Guvernul va s-faca sesizari la Curtea Consittuţională
Ministurlu ali justiţie, Tudorel Toader, nu s-ampaca, nu apruke atea dit soni habari a prezidentului Klaus Iohannis că nu-l’i aproaki caftarea ti scuteari di pi ipotisi a procurorlui şef DNA, Laura Codruţa Kovesi. El dimanda că bitisi una primă variantă a sesizari’ei ti va u niinteadza la Curtea Constituţionala. Apelu la CCR s-harseasti di andrupamintul politic a prezidentului PSD, Liviu Dragnea, liderlu a protlui partid la puteari, cata cum şi a prim ministrului, Viorica Dăncilă, uidisitu cu spusili a ministrului Toader: Al’i prezentaiu (dnei Dăncilă-nota ali redacţie) protili elemente ti poati s-li acata tru isapi sesizarea a Curtil’ei Constituţionala. Armasi că dzalili aesti s-bitisescu sesizarea tra s-ufilisescu, s-valorific şi documentul di la prezidentu. Luni va mi adun cu doamna premier diznau şi tut luni va u sesizăm Curtea Constituţională”.
Ştefan Stoica, 19.04.2018, 11:40
Ministrul ali justiţie spuni că prezidentul s-avea spusa minduta tru chestiunea tra demiteri şi nu adusi argumenti juriditi ica manageriale tra s-u motiveadza apofasea. Concluzia a domnului Toader easti atea că niaprukearea a revocaril’ei fu un lucru eminamenti politic. Al’iumtrea, şeflu a statlui lugurseasti că fu anvalit si andrupatu acutotalui di nom anda lo apofasea a lui. Klaus Iohannis TRACK: După minduita a mea, nu ari niti un conflictu şi niti un thimel’iu tra una sesizare a Curtil’ei Constituţionale. Tru tut procedeulu ahurhitu di ministru cu caftarea di revocare, solicitarea a avizlui CSM şi pan tru soni, apofasea a mea, legislaţia ti easti tru arada, practico, tru materie, fu tin’isită sută tru sută, a deapoa asi cum tu stimu, nomlu alasă la latitudinea a prezidentului desi aproaki ica nu aproaki una pripunire ti revocare”.
Avizlu negativ a CSM la pripunirea niintată di ministrul ali Justiţie, invocat di preşedinte atumtea cându nu apruke revocarea, easti duri ca argumentu tru favoarea al Klaus Iohannis, mindueasti atel di ma nainti prezidentu a Curtil’ei Constituţionala ali României, Augustin Zegrean. Tru minduita al nasu, apofasea fu corectă, căte, spuni Zegrean, procedura spuni aşi: ministrul ali justiţie pripuni, CSM avizeadză favorabil ica nifavorabil şi prezidentul apufuseasti. CSM, cari easti garantul ti independenţa ali justiţie, spusi nu tru unanimitate, ase că prezidentul nu avea ti s-aleaga, cundil’e Zegrean, candasitu că problema ti revocari s-bitisi cându prezidentul silighi apofasea.
Adutem aminti că pripunirea tra demiteri a şefal’ei DNA avu dinapoi un raportu prit cari ministrul Toader vru tra s-demonstreada că lucurlu a aistei fu mintitu di greali calcari a borgilor. Raportul fu lugursitu di reprezentanţal’i a majoritatil’eri PSD — ALDE ca ntimil’atu şi ghini documentat, ama cutugursitu di opoziţie cate tani una parti şi easti inconsistentu. Aesta dit soni fu si minduita a prezidentului Iohannis, agiuta anda lo apofasea di avizlu negativ a CSM, consultativ ama obligatoriu.
Autor: Ştefan Stoica
Armânipsearea: Taşcu Lala
