România şi moneda euro
Aderarea ali Romanie la moneda euro reprezintă un cadialihea proiectu di văsilie, tra hăirlătica a curi easte ananghi di ndrupari di partea la tută societatea, diclara premierlu Viorica Dăncilă cu ucazea ti prezentarea a raportului di fundamentare a Planlui naţional di adoptare a euro. Idyea cum integrarea tru Uniunea Europeană şi tru NATO, aderarea la zona şi moneda euro ari anvergura a unui cadealihea proiectu di vasilie, lugurseaşti şefa a executivlui di Bucureşti. Tru opinia a aiştei, treaţirea la euro va s-aducă hăirlătică tră societatea românească, ama tra succesul a aistei gaereti easti ananghi di ndruparea a mediului academic, a societatil’ei civilă şi a partidilor politiţi, a partenerilor sociali şi al instituţiilor fundamentale a statlui. Suntu esenţiale pregătirea a etapãl’ei premergătoarei a aistui proces, dimi adaptarea la Mecanismul european a ratelor di alăxeri, cum şi loarea di cătră Guvern a meatrilor ananghisiti tra creaştirea a competitivitatil’ei şi asiguripsearea a unei creaştiri economică sustenabile.
Ştefan Stoica, 17.04.2019, 11:28
Ia ţi spusi Viorica Dăncilă: Am căndăsearea că, prit misuri di stimulare economică şi di susţănere a domeniilor competitive, prit dialog discl’is şi constantu cu partenerii sociali, ari premise ca la orizontul a anlui 2024 România s-poată s-bagă tru ucru cerinţele fundamentale di adoptare a monedăl’ei euro”.
Prezidentul a Academiil’ei Române, Aurel Pop, sumlinie că prezenţa a României tru Uniunea Europeană easti fundamentală şi adaptarea a văsiliil’ei la valorile a aistei fu salvatoare tra ghineata ali societati. Guvernatorul BNR, Mugur Isărescu, easti adeptul a unăl’ei abordari cu ngătan, tra atea că, tru opinia al năs, aderarea la zona euro nu ndreadzi automat problemele a unei economii, ma nica poati s-li agraveadză. Guvernatorul Băncii centrale mindueasti că lipseasti s-hibă mutrită si turlia tru cari văsilii dit regiunea central şi est-europeană achicăsiră s-procedeadză atumţea cându tricură la moneda euro. Tru opinia al năs, yilipsitor tră România easti turlia tru cari abordeadză subiectul Polonia, Cehia şi Ungaria.
Aderarea la euro armâne un angajament loatu păn di mardzină al Mugur Isărescu: Treatirea la euro easti ună chestiune di când, nu una di desi, angajamentul ali Românie tra s-intră tru zona euro iiinda indiscutabil, căte constituie ună borgi asumată prin Tratatlu di aderare la Uniunea Europeană. Anaparti ama di constrângerea formală şi juridică, angajamentul ti adoptarea a monedăl’ei unică yilipseaşti şi ataşamentul vărtos ali României andicra di proiectul european. Cu alti zboară, asumarea acutotalui a mirăl’ei europeană ali României nsimneadză şi intrarea tru zona euro”.
Nu lipseaşti s-agărsim dit videal1 — adusi aminti Mugur Isărescu – că aestu demers nu ari ună dimensiune strict tehnică, di alăxeari a bancnotelor şi a monedilor tru lei cu ateali tru euro, că easti un proces di mare complexitate, cari, tra să s-dizvărtească uidisit si să s-bitisească cu hăiri, caftă chivernisearea a multu di multu cu ngătan şi ună bună colaborare anamisa di instituţiile ţi cilăstisescu.
Autor: Ştefan Stoica
Armânipsearea: Taşcu Lala
