Guvernul treaţi di moţiunea di cenzură
Guvernul di stânga di Bucureşti ţănu cheptu fără emoţii mări dinintea a unăl’ei nauă moţiuni di cenzură, acă să spunea ma crehtu ca vărnăoară. Tru 26 di mai, la alidzerli europarlamentari PSD, avyiulia-antân’ia a coaliţiil’ei, amintă maşi 22,5% dit voturi, cu ţinţi proţenti ma puţăn andicra di PNL, nai cama importantu partid dit opoziţie, şi aproapea isa cu alantu adversar major, Alianţa USR–PLUS. A deapoa ALD, partener-junior la guvernare a suţial-democraţlor, agiumsi sum praglu electoral di 5%. Asparizma tru arâdârichili a stângăl’ei fu nica ma mari, a daua dzuuă după alidzeri, cu itia a ncl’idearil’ei fostul om furteaţă coaliţiil’ei guvernamentală, liderlu PSD, Liviu Dragnea, condamnat di instanţa supremă la trei ani şi giumitate di hăpsani cu executare tra fapte di aruşfeti. Ma multu, dusi ma largu si fudzearea a deputaţlor şi senatorlor PSD cari s-trag sum umbrela Pro România, partidlu thimil’iusitu di fostul a lor şef, Victor Ponta, şi di alţă dezidenţă social-dimocraţ.
Bogdan Matei, 19.06.2019, 12:08
Cu tuti aeasti, guvernul cumandusitu di liderlu interimar a PSD, Viorica Dăncilă, armâni, după ti moţiunea di cenzură iniţiată di opoziţie nu fu aprucheată di Parlamentu. Documentul adună maşi 200 di voturi dit ateali 233 câti eara ananghi tra s-hibă adoptat. Tu chirolu anda iniţiatorl’ii — PNL, USR, PMP, UDMR – stipsiră guvernul PSD – ALDE că nchisi atacuri niacumtinati contra ali justiţie şi u destabiliză economia, reprezentanţăl’i a Putearil’ei nu pistipsiră volea ali opoziţie tra să u pril’ia guvernarea tru aestu chiro. Liderlu a deputaţlor PNL, Raluca Turcan, spuni că opoziţia ari axia tra să u pril’ia guvernarea şi că moţiunea di cenzură easti rezultatlu a volil’ei a român’ilor, exprimată tru 26 mai.
Raluca Turcan: Putem s-aduţem căndu s-hibă un guvernu cari s-adra legal studiile di fezabilitate, s-n’icşură la propriu construcţiile di autostradă. Putem tru Parlamentu s-ndridzem lucurlu ti votlu pritu coresponditţă tra român’i, s-corectăm legislaţia pi justiţie.”
Premierlu Dăncilă năpoi şi spusi apofasea tra s-ducă păn di mardzină mandatlu şi cundil’e că indicatorl’i economiţ dimonstreadză hăirlătica a politiţlor promovati di Executiv. Viorica Dăncilă: Easti ti dealihea că nu reprezentaţ ună alternativă la guvernari. Cadealihea vreţ s-alăxiţ aestu guvernu până la yinitoarili alidzeri? Io minduescu că nu. Nu vidzum di partea a dumnil’ilor a voastri niţi ună idhee concretă ti cum s-lucreadză economia tru sinferlu a cetăţean’ilor.”
Niţi comentatorl’i nu s-acaţă şcurtica, dimi, pi orixea ali opoziţie tra s-pril’ia, tru aestă oară, fârnurli executivi. Ti furn’ia că, di ună parti, politiţli suţiali cabaia filotimi a stângăl’ei lipseaşti s-hibă decontati tru şcurtu chiro şi, di alantă parti, tut aparatlu di stat fu ndisatu cu muştiradzl’i a partidilor di la puteari, cari fuvirsescu cu sabotajlu iţi guvernu di altă hromă politică. El’i s-declară, ama, căndăsiţ că scena politică va s-aprindă ti di toamnă, unăoară cu apruchearea a alidzerlor prezidenţiali.
Autor: Bogdan Matei
Armânipsearea: Taşcu Lala
