aprobate şi alte proiecti până la nivelu a plafonului di contractari di 10 miliardi di lei (circa 2,1 miliardi di euro) tra estan — nica spusi Viorica Dăncilă. Adutem aminti că Fondul di Dizvoltari și Investiții ari tru scupo finanțarea a proiectilor di dizvoltari cari acata tru isapi investiții i lucrări di andridzeari si znueari curente a primăriilor, asociațiilor di dizvoltari intercomunitară tru domenii prioritari cata cum sănătate, educație, apă și canalizari, rețea di energie electrică și rețea di gaze, infrastructura di transport, salubrizari, rețea di iluminat public, cum și tru alte domenii. Fondul s-ufiliseasti și tra proiecti di investiții a universitățlor: construcția și modernizarea ali infrastructura didactica, di cercetari, a spațiilor di masă și cazari tra studența și a tentrilor di conferință.
Autoru: Daniela Budu
Armanipsearea: Tascu Lala
