Habari dit bana romaneasca si internationala
BUCURESTI — Prezidentul ali Romanie, Klaus Iohannis, va s-dimanda, tu ahurhita a stămânal’ei ti yini, apofasea a lui tu ligatura cu caftarea ti revocare di pi ipotisi a procurorlui-şef a DNA, Laura Codruţa Kövesi. Tora ma ninti, şeflu a statlui, cari si spusi ma ninti pistipsearea tru d-na Kovesi, avea dzasa că apofasea a lui va s-acata tru isapi tuti documentili cari îl’i suntu adusi dininti di dauli părţa. Ministrul ali Justiţie, Tudorel Toader, cafta, tru meslu scurtu, revocarea a şefal’ei pisti procurorl’i anticorupţie, pi cari u stipseasti ca ari calcata borgili. Consiliul Superior ali Magistratura deadi aviz negativ ti aesta caftari.
Tașcu Lala, 15.04.2018, 18:04
LUXEMBURG — Seflu a diplomatiil’ei români, Teodor Meleşcanu, l’ia part, luni, deadun cu omologil’i a lui dit alanti stati membre UE, la andamusea a Consiliului Afaceri Externe (CAE), cari va s-dizvarteasca Luxemburg. Cu catastisea dit Siria tru amprotusa, arada a moeabetlor nica acata tru isapi raporturli cu Iranlu, evoluţiili dit Balcan’il’i dit Ascapitata, ligatura Bruxelles-Moscova si, respectiv, halatli financiari externi ale UE tu contextul a yinitorlui Cadru Financiar Multianual post-2020. Analtul Reprezentantu ali UE ti politică externă şi securitate, vite-prezidentu ali Comisie Europeana, Federica Mogherini, va s-dimanda a miniştrilori di Externe tu ligatura cu catastisea dit Cumata Gaza şi dit Venezuela.
PARIS – Campioana feminina ali Românie la handbal, CSM Bucureşti, s-califica, dumănica seara, tu asi-numasitlu Final Four a Ligal’ei Campionilor, aca fu azvimta, tu deplasare, cu 20-27, tru returlu a cirecurlor di finală, di pareia franceza Metz. Tu prota mansa, Bucuresti, CSM avea amintata una victorie categorica, scor 34-21. Tu Final Four nica s-calificara actuala campiona continentala, Gyor ETO, dit Ungaria, HC Vardar, dit Macedonia, şi Rostov-Don, dit Rusia. Semifinalele si finala a Ligal’ei va s-agioaca tu 12 si 13 di mai, Budapesta, iu romancele au amintata competitia tru 2016. Sambata, si SCM Craiova (sud) agiumsi tu finala a Cupal’ei EHF, dupa ti feati isa, scor 18-18, pi terenlu a l’ei, cu pareia Kastamonu dit Turchie, tru mansa decisiva dit semifinale. Tu mecilu tur, tru deplasare, romancele avea amintata cu 23-22. Easti prota finala a Craioval’ei, la a daua participare tru cupili europeani. Tu atel dit soni actu, SCM va s-agioaca cu norvegientili di la Vipers Kristiansand
XXX – Ambasadorlu american la ONU, Nikki Haley, declara că Statele Unite nu va s-traga ascherili dit Siria până cându obiectivili a Washingtonului nu va s-hiba bagati tu practico. Prit prezenţa a ascherilor americane tru Siria, spusi nasa, Statele Unite vor s-aiba asiguripsearea ca aclo numata va s-hiba ufilisiti armi chimiti, ca gpareia jihadistă Stat Islamic (ISIS) va s-hiba azvimtă, a deapoa Iranlu vitin va s-hiba vigl’eat di aproapea. Di alta parti, Marea Britanie cundil’e că nu ari naeti, toradioară, s-nchiseasca diznau ataca di sâmbătă cu rachete conra a mehaniilor şi depozitelor di armati chimiti dit Siria. Seflu a diplomatiil’ei di Londra, Boris Johnson, fati timbihi, ama, ca britanitl’i va s-aiba tu videala acţiuni yinitoari cara prezidentul sirian, Bashar al-Assad, va s-ufiliseasca diznau armatli chimiti contra a popului isisi. Declaratiile s-fac dupu ti Statele Unite, Marea Britanie şi Franţa lansara aprindu sambata, nai ma vartoslu atac contra a nascantor tinti siriene di anda nkisi polimlu tivil, ca apandisi la asi minduita ufiliseari a armatlor chimiti di regimlu di Damasc.
Autor: Udalu a Habarlor/ Camera Stirilor
Armanipsearea: Tascu Lala
